ពីអ្នកបោះបង់ការសិក្សា តែមានសមត្ថភាពបង្កើតកុំព្យូទ័រ

ជាតិ

បទយកការណ៍ / បទសម្ភាសន៍

ពីអ្នកបោះបង់ការសិក្សា តែមានសមត្ថភាពបង្កើតកុំព្យូទ័រ

07, Jul 2018 , 8:39 pm

រូបភាព

ដោយ:

ភ្នំពេញ៖ លោក ធុល រិទ្ធី ដែលជាអ្នកបង្កើតកុំព្យូទ័រខ្មែរម៉ាក Koompi (គម្ពី) គឺជាអតីតនិស្សិតដែលបានបោះបង់ការសិក្សានៅឆ្នាំទី២ ថ្នាក់ឧត្តមសិក្សា កាលពីឆ្នាំ២០០៦ ។ ឈប់រៀន គឺដោយសារលោកគិតថា ជំនាញអក្សសាស្ត្រអង់គ្លេស ដែលកំពុងរៀននោះ មិនមែនជាចំណង់ចំណូលចិត្តរបស់ខ្លួនឡើយ។ មុខវិជ្ជាដែល ធុល រិទ្ធី ចូលចិត្តគឺជំនាញកុំព្យូទ័រ។ បច្ចុប្បន្នលោកគឺជា សហស្ថាបនិកស្ថាប័ន SmallWorld និងជាអ្នកផ្ដើមគំនិតស្រាវជ្រាវ បង្កើតកុំព្យូទ័រម៉ាក Koompi ដែលកំពុងទទួលកម្ម៉ងទិញជាច្រើន នៅខែកក្កដានេះ។

ក្រោយបញ្ចប់ការសិក្សាថ្នាក់ទី១២ នៅឆ្នាំ២០០៤ យុវជន ធុល រិទ្ធី បានឡើងមកទីក្រុងភ្នំពេញ ដើម្បីបន្តការសិក្សាថ្នាក់បរិញ្ញាបត្រ អក្សរសាស្ត្រអង់គ្លេស។ ការសិក្សាជំនាញអង់គ្លេសនេះ មិនសូវអំណោយផលដល់យុវជន រិទ្ធី ឡើយ ដោយសាររូបគេធុញទ្រាន់នឹងមុខវិជ្ជានេះ ទើបសម្រេចឈប់រៀនត្រឹមឆ្នាំទី២។ ចំណងចំណូលចិត្តរបស់ រិទ្ធី គឺផ្ដោតលើមុខវិជ្ជាកុំព្យូទ័រទៅវិញ។ ដោយដឹងពីអារម្មណ៍ពិតខ្លួន រិទ្ធី ក៏បានសម្រេចចិត្តសិក្សាលើផ្នែកកុំព្យូទ័រ និងការប្រើប្រាស់អ៊ីនធឺណេតរយៈពេលខ្លី ហើយរូបគេក៏បានប្ដូរពីការអានសៀវភៅនៅក្នុងបណ្ណាល័យ ទៅជាការចំណាយលុយចូលទៅកន្លែងអ៊ីនធឺណេត ដើម្បីស្វែងយល់ពីបច្ចេកវិទ្យានេះ ។

បុរសរៀងខ្ពស់ស្រឡះរូបនេះ បានបញ្ជាក់ដូច្នេះថា៖ «គ្រូរបស់ខ្ញុំម្នាក់បាននិយាយថា អ៊ីនធឺណេតអាចធ្វើឲ្យយើង Communicate long system ហើយអាចមើលឃើញមុខគ្នា។ ពេលដែលខ្ញុំឮអីចឹង ខ្ញុំក៏ចាប់អារម្មណ៍ ហើយឈប់រៀន Word និង Excel ហើយលុយដែលម៉ែរបស់ខ្ញុំឲ្យមក ខ្ញុំតែងតែយកទៅចូលណេតកាហ្វេ ទៅរៀនពី Communicate long system នេះដោយខ្លួនឯង»។

ការសិក្សាស្រាវជ្រាវជំនាញបច្ចេកវិទ្យានេះ មិនបានធ្វើឲ្យ រិទ្ធី ខុសបំណងឡើយ ព្រោះរូបគេអាចរកប្រាក់ចំណូលបានច្រើន ពីជំនាញមួយនេះ។ ឱកាសដែលធ្វើឲ្យ រីទ្ធី អាចរកប្រាក់ចំណូលបានដំបូងនោះ គឺតាមរយៈការប្រើប្រាស់បណ្ដាញហ្វេសប៊ុក នៅឆ្នាំ២០០៨ ខណៈដែលបណ្ដាញសង្គមមួយនេះ ទើបមានវត្តមាននៅកម្ពុជា កាលពីឆ្នាំ២០០៦។ ដ្បិតមនុស្សភាគតិច ចាប់ផ្ដើមប្រើប្រាស់ហ្វេសប៊ុកពិតមែន ប៉ុន្តែ រិទ្ធី ដែលយល់ច្បាស់ពីបច្ចេកវិទ្យានេះ បានសម្រេចបង្កើតផេកហ្វេសប៊ុក ចំនួន៣ ដោយគណនីមួយប្រើផ្សព្វផ្សាយព័ត៌មានទូទៅផង ប្រើសម្រាប់បង្ហោះការដើរកំសាន្តរបស់លោកផង និងមួយទៀតលោកប្រើបង្ហោះទីតាំងដី ដែលពលរដ្ឋនៅតាមខេត្ត ពឹងឲ្យលោកជួយផ្សព្វផ្សាយលក់។ ផេកទាំងនោះហើយ បានក្លាយជាប្រភពចំណូលរបស់យុវជន រិទ្ធី ក្នុងការជូនភ្ញៀវទិញដី និងដើរកំសាន្ត ទាំងលោកមិនបានរំពឹងទុក។

ប៉ុន្តែការរកចំណូលតាមបណ្ដាញហ្វេសប៊ុក ត្រូវបានយុវជន រិទ្ធី សម្រេចបញ្ឈប់សកម្មភាពខ្លួនវិញ នៅឆ្នាំ២០០៩។ ដោយសារជាមនុស្សចូលចិត្តភាពឯករាជ្យច្រើន និងចូលចិត្តស្វែងរកអ្វីដែលថ្មីៗនោះ យុវជន រិទ្ធី បានចំណាយពេលជាងមួយឆ្នាំ ស្វែងយល់ពីកត្តាសង្គម ពោលគឺចង់ដឹងពីការរស់នៅ និងការចាយវាយរបស់កូនអ្នកមាន មុននឹងលោកចាប់ផ្ដើមធ្វើការងារស្ម័គ្រចិត្តនៅក្នុងអង្គការមួយ ក្នុងខេត្តសៀមរាប ដែលអនុវត្តគម្រោងពាក់ព័ន្ធលើការអប់រំ និងការបង្កើតកុំព្យូទ័រសម្រាប់កុមារ ដែលស្របតាមជំនាញខ្លួនស្រាប់។ ធ្វើការងារស្ម័គ្រចិត្តបាន២ឆ្នាំ យុវជនដែលមិនសូវចេះធ្វើការងារជាក្រុមរូបនេះ បានផ្លាស់ប្ដូរអត្តចរិតខ្លួន មកក្លាយជាមនុស្សពូកែទំនាក់ទំនងការងារ និងសហការការងារជាក្រុមទៅវិញ។

ដោយខ្លួនកាន់តែមានភាពចាស់ទុំក្នុងការងារនោះ កូនអ្នកចំការ ស្រុកស្អាង ខេត្តកណ្ដាលរូបនេះ បានចាប់ផ្ដើមបើកស្ថាប័នមួយដែលមានឈ្មោះថា SmallWold ជាមួយមិត្តភក្តិ៣នាក់ផ្សេងទៀត ដែលបានចុះបញ្ជីជាផ្លូវការនៅដើមឆ្នាំ២០១២ ដោយលោក គឺជាអ្នកប្រឹក្សាផ្នែកបច្ចេកវិទ្យា។ «SmallWold គឺជាស្ថាប័នមួយដែលជួយប្រឹក្សាយោបល់ដល់អ្នកដែលចង់បង្កើតអាជីវកម្មថ្មី ទាំងគំនិតយោបល់ ផ្ដល់ទីតាំង និងការស្វែងរកទីផ្សារ»។ នេះបើតាមនាយកប្រតិបត្តិរូបនេះ ដែលបានបន្ថែមថា SmallWold បានជួយក្រុមហ៊ុនចំនួន៤ ឲ្យបានជោគជ័យរួចមកហើយ។

ភាពជោគជ័យសម្រាប់ក្រុមហ៊ុន គឺជារឿងមួយ ប៉ុន្តែភាពជោគជ័យសម្រាប់ខ្លួនវិញនោះ គឺយុវជនសម្បុរស្រអែម សក់រួញរូបនេះ បានបង្កើតកុំព្យូទ័រយួរដៃ ដែលមានឈ្មោះថា Koompi។ កុំព្យូទ័រយួរដៃនេះ គឺជាគំនិតផ្ដួចផ្ដើមរបស់យុវជន រិទ្ធី ដែលបានចាប់ផ្ដើមប្រមូលកុំព្យូទ័រចាស់ តែកែច្នៃដាក់ប្រព័ន្ធប្រតិបត្តិការថ្មី តាំងពីឆ្នាំ២០១៤ ដោយមានការជ្រោមជ្រែងពីក្រុមរបស់លោក។ កុំព្យូទ័រយួរដៃ Koompiនេះ នឹងដាក់លក់ជាផ្លូវការនៅក្នុងខែកក្កដា ឆ្នាំ២០១៨នេះ ក្នុងតម្លៃ ៣៦៩ដុល្លារ ដោយគ្រោងផលិតចំនួន៥០០គ្រឿងសាកល្បង។

«ខ្ញុំមិនចង់ឲ្យអ្នកទិញកុំព្យូទ័រនេះ ដោយសារតែវាជាផលិតផលខ្មែរនោះទេ តែគួរទិញដោយសារជាការសាកល្បងប្រើប្រាស់នូវផលិតផលខ្មែរ លើបច្ចេកវិទ្យា និងប្រព័ន្ធប្រតិបត្តិការថ្មី»។ នេះជាការបញ្ជាក់របស់លោក ធុល រិទ្ធី ដែលរំពឹងថា កុំព្យូទ័រនេះ នឹងលក់បាន៥សែនគ្រឿង លើទីផ្សារប្រទេសកម្ពុជា។

មហិច្ចតាធំរបស់សហស្ថាបនិក SmallWorld រូបនេះ គឺចង់ឲ្យកុំព្យូទ័រយួរដៃរបស់ខ្លួន មានរោងចក្រផលិតនៅក្នុងស្រុកសិន មុននឹងពង្រីកទីផ្សាររបស់ខ្លួន ទៅកាន់ប្រទេសជិតខាង នាពេលអនាគត៕