កូរ៉េខាងត្បូងទាញអាល្លឺម៉ង់ឲ្យធ្លាក់តាមខ្លួន ខណៈស៊ុយអែត និងម៉ិកស៊ិក ឡើងទៅវគ្គ១៦ក្រុម

កីឡាអន្តរជាតិ

អន្តរជាតិ

កូរ៉េខាងត្បូងទាញអាល្លឺម៉ង់ឲ្យធ្លាក់តាមខ្លួន ខណៈស៊ុយអែត និងម៉ិកស៊ិក ឡើងទៅវគ្គ១៦ក្រុម

27, Jun 2018 , 11:17 pm

រូបភាព

ដោយ: រំដួល ចិត្រា (Romdoul Chetra)

ម្ចាស់ការពារតំណែងជើងឯកអាល្លឺម៉ង់ បានធ្លាក់ចេញពីព្រឹត្តិការណ៍ FIFA World Cup 2018 ក្រោយចាញ់កូរ៉េខាងត្បូង ២-០ នៅនាទីបន្ថែមទាំងពីរគ្រាប់ នាជំនួបចុងក្រោយពូល F ស្របពេលដែលស៊ុយអែត និងម៉ិកស៊ិកឡើងទៅវគ្គបន្ត តែស៊ុយអែតបានលេខ១ក្នុងពូលជាមួយនឹងជ័យជម្នះ ៣-០ ។

ការប្រកួត៩០នាទីពេញ មិនមានគ្រាប់បាល់ស៊ុតបញ្ចូលទីឡើយ។ ប៉ុន្តែម្ចាស់ជើងឯក៤ជំនាន់អាល្លឺម៉ង់ រងនូវការខកក្រោយជំនួយការវីដេអូ សម្រេចថា ការស៊ុតបាល់បញ្ចូលទីរបស់ Kim Young-Gwon នៅនាទី៩០+២ គឺជាគ្រាប់បានការ ហើយឈាននាទី៩០+៦ ខ្សែប្រយុទ្ធឆ្នើម Son Heung-Min បន្ថែមគ្រាប់បាល់បញ្ចូលទី១ទៀត។

នេះជាលើកដំបូងបំផុតសម្រាប់ក្រុមអាល្លឺម៉ង់ ឬអាល្លឺម៉ង់ខាងលិច បើគិតចាប់តាំងពីឆ្នាំ១៩៣៨មក ដែលមិនមានឱកាសឈានទៅវគ្គបន្តក្នុងព្រឹត្តិការណ៍ World Cup។ វាជាកំណត់ត្រាដ៏អាក្រក់មួយ សម្រាប់ក្រុមដែលមានចំណាត់ថ្នាក់ FIFA Rankings ខ្ពស់ តែបែរជាបញ្ចប់ចំណាត់ថ្នាក់បាតតារាងក្នុងពូល F។

សម្រាប់ជំនួបមួយគូទៀត ស៊ុយអែត ក្លាយជាក្រុមលេខមួយក្នុងពូល តាមរយៈជ័យជម្នះ ៣-០ លើម៉ិកស៊ិក។ គ្រាប់បាល់បញ្ចូលទីកើតឡើងនៅតង់ទីពីរ ដែលរកបានដោយ Ludwig Augustinsson ការទាត់ប៉េណាល់ទីរបស់ Andreas Granqvist និងគ្រាប់ចូលទីខ្លួនឯងរបស់ Edson Alvarez។

ស៊ុយអែតឈរលើកំពូលតារាងដោយមាន៦ពិន្ទុស្មើម៉ិកស៊ិក ប៉ុន្តែមានប្រៀបលើចំនួនគ្រាប់បាល់បញ្ចូលទី ដូចគ្នាទៅនឹងកូរ៉េខាងត្បូង ដែលត្រឡប់ទៅផ្ទះវិញជាមួយនឹងចំណាត់ថ្នាក់លេខ៣ ក្រោយជ័យជម្នះជាកំណត់ត្រាលើអាល្លឺម៉ង់៕