កីឡាអន្តរជាតិ
អន្តរជាតិ
ក្រូអាស៊ីទៅជួបម្ចាស់ផ្ទះរុស្ស៊ី ក្រោយទម្លាក់ដាណឺម៉ាកដោយបាល់ប៉េណាល់ទី ពលរដ្ឋក្រូអាស៊ី នៅក្រុង Zagreb អបអរជ័យជម្នះក្រុមខ្លួនលើដាណឺម៉ាក។ រូបថត AFP
× ក្រូអាស៊ី បានឈានទៅវគ្គ១/៤ផ្តាច់ព្រ័ត្រនៃព្រឹត្តិការណ៍ FIFA World Cup 2018 ដោយសារឈ្នះដាណឺម៉ាក ក្នុងការប្រកួតដែលសម្រេចដោយបាល់ប៉េណាល់ទីកាត់សេចក្តី។ ជំនួបនៅលើទីលាន Nizhny Novgorod Stadium បញ្ចប់ក្នុងលទ្ធផលស្មើ ១-១ ក្រោយដំណើរការអស់១២០នាទី ទីបំផុតក្រូអាស៊ី ជាអ្នកកក់កៅអីទៅវគ្គបន្តជាមួយនឹងលទ្ធផល ៣-២ នៃការទាត់បាល់ប៉េណាល់ទី។
ការស៊ីសងគ្នា ១-១ កើតឡើងតែក្នុងអំឡុង៤នាទីដំបូងប៉ុណ្ណោះ។ កែបាល់ចាប់ផ្តើមការប្រកួតភ្លាម ពោលគឺមិនដល់១នាទីស្រួលបួលផង Mithias Joergensen រកបានគ្រាប់បាល់នាំមុខសម្រាប់ដាណឺម៉ាក ហើយ៣នាទីក្រោយមក Mario Mandzukic វាយបកតាមស្មើវិញ។
លទ្ធផលត្រូវបានរក្សារហូតដល់៩០នាទី។ ឈានដល់នាទី១១៥ Mithias Joergensen បានធ្វើឲ្យ Ante Rebic ដួលក្នុងប្រអប់គ្រោះថ្នាក់ ប៉ុន្តែឱកាសស៊ុតបាល់ប៉េណាល់ទីរបស់ Luka Modric ដើម្បីនាំមុខ ២-១ សម្រាប់ក្រូអាស៊ី ត្រូវបានរារាំងដោយអ្នកចាំទីដាណឺម៉ាក Kasper Schmeichel។
ឈានដល់ការទាត់បាល់ប៉េណាល់ទីកំណត់ឈ្នះ-ចាញ់ ក្រូអាស៊ី ឈ្នះ ៣-២ ដោយ Andrej Kramaric, Luka Modric និង Ivan Rakitic ធ្វើបានសម្រេចសម្រាប់ក្រូអាស៊ី បើទោះបីជា Milan Badelj និង Josip Pivaric ធ្វើមិនសម្រេចក៏ដោយ។ សម្រាប់ដាណឺម៉ាក មានតែ Simon Kjaer និង Michael Krohn-Dehli ប៉ុណ្ណោះដែលសម្រេចផល ខណៈ Christian Eriksen, Lasse Schoene និង Nicolai Joergensen រងនូវការខកចិត្ត។
ជ័យជម្នះក្នុងជំនួបដ៏តឹងតែងនេះ នាំឲ្យក្រូអាស៊ី ឡើងទៅជួបម្ចាស់ផ្ទះរុស្ស៊ី នៅវគ្គ៨ក្រុមចុងក្រោយ។ រុស្ស៊ី ក៏ទទួលបានកៅអីដោយសារការឈ្នះគ្រាប់បាល់ប៉េណាល់ទីលើអេស្ប៉ាញផងដែរ៕
© រក្សាសិទ្ធិដោយ thmeythmey.com