ទោះបានចេញពីរូងភ្នំ តែគ្រូពេទ្យថា ក្មេងៗទាំងអស់មិនអាចទៅមើល World Cup បានឡើយ

កីឡាអន្តរជាតិ

អន្តរជាតិ

ទោះបានចេញពីរូងភ្នំ តែគ្រូពេទ្យថា ក្មេងៗទាំងអស់មិនអាចទៅមើល World Cup បានឡើយ

10, Jul 2018 , 7:33 pm

រូបភាព

ដោយ: ទេព ពិទូរ្យ

មកទល់នឹងពេលនេះ កុមារទាំង១២នាក់ និងគ្រូបង្វឹកបានចេញផុតពីរូងភ្នំ Tham Luang ដែលកំពុងមានទឹកជនលិច។ ប៉ុន្តែក្រុមគ្រូពេទ្យដែលបានពិនិត្យពីស្ថានភាពជំងឺរបស់ក្មេងៗនៃក្រុមបាល់ទាត់ Wild Boars របស់ថៃទាំងនោះ បាននិយាយថាពួកគេទំនងមិនអាចទៅទស្សនាការប្រកួតវគ្គផ្តាច់ព្រ័ត្រ World Cup នៅទីក្រុងមូស្គូ តាមការអញ្ជើញរបស់ប្រធាន FIFA បានទេ។

អត្ថបទទាក់ទង

កុមារ១២រូប និងគ្រូបង្វឹក ត្រូវបានសង្គ្រោះចេញពីរូងភ្នំ Tham Luang អស់ហើយ

FIFA អញ្ជើញក្មេងដែលជាប់ក្នុងរូងភ្នំនៅថៃ ទៅមើលការប្រកួតផ្តាច់ព្រ័ត្រ World Cup នៅរុស្ស៊ី

កាលពីថ្ងៃទី៦ ខែកក្កដាកន្លងទៅលោក Gianni Infantino ប្រធានសហព័ន្ធកីឡាបាល់ទាត់អន្តរជាតិ FIFA បានសរសេរសារមួយផ្ញើទៅកាន់សមាគមកីឡាបាល់ទាត់ថៃដើម្បីអញ្ជើញក្មេងប្រុស១២នាក់ រួមទាំងគ្រូបង្វឹករបស់ពួកគេម្នាក់ទៅទស្សនាការប្រកួតវគ្គផ្តាច់ព្រ័ត្រពានរង្វាន់ FIFA World Cup 2018 នៅរុស្ស៊ី ប្រសិនបើពួកគេអាចចេញពីរូងភ្នំទាន់ពេល។

ការប្រកួតវគ្គផ្ដាច់ព្រ័ត្រ នឹងប្រព្រឹត្តិទៅនៅថ្ងៃទី១៥ ខែកក្កដា ពោលគឺនៅសល់៥ថ្ងៃទៀតប៉ុណ្ណោះ។

បើតាមការផ្សាយរបស់ទីភ្នាក់ងារព័ត៌មាន AFP ក្រុមវេជ្ជបណ្ឌិតដែលតាមដានសុខភាពរបស់ក្មេងៗទាំងនោះនិយាយថា ដោយសារពួកគេស្ថិតនៅតំបន់ទឹកត្រជាក់យូរថ្ងៃពេក ដូច្នេះត្រូវការសម្រាកក្នុងមន្ទីរពេទ្យយ៉ាងហោចណាស់ក៏រយៈពេល១សប្តាហ៍ដែរ។ ក្នុងចំណោម៤នាក់ដែលក្រុមអ្នករុករកសង្គ្រោះចេញមកក្រៅរូងភ្នំមុនគេ ត្រូវបានគ្រូពេទ្យពិនិត្យឃើញថាមានបញ្ហាសួតធ្ងន់ធ្ងរចំនួន២នាក់។ ដូច្នេះសមាជិកក្រុមបាល់ទាត់កុមារដែលមានឈ្មោះថាជ្រូកព្រៃ មិនអាចទៅចូលរួមតាមការអញ្ជើញរបស់ FIFA បានឡើយ។

លោក Thongchai Lertwilairatanapong ប្រធានក្រសួងសុខាភិបាលសាធារណៈថៃក៏បានប្រាប់អ្នកយកព័ត៌មាននៅថ្ងៃទី១០ ខែកក្កដានេះ ថាក្មេងមិនអាចទៅទស្សនា World Cup ផ្តាច់ព្រ័ត្រដែលធ្វើឡើងនៅថ្ងៃទី១៥ ខែកក្កដាបានទេ ព្រោះពួកគេត្រូវការសម្រាកនៅមន្ទីរពេទ្យបន្តទៀត។ ក្មេងៗអាចទស្សនាបានត្រឹមតាមរយៈកញ្ចក់ទូរទស្សន៍ប៉ុណ្ណោះ៕