អន្តរជាតិ
មេបាតុកម្មថៃលោក ស៊ូថេប ប្រកាសចូលនយោបាយជាថ្មី និងត្រៀមគាំទ្រលោក ប្រាយុទ្ធ
× អ្នកនយោបាយចាស់វស្សា និងជាអ្នកគាំទ្ររាជ្យបល្ល័ង្គ ស៊ូថេប ថងស៊ូបាន (Suthep Thaugsuban) បានបង្ហាញមុខជាថ្មីទៀតហើយក្នុងឆាកនយោបាយថៃ។ ចូលឆាកនយោបាយលើកនេះ លោក ស៊ូថេប បង្កើតបក្សនយោបាយថ្មីមួយដើម្បីគាំទ្រលោក ប្រាយុទ្ធ ចន្ទអូចាជានាយករដ្ឋមន្ត្រីរដ្ឋាភិបាលស៊ីវិលផង។
ក្រោយបញ្ចប់អាជីពនយោបាយ និងសាងផ្នួសនៅឆ្នាំ ២០១៥ លោក ស៊ូថេប មេដឹកនាំបាតុកម្មថៃដ៏មានឥទ្ធិពលបានបង្ហាញមុខជាថ្មីដោយលោកប្រកាសថា លោកត្រឡប់ចូលឆាកនយោបាយថៃវិញហើយនៅពេលនេះ។
បើតាមការចុះផ្សាយរបស់ទីភ្នាក់ងារព័ត៌មាន Reuters ស៊ូថេប អ្នកនយោបាយវ័យ ៦៨ឆ្នាំបានអះអាងថា លោកនឹងចូលរួមប្រកួតប្រជែងក្នុងការបោះឆ្នោតដែលនឹងត្រូវរៀបចំឡើងចន្លោះពីខែកុម្ភៈដល់ខែឧសភាឆ្នាំក្រោយ។ គណបក្សនយោបាយថ្មីមួយត្រូវបង្កើតឡើងដែលជួយឃោសនារកសំឡេងគាំទ្រឲ្យរបបសឹកបច្ចុប្បន្នដែលមានលោក ប្រាយុទ្ធ ជាមេដឹកនាំផង។
បក្សថ្មីដែលលោក ស៊ូថេប ដឹកនេះមានឈ្មោះថា សម្ព័ន្ធសកម្មភាពដើម្បីប្រទេសថៃ (Action Coalition for Thailand)។ បក្សនេះទើបតែត្រូវបានបង្កើតឡើងនៅក្នុងខែឧសភាឆ្នាំ ២០១៨ នេះប៉ុណ្ណោះ ហើយបក្សនេះរំពឹងទទួលបានការគាំទ្រពីសត្រូវបក្សភឿថៃ និងប្រជាជនវណ្ណៈកណ្តាលនៅក្រុងបាងកកដូចគ្នា។
លោក ស៊ូថេប និយាយបែបនេះ៖« លោកប្រាយុទ្ធ ជាមនុស្សល្អ មិនពុករលួយ ប្រឹងប្រែង ហើយគាត់ក៏ទទួលបានការជឿទុកចិត្តពីប្រជាជន និងស្មោះត្រង់នឹងរាជបល្ល័ង្គទៀតផង។ ដូច្នេះហើយ ខ្ញុំលើកទឹកចិត្តគាត់ បើគាត់ជោគជ័យច្រើន ប្រទេសយើងក៏ប្រសើរដែរ»។
ក្រៅពីសរសើរលោក ប្រាយុទ្ធ ស៊ូថេប បានះអាងច្បាស់ថា លោកគ្មានមហិច្ឆតាចង់បានតំណែងណាមួយក្នុងរដ្ឋាភិបាលថ្មីឡើយ បើសិនជាបក្សលោកជាប់ឆ្នោតនោះ។
តាមពិតទៅការត្រឡប់ចូលនយោបាយ និងចូលប្រកួតដើម្បីរបបសឹករបស់អ្នកនយោបាយចាស់វស្សារូបនេះជាជំនួយធំបំផុតសម្រាប់លោក ប្រាយុទ្ធ ដែលកំពុងសំឡឹងឃើញតំណែងនាយករដ្ឋមន្ត្រីនៃរដ្ឋាភិបាលស៊ីវិលនោះ។
ទាំងលោក ស៊ូថេប និងរបបសឹកថៃបច្ចុប្បន្នមានគោលដៅតែមួយ គឺធ្វើយ៉ាងណាជម្រះកម្អែលនិងឥទ្ធិពលរបស់គ្រួសារត្រកូលស៊ីណាវ៉ាត់ឲ្យអស់ពីសង្គមថៃ ហើយការចាប់ដៃគ្នានេះនឹងជួយទាញសន្លឹកឆ្នោតបានក្រាស់ក្រែលផងក៏មិនដឹង។
សូមរម្លឹកបន្តិចថា លោក ស៊ូថេប ធ្លាប់ធ្វើជាឧបនាយករដ្ឋមន្ត្រីនៃរដ្ឋាភិបាលដឹកនាំក្រោយរដ្ឋប្រហារទម្លាក់លោក ថាក់ស៊ីន ស៊ីណាវ៉ាត់ ឆ្នាំ ២០០៦។ លោកក៏ជាមនុស្សសំខាន់ដែលទទួលខុសត្រូវលើការបង្ក្រាបយ៉ាងសាហាវឃោឃៅលើចលនាបាតុកម្មក្រុមអាវក្រហមគាំទ្រលោក ថាក់ស៊ីន នៅក្នុងឆ្នាំ ២០១០ផងដែរ។ នៅក្នុងឆ្នាំ ២០១១ ទៀតលោក ស៊ូថេប លេចមុខទៀតដោយដឹកនាំចលនាបាតុកម្មប្រឆាំងរបបដឹកនាំរបស់លោកស្រី យីងឡាក់ ស៊ីណាវ៉ាត់ និងបង្កភាពចលាចលនៅក្នុងប្រទេសរហូតមានរដ្ឋប្រហារយោធាដឹកនាំដោយលោក ប្រយុទ្ធក្នុងឆ្នាំ ២០១៤ នេះទៀតផង៕
Tag:
ប្រាយុទ្ធ ចន្ទអូចា
ស៊ូថេប ថងស៊ូបាន
ថៃ
© រក្សាសិទ្ធិដោយ thmeythmey.com