អន្តរជាតិ
អាន់វ៉ា អ៊ីប្រាហ៊ីម៖ការចាប់ខ្លួននិងចោទប្រកាន់ ណាជីប មិនមែនជារឿងនយោបាយឡើយ
× លោក អាន់វ៉ា អ៊ីប្រាហ៊ីម មេដឹកនាំបក្សយុត្តិធម៌ប្រជាជន (People's Justice Party) និងជាអនាគតនាយករដ្ឋមន្ត្រីម៉ាឡេស៊ី បានបញ្ចេញយោបល់ថា ការចាប់ខ្លួននិងចោទប្រកាន់អតីតនាយករដ្ឋមន្ត្រីណាជីប រ៉ាហ្សាក់ មិនមែនជារឿងនយោបាយឡើយ។ លោក អាន់វ៉ា ធ្លាប់ជាប់ពន្ធនាគារពីរដង ហើយលោកធ្លាប់ចាត់ទុកការចាប់ខ្លួនលោកជារឿងនយោបាយដូចគ្នាដែរកាលពីមុន។
បន្ទាប់ពីមានការចាប់ខ្លួន និងចោទប្រកាន់លោក ណាជីប រ៉ាហ្សាក់ វាមានការជជែកដេញដោយគ្នានៅក្នុងបរិបទនយោបាយម៉ាឡេស៊ី។ ខាងអ្នកគាំទ្របក្ស UMNO បានចាត់ទុកនីតិវិធីចោទប្រកាន់និងចាប់ខ្លួនអតីតប្រមុខរដ្ឋាភិបាលនេះថាជា រឿងនយោបាយផងដែរ។
ប៉ុន្តែអតីតមេដឹកនាំបក្សប្រឆាំងដែលត្រូវបានតុលាការម៉ាឡេស៊ីកាត់ទោសឲ្យជាប់ពន្ធនាគារពីរដង លោក អាន់វ៉ា អ៊ីប្រាហ៊ីម បានបដិសេធការចោទប្រកាន់នេះ។ លោកពន្យល់ថា វាជាការអនុវត្តច្បាប់ និងធានាគោលការណ៍នីតិរដ្ឋក្នុងប្រទេស។
បើតាមការផ្សាយរបស់ទូរទស្សន៍សិង្ហបុរី Channel News Asia លោក អាន់វ៉ា បានថ្លែងនៅក្នុងសន្និសីទសារព័ត៌មាននាក្រុងហ្សាការតាដូច្នេះ៖« ខ្ញុំមិនមើលឃើញថា ការចោទប្រកាន់នេះអាចចាត់ទុកជារឿងដែលជំរុញដោយនយោបាយឡើយព្រោះវាមិនមានភ័ស្តុតាងណាមួយឡើយ»។
«ខ្ញុំមិនដឹងរាល់ភ័ស្តុតាងទាំងអស់ឡើយ ប៉ុន្តែខ្ញុំបានដឹងពីរឿងពិតជាច្រើន ដូចជារបាយការណ៍ដែលបញ្ជូនមកដល់ទីភ្នា្កក់ងាររដ្ឋជាច្រើន ជាពិសេសនោះគឺក្រសួងយុត្តិធម៌អាមេរិកជាដើម»។ លោក អាន់វ៉ានិយាយដល់ភ័ស្តុតាងដែលបង្ហាញពីសំណុំរឿងពុករលួយពាក់ព័ន្ធនឹងអតីតមេដឹកនាំម៉ាឡេស៊ី។
យ៉ាងណាក៏ដោយ លោក អាន់វ៉ា បានបន្ថែមថា បញ្ហានេះជាការសាកល្បងមួយសម្រាប់ម៉ាឡេស៊ីដែលតម្រូវឲ្យប្រជាជនទាំងអស់គោរពដំណើរការតុលាការ និងនីតិរដ្ឋ។ លោកក៏បង្ហើបផងដែរថា នីតិវិធីស៊ើបអង្កេតពុកលួយនេះជាផ្នែកមួយនៃគោលនយោបាយរបស់បក្ស Pakatan Harapan។ ចំណែកលោក មហាធៀ មហាម៉ាត់ នាយករដ្ឋមន្ត្រីទីប្រាំពីរក៏បានប្តេជ្ញាចិត្តក្នុងការធានាឯករាជភាពនៃស្ថាប័នតុលាការនៅក្នុងប្រទេសដែរកន្លងមកនោះ។
តាមពិតទៅ លោក អាន់វ៉ា ត្រូវបានរដ្ឋាភិបាល បណ្តេញចេញពីតំណែងក្នុងអំឡុងទសវត្សរ៍ឆ្នាំ ១៩៩០ក្រោយមានជម្លោះជាមួយលោក មហាធៀ ដែលកំពុងដឹកនាំរដ្ឋាភិបាលកាលនោះ។ បន្ទាប់មកលោកត្រូវបានចោទប្រកាន់ និងដាក់ពន្ធធនាគារដោយពាក់ព័ន្ធនឹងបញ្ហាពុករលួយដូចគ្នា។ ដល់ក្នុងឆ្នាំ ២០១៥ លោកត្រូវបានគេចាប់ខ្លួន និងកាត់ទោសជាថ្មីម្តងទៀតជុំវិញបទល្មើសរួមភេទជាមនុស្សប្រុសដូចគ្នានោះ។ គេនៅចាំបានថា លោក អាន់វ៉ា បានហៅការកាត់ក្តីនោះថា ជាចំណាត់ការរបស់រដ្ឋាភិបាលលោក ណាជីប ក្នុងការរារាំងរូបលោកមិនឲ្យចូលប្រឡូកក្នុងនយោបាយនោះ៕
Tag:
ណាជីប រ៉ាហ្សាក់
អាន់វ៉ា អ៊ីប្រាហ៊ីម
មហាធៀ មហាម៉ាត់
© រក្សាសិទ្ធិដោយ thmeythmey.com