ជាតិ
សង្គមជាតិ
EU ប្តេជ្ញាបន្តរកមធ្យោបាយ ការពារជនរងគ្រោះពីអំពើទារុណកម្ម និងការរំលោភសិទ្ធិ
× ក្នុងឱកាសនៃទិវាអន្តរជាតិគាំទ្រដល់ជនរងគ្រោះដោយសារអំពើទារុណកម្ម សហភាពអឺរ៉ុបបានចេញសេចក្តីថ្លែងការណ៍មួយ ដោយបញ្ជាក់ជាថ្មីពីការប្តេជ្ញាចិត្តយ៉ាងមុតមាំបំផុតរបស់ខ្លួន ចំពោះការបង្ការ ថ្កោលទោស និងលុបបំបាត់រាល់ទម្រង់ទាំងអស់ នៃអំពើទារុណកម្ម និងអំពើ ឬការដាក់ទណ្ឌកម្មឃោរឃៅអមនុស្សធម៌ ឬបន្ទាបបន្ថោកផ្សេងទៀត។
ការគូសបញ្ជាក់ដូច្នេះ ដោយសារសហភាពអឺរ៉ុប មើលឃើញថា ទារុណកម្មនៅតែត្រូវបានគេបន្តអនុវត្តជុំវិញពិភពលោក ក្នុងរូបភាពជាករណីដាច់ដោយឡែកៗ ឬក្នុងលក្ខណៈជាប្រព័ន្ធ តាមរយៈទម្រង់ផ្សេងៗ បើទោះជាការធ្វើទារុណកម្ម ត្រូវបានហាមឃាត់ដាច់ខាត ក្រោមក្របខណ្ឌច្បាប់អន្តរជាតិក៏ដោយ។ បើតាមសេចក្តីប្រកាសព័ត៌មានរបស់សហភាពអឺរ៉ុប អំពើទារុណកម្ម អាចកើតមានចំពោះមនុស្សគ្រប់គ្នា ដូចជា បុរស ស្ត្រី និងកុមារជាដើម ហើយ អំពើនេះទៀតសោត ជាបទល្មើសមិនអាចអត់ឱនឱ្យបាន ដែលទាមទារឱ្យមានការផ្តន្ទាទោសជនប្រព្រឹត្តម្នាក់ៗ ចំពោះច្បាប់។
លោកស្រី Federica Mogherini តំណាងជាន់ខ្ពស់សហភាពអឺរ៉ុប បានបញ្ជាក់ក្នុងសេចក្តីប្រកាសព័ត៌មានដដែលយ៉ាងដូច្នេះ៖ «យើងនឹងបន្តកៀរគរមធ្យោបាយទាំងអស់របស់យើង ដើម្បីផ្តល់ការការពារដល់អ្នកដែលបាននិងបន្តទទួលរងការរំលោភបំពានសិទ្ធិមនុស្ស ដ៏គួរឱ្យស្អប់ខ្ពើមមួយនេះ។ យើងក៏នៅតែប្រកាន់គោលជំហរគាំទ្រដល់មនុស្សទាំងអស់ ដែលមានសេចក្តីក្លាហាន ចេញមុខតតាំងនឹងបទល្មើសនេះ តាមរយៈការបង្កើនការយល់ដឹង ការចូលរួមសហការជាមួយអង្គការសង្គមស៊ីវិល ឬការគាំទ្រដល់ជនរងគ្រោះ»។
ក្រៅតែពីការប្តេជ្ញាចិត្ត សហភាពអឺរ៉ុប បានលើកឡើងពីយន្តការច្បាប់នានាដែលខ្លួនបានដាក់ចេញផងដែរ។ សេចក្តីប្រកាសព័ត៌មាន បានបញ្ជាក់ថា ការប្រយុទ្ធប្រឆាំងនឹងអំពើទារុណកម្ម និងការធ្វើបាបក្នុងរូបភាពផ្សេងទៀត ត្រូវបានដាក់ចេញក្នុងសន្ធិសញ្ញា និងធម្មនុញ្ញស្តីពីសិទ្ធិជាមូលដ្ឋានរបស់សហភាពអឺរ៉ុប និងជាអាទិភាពដ៏សំខាន់មួយ នៃផែនការសកម្មភាពរបស់សហភាពអឺរ៉ុប ស្តីពីសិទ្ធិមនុស្ស និងលទ្ធិប្រជាធិបតេយ្យ ២០១៥-២០១៩។
«យើងប្រើប្រាស់អភិក្រមសកលដើម្បីលុបបំបាត់អំពើទារុណកម្ម រួមមានការហាមឃាត់ ការបង្ការ ការប្រយុទ្ធប្រឆាំងនឹងនិទណ្ឌភាព និងការផ្តល់ដំណោះស្រាយដល់ជនរងគ្រោះ ដោយប្រើប្រាស់កិច្ចសន្ទនាស្តីពីនយោបាយ និងសិទ្ធិមនុស្សរួមគ្នា សកម្មភាពបង្កើនការយល់ដឹង និងជំនួយហិរញ្ញវត្ថុ ជាឧបករណ៍របស់អឺរ៉ុប ដើម្បីលើកកម្ពស់លទ្ធិប្រជាធិបតេយ្យ និងសិទ្ធិមនុស្ស ក៏ដូចជាគោលនយោបាយផ្តល់ជំនួយអភិវឌ្ឍន៍របស់យើង»។ នេះជាការលើកឡើង របស់លោកស្រី Federica Mogherini នៅក្នុងសេចក្តីប្រកាសព័ត៌មាន។
សហភាពអឺរ៉ុប ក៏លើកកម្ពស់ភាពចាំបាច់ដើម្បីឱ្យមានការការពារ និងបង្ការការធ្វើទារុណកម្ម ក្នុងគ្រប់សកម្មភាពទាំងអស់របស់ខ្លួន និងផ្តល់ការការពារបែបនេះ ដល់អ្នកដែលកំពុងស្ថិតក្នុងស្ថានភាពងាយរងគ្រោះបំផុត ដូចជាក្នុងបរិបទនៃការប្រឆាំងអំពើភេវរកម្ម ការគ្រប់គ្រងវិបត្តិ និងទេសន្តរប្រវេសន៍ជាដើម។
តួនាទីរបស់យន្តការអន្តរជាតិ និងយន្តការតំបន់ ក៏ដូចជាតួនាទីដ៏សំខាន់របស់ស្ថាប័នសិទ្ធិមនុស្សជាតិ និងយន្តការបង្ការការធ្វើទារុណកម្មនៅថ្នាក់ជាតិ គឺជាគន្លឹះសម្រាប់លុបបំបាត់អំពើទារុណកម្ម។ សហភាពអឺរ៉ុបផ្តល់ការគាំទ្រផ្នែកហិរញ្ញវត្ថុដល់ការងារសំខាន់ៗ របស់យន្តការទាំងនេះ ក្នុងប្រទេសជាច្រើននៅជុំវិញពិភពលោក។ ការបង្កើតនូវយន្តការឯករាជ្យដើម្បីបង្ការការធ្វើទារុណកម្មនៅថ្នាក់ជាតិ អាចធានាឱ្យមានការបន្តពិនិត្យតាមដាន និងពិគ្រោះយោបល់ ដែលនឹងនាំឱ្យមានការផ្លាស់ប្តូរដ៏មានអត្ថន័យ ក្នុងការបង្ការមិនឱ្យមានការធ្វើទារុណកម្មកើតមានឡើង។
សម្រាប់សហភាពអឺរ៉ុប ការលុបបំបាត់ការធ្វើទារុណកម្ម អាចសម្រេចទៅបាន តែតាមរយៈកិច្ចខិតខំប្រឹងប្រែងជាសកល តាមរយៈការផ្គួបកម្លាំងគ្នា ការកំណត់នូវយុទ្ធសាស្ត្ររួម និងការអនុវត្តសកម្មភាពរួមគ្នា។ ទន្ទឹមនឹងនេះ សហភាពអឺរ៉ុប ក៏នៅតែចាត់ទុកការបន្តចូលរួមសហការជាមួយដៃគូដទៃរបស់ខ្លួននៅកម្រិតតំបន់ និងកម្រិតពហុភាគី រួមជាមួយសង្គមស៊ីវិល ជាសារៈសំខាន់យ៉ាងខ្លាំងផងដែរ ដើម្បីសម្រេចវឌ្ឍនភាពនេះ។
ក្នុងសេចក្តីប្រកាសព័ត៌មានដដែល សហភាពអឺរ៉ុប បានអំពាវនាវសាជាថ្មី ឱ្យមានការផ្តល់សច្ចាប័នឱ្យបានទូលំទូលាយ និងការអនុវត្តប្រកបដោយប្រសិទ្ធភាព នូវអនុសញ្ញាសហប្រជាជាតិប្រឆាំងនឹងការធ្វើទារុណកម្ម និងពិធីសារបន្ថែម នៃអនុសញ្ញានេះ និងសូមស្វាគមន៍ការ ផ្តល់សច្ចាប័នកាលពីពេលថ្មីៗនេះ ដោយប្រទេសអាហ្វហ្គានីស្ថាន អូស្ត្រាលី ម៉ាដាកាស្កា ស្រីលង្កា និងប៉ាឡេស្ទីន។
ជាមួយគ្នានេះ សហភាពអឹរ៉ុបបានប្តេជ្ញាថា ខ្លួននឹងបន្តខិតខំទប់ស្កាត់ និងលុបបំបាត់អំពើទារុណកម្ម នៅទូទាំងសកលលោកទាំងមូល និងស្វែងរកដំណោះស្រាយ ចំពោះការឈឺចាប់ ដែលទទួលរងដោយជនរងគ្រោះនៃអំពើទារុណកម្ម៕
Tag:
EU
សហភាពអឺរ៉ុប
សិទ្ធិមនុស្ស
Federica Mogherini
© រក្សាសិទ្ធិដោយ thmeythmey.com