ព្រឹត្តិការណ៍ប្រកួតកីឡាបាល់ទាត់ដណ្តើមពានរង្វាន់ពិភពលោក FIFA World Cup 2018 ឈានដល់វគ្គ១៦ក្រុមចុងក្រោយនារាត្រីថ្ងៃសៅរ៍នេះ ដោយបារាំង (លេខ១ពូល G) តទល់ជាមួយជើងឯករង អាហ្សង់ទីន (លេខ២ពូល D) មុន អ៊ុយរូហ្គាយ (លេខ១ពូល A) ប៉ះ ព័រទុយហ្គាល់ (លេខ២ពូល B)។
បារាំង ជួប អាហ្សង់ទីន ម៉ោង៩ល្ងាចនៅកីឡដ្ឋាន Kazan Arena
បារាំង និងអាហ្សង់ទីន ធ្លាប់ជួបគ្នា១១លើក ដោយអាហ្សង់ទីនឈ្នះ៦លើក បារាំងឈ្នះ២លើក និងស្មើគ្នា៣លើក។ ក្នុងចំណោមនោះ អាហ្សង់ទីឈ្នះទាំងពីរនាជំនួបក្នុង World Cup នៅឆ្នាំ១៩៣០ និងឆ្នាំ១៩៧៨។កាលពី៤ឆ្នាំមុន បារាំង បានចាញ់អាល្លឺម៉ង់ ១-០ នៅវគ្គ១/៤ផ្តាច់ព្រ័ត្រ ហើយអាហ្សង់ទីន បានចាញ់ក្រុមដដែលនេះ នៅវគ្គផ្តាច់ព្រ័ត្រ ក្នុងលទ្ធផល ១-០ ដូចគ្នា ដោយការប្រកួតបានឈានទៅដល់ម៉ោងបន្ថែម។
កីឡាករដែលអាចស្ថិតក្នុងជម្រើសដំបូង៖
-បារាំង: Hugo Lloris; Benjamin Pavard, Raphael Varane, Samuel Umtiti, Lucas Hernandez; Paul Pogba, N’Golo Kante; Kylian Mbappe, Antoine Griezmann, Ousmane Dembele; Olivier Giroud
-អាហ្សង់ទីន: Franco Armani; Gabriel Mercado, Nicolas Otamendi, Marcos Rojo, Nicolas Tagliafico; Ever Banega, Javier Mascherano, Enzo Perez, Angel Di Maria; Lionel Messi, Gonzalo Higuain។
អ៊ុយរូហ្គាយ ជួប ព័រទុយហ្គាល់ ម៉ោង១អធ្រាត្រនៅកីឡដ្ឋាន Fisht Stadium
នេះទើបតែជាលើកទីពីរប៉ុណ្ណោះសម្រាប់អ៊ុយរូហ្គាយដែលប៉ះជាមួយក្រុមអឺរ៉ុបនៅវគ្គ១៦ក្រុមចុងក្រោយក្នុងព្រឹត្តិការណ៍ World Cup។លើកដំបូងកាលពីឆ្នាំ១៩៩០ ពួកគេបានចាញ់ម្ចាស់ផ្ទះអ៊ីតាលី ២-០។ កាលពី៤ឆ្នាំមុន អ៊ុយរូហ្គាយ បានធ្លាក់នៅវគ្គនេះ ដោយចាញ់កូឡុំប៊ី ២-០ រីឯព័រទុយហ្គាល់ ធ្លាក់តាំងពីវគ្គជម្រុះតាមពូល។ ក្រុមទាំងពីរមិនដែលមានប្រវត្តិជួបគ្នានៅ World Cup នោះឡើយ ប៉ុន្តែធ្លាប់ប៉ះគ្នាក្នុងជំនួបមិត្តភាព២លើក ដោយព័រទុយហ្គាល់ឈ្នះ ៣-០ នៅឆ្នាំ១៩៦៦ ហើយស្មើគ្នា ១-១ នៅឆ្នាំ១៩៧២។
កីឡាករដែលអាចស្ថិតក្នុងជម្រើសដំបូង៖
-អ៊ុយរូហ្គាយ: Fernando Muslera; Martin Caceres, Jose Maria Gimenez, Diego Godin, Diego Laxalt; Nahitan Nandez, Matias Vecino, Lucas Torreira, Rodrigo Bentancur; Luis Suarez and Edinson Cavani.
-ព័រទុយហ្គាល់: Rui Patricio; Cedric, Pepe, Jose Fonte, Raphael Guerreiro, William; Adrien Silva, Ricardo Quaresma, Joao Mario; Goncalo Guedes, Cristiano Ronaldo៕