ជាតិ
បោះឆ្នោត
គ.ជ.ប ហាមគណបក្សនយោបាយប្រើពាក្យអសុរោះលើបក្សដទៃ ក្នុងពេលឃោសនាបោះឆ្នោត
× ភ្នំពេញ៖ គណៈកម្មាធិការជាតិរៀបចំការបោះឆ្នោត (គ.ជ.ប) ប្រាប់ឲ្យគណបក្សនយោបាយទាំងអស់ប្រកាន់យកជំហរចាស់ទុំ ក្នុងយុទ្ធនាការឃោសនាបោះឆ្នោត ដើម្បីបញ្ចៀសការប៉ះទង្គិចគ្នា។
ស្របពេលដែលការឃោសនាបោះឆ្នោតមកដល់ គណៈកម្មាធិការជាតិរៀបចំការបោះឆ្នោត បានស្នើឲ្យគ្រប់គណបក្សនយោបាយ គោរពច្បាប់ស្តីពីការបោះឆ្នោតជ្រើសតាំងតំណាងរាស្ត្រ បទបញ្ជា និងនីតិវិធី តាមក្រមសីលធម៌ដែលបានកំណត់ដោយ គ.ជ.ប។ ជាពិសេសគណបក្សនយោបាយ បេក្ខជន និងអ្នកគាំទ្រទាំងអស់ ប្រកាន់ខ្ជាប់ជំហរចាស់ទុំខាងនយោបាយក្នុងការឃោសនាបោះឆ្នោត ដោយមិនត្រូវប្រើប្រាស់ពាក្យសម្ដីអសុរោះ ទៅលើគណបក្សនយោបាយដទៃឡើយ។
តាមរយៈសេចក្តីប្រកាសព័ត៌មានរបស់គ.ជ.ប បានបញ្ជាក់ដូច្នេះថា៖«ការឃោសនាបោះឆ្នោតជ្រើសតាំងតំណាងរាស្ត្រ មានទិសដៅឲ្យគណបក្សនយោបាយ និងបេក្ខជនឈរឈ្មោះបោះឆ្នោត ធ្វើការផ្សព្វផ្សាយកម្មវិធីនយោបាយរបស់ខ្លួន ជូនអ្នកបោះឆ្នោត»។
បន្ថែមពីនេះសមាជិកគ.ជ.ប លោក ឯម សុផាត បានបញ្ជាក់ថា គណបក្សដែលឈរឈ្មោះបោះឆ្នោត អាចហែរក្បួនយាត្រា តាមរាជធានី ខេត្ត ក្រុង ស្រុក ខណ្ឌ ដែលខ្លួនឈរឈ្មោះ បានត្រឹម៤ដង ក្នុងអំឡុងពេលឃោសនាបោះឆ្នោត ហើយការហែរក្បួននេះ មិនអនុញ្ញាតឲ្យឆ្លងកាត់រាជធានី ខេត្តឡើយ។
បើសិនជាការឃោសនាមានវិវាទ ឬបញ្ហាណាមួយ គណបក្សនយោបាយ អាចមានសិទ្ធិប្ដឹងមកកាន់គណៈកម្មាធិការជាតិរៀបចំការបោះឆ្នោត ជា៤ដំណាក់កាល ដោយប្ដឹងទៅកាន់គណៈកម្មាធិការឃុំសង្កាត់ រៀបចំការបោះឆ្នោត ឬគណៈកម្មាធិការរាជធានី ខេត្ត រៀបចំការបោះឆ្នោត។ ហើយបើបណ្ដឹងនោះ មិនអាចបញ្ចប់ត្រឹមថ្នាក់មូលដ្ឋានទេ នោះបណ្ដឹងនឹងត្រូវបន្តឡើងមក គ.ជ.ប ឬក៏ឡើងទៅក្រុមប្រឹក្សាធម្មនុញ្ញ។ នេះជាការបញ្ជាក់របស់លោក ឯម សុផាត។
គណបក្សចំនួន៣ នឹងចាប់ផ្ដើមយុទ្ធនាការឃោសនាបោះឆ្នោតទ្រង់ទ្រាយធំ នៅថ្ងៃទី៧ កក្កដា។ គណបក្សទាំង៣ ដែលបើកយុទ្ធនាការនៅថ្ងៃដំបូងនេះ មានគណបក្សប្រជាជន, គណបក្សហ្វ៊ុនស៊ិនប៉ិច និងគណបក្សសម្ព័ន្ធដើម្បីប្រជាធិបតេយ្យ។ គណបក្សប្រជាជនកម្ពុជា នឹងជួបជុំសមាជិក និងអ្នកគាំទ្រខ្លួន ៦០,០០០នាក់ នៅមជ្ឈមណ្ឌលកោះពេជ្រ និងតាមបណ្ដាខណ្ឌទាំង១២ ។ គណបក្សសម្ព័ន្ធដើម្បីប្រជាធិបតេយ្យ នឹងជួបសមាជិកខ្លួន១៥,០០០នាក់ និងគណបក្សហ្វ៊ុនស៊ិនប៉ិច នឹងជួបសមាជិកខ្លួន២០០០នាក់ នៅទីស្នាក់ការបក្ស ។
គួរបញ្ជាក់ថា ការឃោសនាបោះឆ្នោត នឹងប្រព្រឹត្តទៅ ចាប់ពីថ្ងៃទី៧ ដល់២៧ កក្កដា ខាងមុខ។ ការបោះឆ្នោតជ្រើសរើសតំណាងរាស្ត្រ នឹងរៀបចំឡើងនៅថ្ងៃទី២៩ កក្កដា ដោយមានគណបក្សនយោបាយចំនួន២០ ចូលរួមប្រកួតប្រជែងគ្នា៕
Tag:
គ.ជ.ប
នយោបាយ
បោះឆ្នោត
© រក្សាសិទ្ធិដោយ thmeythmey.com