ជាតិ
បោះឆ្នោត
អ្នកនាំពាក្យបក្សកាន់អំណាច ជឿជាក់យ៉ាងខ្លាំងថា នឹងបន្តឈ្នះឆ្នោត ខណៈបក្សប្រឆាំងមិនបានចូលរួម សម្តេចនាយករដ្ឋមន្ត្រី ហ៊ុន សែន ដឹកនាំក្បួនដង្ហែគណបក្សប្រជាជនកម្ពុជា រកសំឡេងឆ្នោត កាលពីពេលបោះឆ្នោតឃុំ-សង្កាត់ ឆ្នាំ២0១៧។ រូបថត ផ្តល់សិទ្ធិដោយ បងដង្ខៅ
× គណបក្សប្រជាជនកម្ពុជា ដែលកំពុងដឹកនាំរដ្ឋាភិបាល មានជំនឿយ៉ាងខ្ពស់ថា នឹងទទួលបានជ័យជម្នះ ក្នុងការបោះឆ្នោតក្នុងអាណត្តិទី៦នេះ។ នេះបើតាមលោក សុខ ឥសាន អ្នកនាំពាក្យគណបក្សប្រជាជនកម្ពុជា។
ទោះជាសង្ឃឹមថានឹងជោគជ័យក្នុងការបោះឆ្នោតក្តី តែលោក សុខ ឥសាន មិនហ៊ានសន្និដ្ឋាននោះទេ ថាគណបក្សកាន់អំណាចរបស់លោក នឹងទទួលបានអាសនៈប៉ុន្មាន។ លោក ចាត់ទុកការវាយតម្លៃទុកជាមុនថា គណបក្សនេះ ឬគណបក្សនោះ ទទួលបានអាសនៈប៉ុន្មាន ខណៈការបោះឆ្នោត មិនទាន់មកដល់ គឺជារឿងមិនត្រឹមត្រូវ។
អ្នកនាំពាក្យគណបក្សកាន់អំណាចរូបនេះ សង្កត់ធ្ងន់យ៉ាងដូច្នេះថា៖«យើងមានក្តីសង្ឃឹមយ៉ាងមុតមាំថា យើងនឹងឈ្នះឆ្នោត។ ប៉ុន្តែយើងមិនអាចកំណត់ថា បានអាសនៈប៉ុន្មានទេ។ ការកំណត់មុនថាបានអាសនៈប៉ុន្មាន គឺជាការប្រមាថឆន្ទៈប្រជាពលរដ្ឋ»។
ការលើកឡើងរបស់លោក សុខ ឥសាន គឺធ្វើឡើងក្នុងសន្និសីទកាសែតមួយ ស្តីពីតួនាទីរបស់គណបក្សប្រជាជនកម្ពុជា លើឆាកអន្តរជាតិ ដែលរៀបចំនៅទីស្នាក់កាលកណ្តាលរបស់ខ្លួន នារសៀលថ្ងៃទី៦ ខែកក្កដា ឆ្នាំ២០១៨នេះ។
ពីឆ្វេងទៅស្តាំ៖ លោក សួស យ៉ារ៉ា (រូបទី២) និងលោក សុខ ឥសាន (រូបទី២)
ថ្ងៃទី៧ ខែកក្កដា គឺជាថ្ងៃទី១ នៃការឃោសនារកសំឡេងឆ្នោត។ គណបក្សប្រជានកម្ពុជា នឹងធ្វើយុទ្ធនាការទ្រង់ទ្រាយធំ នៅទូទាំងប្រទេស ក្នុងថ្ងៃដំបូងនេះ។
ការបោះឆ្នោត នឹងប្រព្រឹត្តទៅនៅថ្ងៃទី២៩ ខែកក្កដា ឆ្នាំ២០១៨ ដោយមានគណបក្ស១៩ ចូលរួមប្រកួតប្រជែងជាមួយគណបក្សប្រជាជនកម្ពុជា។ ចំណែកឯ គណបក្សសង្គ្រោះជាតិ ដែលជាដៃគូប្រកួតរបស់គណបក្សប្រជាជនកម្ពុជា ពុំបានចូលរួមនោះទេ ដោយសារតែគណបក្សប្រឆាំងដ៏ធំមួយនេះ ត្រូវបានរំលាយចោល ហើយមកដល់ពេលនេះ នៅមិនទាន់អាចធ្វើសកម្មភាពឡើងវិញនោះទេ៕
Tag:
បោះឆ្នោត
CPP
សុខ ឥសាន
សួស យ៉ារ៉ា
© រក្សាសិទ្ធិដោយ thmeythmey.com