ជាតិ
គេហទំព័រទេសចរណ៍ស្វែងយល់ពីរមណីយដ្ឋានអង្គរ ដាក់ឱ្យដំណើរការថ្ងៃសុក្រនេះ
× សៀមរាប៖ គេហទំព័រព័ត៌មានទេសចរណ៍ស្វែងយល់ពីរមណីយដ្ឋានអង្គរ នឹងដាក់ឱ្យដំណើរការជាផ្លូវការនៅថ្ងៃទី២៩ ខែមិថុនាខាងមុខនេះ ក្រោយដាក់ឱ្យដំណើរការសាកល្បងកាលពីដើមឆ្នាំកន្លងទៅ។
«យោងលើការតាមដានជាប្រចាំលើប្រសិទ្ធភាព ព្រមទាំងបានប្រមូលផ្តុំវាយតម្លៃលើមតិយោបល់នានា របស់អ្នកប្រើប្រាស់គ្រប់មជ្ឈដ្ឋានទាំងក្នុង និងក្រៅប្រទេស ក្រុមការងារអាជ្ញាធរជាតិអប្សរា បានធ្វើបច្ចុប្បន្នភាពគេហទំព័រនេះរួចរាល់ហើយ ដើម្បីអភិវឌ្ឍខ្លួនឱ្យស្របតាមតម្រូវការអ្នកប្រើប្រាស់ និងវឌ្ឍនភាពនៃបច្ចេកវិទ្យានាពេលបច្ចុប្បន្ន»។ នេះបើយោងតាមសេចក្តីជូនដំណឹងរបស់អាជ្ញាធរជាតិអប្សរា ដែលចេញផ្សាយ នៅថ្ងៃទី២៦ ខែមិថុនា។
តាមសេចក្តីជូនដំណឹងដដែល គេហទំព័រទេសចរណ៍ដែលមានអាស័យដ្ឋាន www.angkor.com.kh នឹងអាចនាំភ្ញៀវទេសចរជាតិ និងអន្ដរជាតិ ស្វែងយល់ពីរមណីយដ្ឋានអង្គរបានស៊ីជម្រៅ ទាំងព័ត៌មាន ប្រវត្តិសាស្ត្រ សង្គម នីតិវិធីនានា ដែលត្រូវបានអនុវត្តមុន និងអំឡុងពេលទស្សនា រួមទាំងព័ត៌មានសំខាន់ៗសម្រាប់ទេសចរ ក្នុងការរៀបចំកញ្ចប់ទស្សនកិច្ចមកកាន់អង្គរ៕
Tag:
ទេសចរណ៍
អង្គរ
សៀមរាប
© រក្សាសិទ្ធិដោយ thmeythmey.com