ជាតិ
បោះឆ្នោត
លោក ហង្ស ពុទ្ធា អ្នកនាំពាក្យគ.ជ.ប.
×![]()
ដោយ: សារព័ត៌មានថ្មីៗ
គណៈកម្មាធិការជាតិរៀបចំការបោះឆ្នោត (គ.ជ.ប. ) បានជួលឧទ្ធម្ភាគចក្រពីរ ពីក្រុមហ៊ុនឯកជន ដើម្បីយកទៅប្រើប្រាស់រយៈពេលខ្លី នៅមុខនិងក្រោយថ្ងៃបោះឆ្នោត។ នេះជាការអះអាងរបស់លោក ហង្ស ពុទ្ធា អ្នកនាំពាក្យគ.ជ.ប.។
បើតាមលោក ហង្ស ពុទ្ធា ឧទ្ធម្ភាគចក្រទាំងនោះ នឹងត្រូវប្រើប្រាស់ សម្រាប់ដឹកសម្ភារបោះឆ្នោត ទៅកាន់ការិយាល័យបោះឆ្នោត ក្នុងពេលចាំបាច់។ យ៉ាងណាក៏ដោយ លោក ពុំបានលើកឡើងពីតម្លៃនៃការជួលឧទ្ធម្ភាគចក្រនោះទេ។
អ្នកនាំពាក្យរូបនេះ បញ្ជាក់យ៉ាងដូច្នេះថា៖«ប្រសិនបើ ទីកន្លែងណា ជួបការលំបាកខ្លាំង ដែលមធ្យោបាយធ្វើដំណើរតាមផ្លូវទឹក ឬផ្លូវគោក មិនអាចធ្វើទៅបាន គ.ជ.ប. នឹងប្រើប្រាស់ឧទ្ធម្ភាគចក្រ ដើម្បីដឹកសម្ភារទៅ ឬក៏អាចដឹកសម្ភារមកវិញដែរ ទាំងនៅមុនថ្ងៃបោះឆ្នោត ក្នុងថ្ងៃបោះឆ្នោត និងក្រោយថ្ងៃបោះឆ្នោត។ ទាំងនេះ គឺធានាសម្ភារបោះឆ្នោតទាំងអស់ និងធានាអំពីពេលវេលា។ ដូច្នេះយើង ត្រូវត្រៀមលក្ខណជាមុន ឲ្យបានល្អ» ។
ការបោះឆ្នោតជ្រើសតាំងតំណាងរាស្ត្រនីតិកាលទី៦ នឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ដោយមានគណបក្ស២០ ចូលរួមប្រកួតប្រជែង។
គួររម្លឹកថា កាលពីពេលបោះឆ្នោតជ្រើសរើសសមាជិកក្រុមប្រឹក្សា ឃុំ-សង្កាត់ ក្នុងឆ្នាំ២០១៧ គ.ជ.ប. ក៏បានជួលឧទ្ធម្ភាគចក្រពីរគ្រឿងដែរ សម្រាប់ដឹកសម្ភារបោះឆ្នោត៕
Tag:
បោះឆ្នោត
គជប
ឧទ្ធម្ភាគចក្រ
ហង្ស ពុទ្ធា
© រក្សាសិទ្ធិដោយ thmeythmey.com
