កីឡាជាតិ
ជាតិ
បឹងកេតនាំចូលខ្សែប្រយុទ្ធ កែវ វណ្ណៈ និងអតីតអ្នកចាំទីណាហ្គាវើល យូក អះអារី និងបន្តកិច្ចសន្យាកីឡាករមួយចំនួន ពិឆ្វេងទៅស្តាំ, កីឡាករ កែវ វណ្ណៈ និង យូក អះអារី
× នៅថ្ងៃទី២៨ ខែមិថុនា ឆ្នាំ២០១៨នេះ បឹងកេតបាននាំចូលកីឡាករថ្មីចំនួនពីររូបរួមមានអតីតអ្នកចាំទីដៃទី២របស់ណាហ្គាវើល យូក អះអារី និងអតីតខ្សែប្រយុទ្ធរបស់ក្រសួងការពារជាតិ កែវ វណ្ណៈ។ ជាមួយគ្នានេះ បឹងកេតបានបន្តសុពលភាពកិច្ចសន្យាជាមួយកីឡាករមួយចំនួនផងដែរ។
ក្រោយការចាកចេញរបស់អ្នកចាំទីដៃទី១ ស៊ូ យ៉ាទី ទៅកាន់ក្លិបណាហ្គាវើល បឹងកេតបានចុះកិច្ចសន្យានាំចូលអតីតអ្នកចាំទីដៃទី២របស់ណាហ្គាវើល យូក អះអារី ដើម្បីបំពេញកូតាអ្នកចាំទី សម្រាប់ការប្រកួតជើងទី២នៃពានរង្វាន់បាល់ទាត់ក្របខណ្ឌកំពូលកម្ពុជារដូវកាលឆ្នាំ២០១៨។ បឹងកេតក៏បានចុះកិច្ចសន្យាជាមួយខ្សែប្រយុទ្ធ កែវ វណ្ណៈ អតីតកីឡាករក្រសួងការពារជាតិផងដែរ។ នេះបើយោងតាមទំព័រហ្វេសប៊ុកក្លិបបឹងកេត ដែលមិនបានបញ្ជាក់ពីសុពលភាពនៃកិច្ចសន្យានៅថ្ងៃទី២៨ ខែមិថុនា ឆ្នាំ២០១៨។
ពីឆ្វេងទៅស្តាំ, លី វ៉ាហេទ, ស្លេះ ស៊េន និង លី មីហ្សាន, រូបភាពពីហ្វេសប៊ុកក្លិបបឹងកេត
ទន្ទឹមនឹងនាំចូលកីឡាករថ្មី ក្លិបការពារតំណែងជើងឯកមួយនេះ បានបន្តសុពលភាពកិច្ចសន្យាជាមួយកីឡាករមួយចំនួនផងដែរ រួមមានអ្នកចាំទី គីម មករា, អំ ចាន់នូ, ខ្សែការពារ ពុំ បារាំង, លី វ៉ាហេទ, ស្លេះ ស៊េន និងខ្សែបម្រើ លី មីហ្សាន។ ក្នុងនោះខ្សែការពារ លី វ៉ាហេទ, ស្លេះ ស៊េន និងកីឡាករ លី មីហ្សាន បន្តកិច្ចសន្យារហូតបំណាច់ឆ្នាំ២០២០។ ក្រៅពីនេះ ក្លិបបឹងកេតមិនបានបញ្ជាក់ពីរយៈពេលនៃកិច្ចសន្យាឡើយ៕
Tag:
Cambodian League 2018
យូក អះអារី
បឹងកេត
កែវ វណ្ណៈ
© រក្សាសិទ្ធិដោយ thmeythmey.com