ជាតិ
បទយកការណ៍ / បទសម្ភាសន៍
អ្នកជំនាញ ពន្យល់មូលហេតុដែលពលរដ្ឋខ្មែរមានជំនឿ ដាក់ក្បាលដំណេកទៅទិសខាងកើតនិងខាងត្បូង
× ភ្នំពេញ៖ ទំនៀមទម្លាប់ខ្មែរតាំងពីបុរាណ ចំណាំសម្រាន្តដាក់ក្បាលដំណេកទៅទិសខាងកើតនិងទិសត្បូង ព្រោះខ្មែរកំណត់ថាទិសនេះតំណាងឲ្យអ្នកមានគុណ មានម្ដាយឪពុក និងគ្រូឧបជ្ឈាយ៍ជាដើម។ បើតាមអ្នកជំនាញផ្នែកទំនៀមទម្លាប់ និងសាសនាលើកឡើងថា ខ្មែរកំណត់តំណាងទិសទាំងបួន ដោយយកតាមសាសនាជី(ជំនឿលើព្រលឹងដូនតា)សាសនាព្រះពុទ្ធ និងសាសនាព្រាហ្មញ្ញ។
លោក សេង សុមុនី អនុរដ្ឋលេខាធិការ និងជាអ្នកនាំពាក្យក្រសួងធម្មការនិងសាសនា បានពន្យល់ថា ខ្មែរមានទំនៀមដាក់ក្បាលដំណេកទៅទិសខាងកើតនិងខាងត្បូង ដោយជឿលើជំនឿដូនតាដើម តាមព្រហ្មញ្ញសាសនា និងព្រះពុទ្ធសាសនា។ លោកថាខ្មែរនិយមដាក់ក្បាលទៅទិសខាងកើតនិងខាងត្បូង ហើយទិសខាងលិច និងខាងជើងខ្មែរមិននិយមដាក់ក្បាលដំណេកទៅឡើយ។ លោក សេង សុមុនី បញ្ជាក់៖«រឿងដាក់ក្បាលដំណេកនេះ បើតាមព្រះពុទ្ធសាសនា ទិសខាងកើតជាទិសម្ដាយឪពុក ទិសខាងត្បូងជាទិសគ្រូឧបជ្ឈាយ៍ ដូច្នេះទើបខ្មែរដាក់ក្បាលទៅទិសទាំងនោះ ហើយទិសពីរទៀតគេមិនដាក់ឡើយ»។
ចំណែកលោក វ៉ាយ វិបុល ទីប្រឹក្សាក្រសួងធម្មការ និងសាសនា បានពន្យល់និយមន័យពាក្យ«ត្បូង» ដែលមានន័យថាក្បាល ដូច្នេះបានជាគេដាក់ក្បាលដំណេកទៅទិសនេះ ហើយគេងបែរមុខមកទិសខាងកើត ទើបនាំរឿងល្អៗសម្រាប់ខ្លួន។ តាមសាសនាព្រះពុទ្ធទិសខាងកើតជាទិសម្ដាយឪពុក ទិសខាងត្បូងជាទិសគ្រូឧបជ្ឈយ៍ ទិសខាងលិចជាទិសញាតិ និងទិសខាងជើងជាទិសបងប្អូន។
ទីប្រឹក្សាក្រសួងធម្មការ និងសាសនា និងជាសមាជិកគណៈកម្មការស្រាវជ្រាវវិជ្ជាហោរាសាស្ត្រ និងទំនៀមទម្លាប់ខ្មែរ នៃគណៈកម្មាធិការជាតិរៀបចំបុណ្យជាតិ និងអន្តរជាតិរូបនេះ បានបញ្ជាក់ថា ៖« គេមិនដែលដាក់ក្បាលទៅទិសខាងលិចនិងខាងជើងទេ ព្រោះបើធ្វើបែបនេះជើងប្រាកដជាដាក់ទៅទិសអ្នកមានគុណនិងគ្រូឧបជ្ឈាយ៍ហើយ វាបង្ហាញការមិនគោរព។ ទិសខាងលិចជាទិសអពមង្គល គេប្រៀបទៅនិងដំណើរព្រះអាទិត្យលិច។ ចំណែកទិសខាងជើងជាទិសកូនចៅ វាក៏ស្មើរនឹងជើងរបស់មនុស្សយើងដែរ គេមិនដាក់ក្បាលទៅឡើយ»។
រីឯលោក ញ៉ឹក សុខហេង អាចារ្យមង្គល បានលើកឡើងថា ពីដើមខ្មែរមានសាសនាជី(សាសនាដែលជឿលើព្រលឹងជីដូនជីតា)ផ្ទាល់ខ្លួនមួយ មុនសាសនាព្រាហ្មណ៍ និងសាសនាព្រះពុទ្ធមានឥទ្ធិពលលើ។ បើតាមលោក ញឹក សុខហេង ខ្មែរមានជំនឿថា ក្រោយពីមនុស្សស្លាប់ទៅ និងទៅកើតជាព្រលឹង ហើយព្រលឹងនោះនឹងនៅមើលថែរក្សាកូនចៅជំនាន់ក្រោយ។ សម្រាប់ទិសខាងកើតជាទិសព្រះអាទិត្យរះ ខ្មែរប្រៀបទៅនឹងការចាប់កំណើត ដូច្នេះហើយសាសនាជី ដែលជាសាសនាគោរពព្រលឹងដូនតា បានជ្រើសយកទិសខាងកើតជាតំណាងទិសម្ដាយឪពុក។
លោក ញ៉ឹក សុខហេង បញ្ជាក់៖ « តាមទំនៀមទម្លាប់ពីដើមខ្មែរគោរពព្រលឹង ដូច្នេះពេលដាក់ក្បាលទៅទិសខាងកើតទើបដូនតាថែរក្សាបាន។ រយៈកាលយូរណាស់ហើយ គេពិបាកបែងចែកជំនឿដូនតាជាមួយសាសនាព្រាហ្មណ៍ ថាផ្នែកណាមួយឲ្យច្បាស់ណាស់ តែការប្រកាន់ដំណេកនេះពិតជាមានឥទ្ធិពលពីសាសនាទាំងបីយ៉ាងប្រាកដ»៕
Tag:
ទំនៀមទម្លាប់
ជំនឿ
សាសនា
© រក្សាសិទ្ធិដោយ thmeythmey.com