កីឡាជាតិ
ជាតិ
ប្រវត្តិសាស្ត្រ! កីឡាការិនីកម្ពុជាស៊ីទីម័រខាងកើត ១២-០ នៅថ្ងៃបើកឆាកពាន AFF
× ក្រុមកីឡាការិនីជម្រើសជាតិកម្ពុជា បានបើកឆាកព្រឹត្តិការណ៍ AFF WOMEN'S CHAMPIONSHIP 2018 ជាមួយនឹងជ័យជម្នះ ១២-០ លើទីម័រខាងកើត ដែលរៀបចំនៅកីឡដ្ឋាន Bumi Sriwijaya ក្រុង Palembang ប្រទេសឥណ្ឌូណេស៊ី នាល្ងាចថ្ងៃសៅរ៍ ទី៣០ ខែមិថុនា នេះ។
នៅតង់ទីមួយ ក្រុមកីឡាការិនីកម្ពុជាដែលដឹកនាំដោយលោក មាស សំអឿន បាននាំមុខ ៧-០ ដែលសម្រេចបានដោយ ហួត គឹមហុង ៤គ្រាប់ (នាទី៩, ២០, ២៦, ៣៩) និង បាន ជាវៃ ៣ គ្រាប់ (នាទី១២, ៣៧, ៤៥+១) ។
ឈានដល់តង់ទីពីរ កម្ពុជារកបាន៥គ្រាប់បន្ថែមទៀត ដែលសម្រេចបានដោយ ហួត គឹមហុង (នាទី៥៨, ៦៤) ពឿន គន្ធា (នាទី៦១), នន មិនា (នាទី៦២), ចាយ ស្រីលាប (នាទី៦៩)។
សរុបក្នុងការប្រកួតទាំងមូល ហួត គឹមហុង រកបានតែម្នាក់ឯង៦គ្រាប់ បាន ជាវៃ ៣គ្រាប់ ពឿន គន្ធា, នន មិនា និងចាយ ស្រីលាប បន្ថែមបានម្នាក់១គ្រាប់។
សម្រាប់ជំនួបពូល A នេះកម្ពុជា ត្រូវប៉ះជាមួយម៉ាឡេស៊ី នៅថ្ងៃទី២ ខែកក្កដា មុននឹងជួប ថៃ អូស្ត្រាលី ជាបន្តបន្ទាប់។ អូស្ត្រាលី ដែលប្រើប្រាស់ឈុត U-20 បានយកឈ្នះម៉ាឡេស៊ី រហូតដល់ទៅ ៧-០ នាជំនួបបើកឆាក៕
© រក្សាសិទ្ធិដោយ thmeythmey.com