ជាតិ
បោះឆ្នោត
សម្តេច ហ៊ុន សែន៖ គ្មានអ្នកណា អាចឈ្នះខ្ញុំបានទេ ក្នុងកាលៈទេសៈនេះ រូបពីហ្វេសបុកសម្តេច ហ៊ុន សែន
× សម្តេចនាយករដ្ឋមន្ត្រី ហ៊ុន សែន មិនទាន់សម្លឹងឃើញគណបក្សណាមួយ ដែលអាចក្លាយជាគូប្រកួតជាមួយគណបក្សប្រជាជនកម្ពុជា សម្រាប់ការបោះឆ្នោតក្នុងអាណតិ្តនេះ នោះទេ។ ប្រធានគណបក្សកាន់អំណាចរូបនេះ សង្ឃឹមយ៉ាងខ្លាំងថា នឹងឈ្នះការបោះឆ្នោត ហើយបានដឹកនាំប្រទេសបន្តទៀត។
ក្នុងពិធីជួបសំណេះសំណាលជាមួយកម្មករ-កម្មការិនី នៅព្រឹកថ្ងៃទី៤ ខែកក្កដា ឆ្នាំ២០១៨នេះ ប្រមុខរដ្ឋាភិបាលកម្ពុជា បាននិយាយទាំងទឹកមុខរីករាយ យ៉ាងដូច្នេះថា៖«ពូ មិនជឿថា មានគណបក្សណា ដែលប្រជែងយកឈ្នះគណបក្សប្រជាជន អាចយកឈ្នះពូនៅក្នុងកាលៈទេសៈនេះបានទេ ព្រោះប្រជាជនត្រូវការសន្តិភាព ត្រូវការអភិវឌ្ឍ ត្រូវការ ហ៊ុនសែន រួមជាដំណើរមួយតទៅទៀត»។
ការបោះឆ្នោតលើកនេះ មានគណបក្ស២០ ដែលត្រូវចូលរួមប្រកួតប្រជែងយកអាសនៈរដ្ឋសភា នៅថ្ងៃទី២៩ ខែកក្កដា ឆ្នាំ២០១៨។ គណបក្សសង្គ្រោះជាតិ ដែលជាគណបក្សប្រឆាំងធំជាងគេ និងដៃគូប្រកួតរបស់គណបក្សប្រជាជនកម្ពុជា ត្រូវបានរំលាយចោល ហើយមិនបានចូលរួមក្នុងការបោះឆ្នោតឡើយ។
សហគមន៍អន្តរជាតិមួយចំនួន នៅតែជំរុញរដ្ឋាភិបាលកម្ពុជា ឲ្យដោះលែងលោក កឹម សុខា អតីតប្រធានគណបក្សសង្គ្រោះជាតិ និងអនុញ្ញាតឲ្យគណបក្សរបស់លោក ធ្វើសកម្មភាពឡើងវិញ ដើម្បីបានចូលរួមក្នុងការបោះឆ្នោត។ បណ្តាប្រទេសទាំងនោះ យល់ថា ការបោះឆ្នោត នឹងមិនមានលក្ខណៈប្រជាធិបតេយ្យឡើយ បើគ្មានគណបក្សប្រឆាំង។
ឯលោក សម រង្ស៊ី និងក្រុមអ្នកប្រឆាំងនៅក្រៅប្រទេស នៅតែអំពាវនាវកុំឲ្យប្រជាពលរដ្ឋ ទៅបោះឆ្នោត។ ពួកគេប្រឹងឃោសនាថា ការបោះឆ្នោតលើកនេះ គឺជាការបោះឆ្នោតក្លែងក្លាយ ហើយសហគមន៍អន្តរជាតិ នឹងមិនទទួលស្គាល់នោះទេ៕
Tag:
បោះឆ្នោត
ហ៊ុន សែន
កម្មករ
សម រង្សី
© រក្សាសិទ្ធិដោយ thmeythmey.com