កីឡាជាតិ
ជាតិ
ទិត្យ ឌីណា ចាកចេញពីក្លិបនគរបាលជាតិ ទៅចូលរួមជាមួយវិសាខា កីឡាករ ទិត្យ ឌីណា បង្ហាញស្លាកក្លិបវិសាខាក្រោយចុះកិច្ចសន្យារួម, រូបភាពពីហ្វេសប៊ុកក្លិបបាល់ទាត់វិសាខា
× ខ្សែបម្រើឆ្នើមរបស់ក្រុមអគ្គស្នងការនគរបាលជាតិ និងជម្រើសជាតិ កីឡាករ ទិត្យ ឌីណា បានសម្រេចចាកចេញពីក្លិប ដែលខ្លួនធ្លាប់ចំណាយពេលជាង១០ឆ្នាំ ទៅរួមរស់ជាមួយក្រុមចំណូលថ្មីវិសាខា។ វត្តមានរបស់របស់ខ្សែបម្រើរូបនេះ នឹងជួយឲ្យតំបន់កណ្តាលរបស់វិសាខាកាន់តែល្អប្រសើរ សម្រាប់ការប្រកួតជើងទី២នៃពានរង្វាន់បាល់ទាត់ក្របខណ្ឌកំពូលកម្ពុជាឆ្នាំ២០១៨។
ខ្សែបម្រើឆ្នើម ទិត្យ ឌីណា បានចុះកិច្ចសន្យាលេងឲ្យក្លិបចំណូលថ្មីវិសាខា សម្រាប់ការប្រកួតជើងទី២ពានរង្វាន់លីគកំពូលកម្ពុជារដូវកាលឆ្នាំ២០១៨ ដែលចាប់ផ្តើមប្រកួតនៅសប្តាហ៍នេះ។ កីឡាករ ទិត្យ ឌីណា បានចំណាយពេលជាង១០ឆ្នាំជាមួយក្រុមអគ្គស្នងការនគរបាលជាតិ ពោលគឺតាំងពីឆ្នាំ២០០៨។ មិនត្រឹមតែជាខ្សែបម្រើឆ្នើមក្នុងក្រុមអគ្គស្នងការនគរបាលជាតិនោះទេ ឌីណា ក៏ជាខ្សែបម្រើល្អមួយរូបក្នុងក្រុមជម្រើសជាតិផងដែរ។
ក្រោយរួមរស់ជាមួយក្រុមអគ្គស្នងការនគរបាលជាតិប្រមាណជា៣ឆ្នាំ កីឡាករ ទិត្យ ឌីណា បានក្លាយជាសមាជិក១រូបក្នុងក្រុមជម្រើសជាតិលើកដំបូងនាអំឡុងឆ្នាំ២០១១។ ដោយសារមានសមត្ថភាពល្អ ឌីណា ត្រូវបានគ្រូបង្វឹកផ្តល់ឱកាសឲ្យជាប់ជម្រើសជាតិជាបន្តបន្ទាប់។ ប៉ុន្តែមួយរយៈចុងក្រោយនេះ រូបគេ បានបាត់កៅអីក្នុងក្រុមជម្រើសជាតិ ដោយសារជាប់រវល់ជាមួយការងារក្នុងក្របខណ្ឌប៉ូលិស។
ការចូលរួមរបស់ ទិត្យ ឌីណា នឹងធ្វើឲ្យតំបន់កណ្តាលរបស់វិសាខាកាន់តែរឹងមាំនិងល្អប្រសើរថែមទៀត។ បច្ចុប្បន្នវិសាខាឈរលេខរៀងទី៣មាន២៣ពិន្ទុ ក្រោមក្រុមកំពូលតារាងបឹងកេត៤ពិន្ទុ និងក្រុមលេខ២ណាហ្គាវើល២ពិន្ទុ។ ក្រុមវិសាខាត្រូវជួបប្រកួតបើកឆាកជើងទី២ជាមួយក្រុមអគ្គសនីកម្ពុជា នៅថ្ងៃអាទិត្យ ទី១ ខែកក្កដា ឆ្នាំ២០១៨ នៅកីឡដ្ឋានអគ្គិសនីកម្ពុជា៕
Tag:
ទិត្យ ឌីណា
Cambodian League 2018
វិសាខា
© រក្សាសិទ្ធិដោយ thmeythmey.com