អន្តរជាតិ
អឺរ៉ុបប្រាប់លោក ត្រាំ កុំយកលុយជាធំជាងសាមគ្គីភាព មុនប្រជុំ NATO នៅព្រុចសែល
លោក ដូណាល់ ត្រាំ ពេលទៅដល់បែលហ្ស៊ិក (រូបភាព AFP)
×![]()
ដោយ: តន ចាន់រិទ្ធារ៉ា
ជំនួបមេដឹកនាំបក្សសម្ព័ន្ធយោធាណាតូដែលចាប់ផ្ដើមពីថ្ងៃទី១១ ខែកក្កដានៅទីក្រុងព្រុចសែល នឹងធ្វើឡើងក្រោមបរិយាកាសអាប់អួរជាថ្មីទៀត។ តាំងពីមុនទៅដល់បែលហ្ស៊ិក និងទាំងពេលទៅដល់បែលហ្ស៊ិក ប្រធានាធិបតីអាមេរិក ដូណាល់ ត្រាំ បានផ្ដើមវាយប្រហារសម្ព័ន្ធមិត្តរបស់ខ្លួនជាពិសេសការចំណាយលុយរបស់ណាតូ ដែលជាសំណុំរឿងចាស់។ អាកប្បកិរិយារបស់លោក ត្រាំ កាលពីជំនួប G7 រឹតតែធ្វើឲ្យមេដឹកនាំណាតូនៅអឺរ៉ុបបារម្ភខ្លាំង។
មេដឹកនាំរដ្ឋាភិបាលប្រទេសច្រើនជាង៤០ ដែលជាសមាជិកបក្សសម្ព័ន្ធយោធាណាតូ និងរដ្ឋដៃគូ នឹងជួបជុំគ្នារយៈពេលពីរថ្ងៃចាប់ពីថ្ងៃទី១១ ដល់ថ្ងៃទី១២ ខែកក្កដា នៅទីក្រុងព្រុចសែល។ ជំនួបលើកនេះ ប្រាកដជាធ្វើឡើងទាំងទើសទាល់ ដ្បិតមេដឹកនាំសមាជិកសម្ព័ន្ធយោធាណាតូ ត្រូវរកផ្លូវដោះស្រាយជាមួយនយោបាយរបស់ប្រធានាធិបតីអាមេរិក ដូណាល់ ត្រាំ ដែលពាក់មុខយក្សតាំងពីពេលហោះទៅកាន់បែលហ្ស៊ិកមកនោះ។
កាន់តែបារម្ភនោះ ស្រមោលនៃជំនួប G7 ដែលលោក ត្រាំ មិនខ្ចីទុកមុខឲ្យសម្ព័ន្ធមិត្តរបស់ខ្លួន អាចលងបន្លាចមេដឹកនាំអឺរ៉ុប និងណាតូជាថ្មីទៀត។ ក្នុងដំណើរទស្សនកិច្ចនៅទ្វីបអឺរ៉ុបដើម្បីចូលរូមជំនួបមេដឹកនាំណាតូលើកនេះ លោក ត្រាំ បានផ្ញើសាររួចស្រេចទៅហើយ គឺរដ្ឋសមាជិកណាតូត្រូវបង់ថ្លៃចំណាយឲ្យបានច្រើនថែមទៀតសម្រាប់អង្គការយោធាមួយនេះ ដ្បិតអាមេរិកបានចេញថ្លៃច្រើនជាងគេរាប់សិបឆ្នាំមកហើយ។
១. រឿងលុយជាប្រធានបទសំខាន់របស់លោក ត្រាំ នៅក្នុងជំនួបនៅព្រុចសែល
បញ្ហាចំណាយរបស់សម្ព័ន្ធយោធាណាតូ នៅតែជាសំណុំរឿងសំខាន់ក្នុងចិត្តរបស់លោក ត្រាំ ដដែល។ កំពុងស្ថិតលើយន្តហោះ លោក ត្រាំ បានសរសេរតាម Twitter ក្នុងន័យរិះគន់សមាជិកណាតូដែលមិនព្រមបង្កើនការចំណាយរបស់ខ្លួន។ ប្រធានាធិបតីអាមេរិកបញ្ជាក់ថា ប្រទេសជាច្រើននៅក្នុងណាតូ មិនត្រឹមតែមិនអាចធ្វើតាមការសន្យាបង្កើនការចំណាយការពារជាតិឲ្យបាន២ភាគរយឡើយ ហើយថែមទាំងមិនព្រមបង់លុយចំណាយរបស់ខ្លួនទៀត។
តាមពិតទៅ ការសន្យាបង្កើនថវិកាការពារជាតិដល់២ភាគរយនៅត្រឹមឆ្នាំ២០២៤ ត្រូវបានឯកភាពគ្នាតាំងពីឆ្នាំ២០១៤ មកម្ល៉េះ។ ចាប់តាំងពីពេលនេះមក សមាជិកណាតូនៅអឺរ៉ុប និងកាណាដា បានពង្រីកការចំណាយលើវិស័យការពារជាតិរបស់ខ្លួនរហូតដល់ជិត៩០ពាន់លានដុល្លារចាប់តាំងពីឆ្នាំ២០១៥ មក។ ប៉ុន្តែសមាជិកធំៗរបស់ណាតូដូចជាអាល្លឺម៉ង់ជាដើមនោះ នៅមិនទាន់ធ្វើការព្រមព្រៀងគ្នានៅឡើយទេ។
នៅមុនហោះទៅបែលហ្ស៊ិក លោក ត្រាំ ក៏ឆ្លៀតនិយាយវាយប្រហារអឺរ៉ុប និងប្រកាសថា លោកមិនឲ្យអ្នកផ្សេងកេងចំណេញពីអាមេរិកទៀតឡើយ។ មេដឹកនាំអាមេរិកដដែលថែមទាំងនិយាយថា ជំនួបរវាលោកជាមួយសមភាគីរុស្ស៊ី វ្ល៉ាឌីមៀ ពូទីន នៅឯទីក្រុងហែលស៊ីនគីក្រោយជំនួបនៅព្រុចសែល នឹងធ្វើឡើងដោយងាយស្រួលផង មិនដូចជំនួបជាមួយមេដឹកនាំណាតូឡើយ។ ចំពោះមុខអ្នកសារព័ត៌មាននៅសេតវិមាន លោក ត្រាំ បន្តថា ជំនួបណាតូនឹងមានរឿងគួរឲ្យចាប់អារម្មណ៍។
២. អឺរ៉ុបប្រាប់លោក ត្រាំ កុំយកលុយជាធំជាងសាមគ្គីភាព
ជំនួបមេដឹកនាំណាតូនៅបែលហ្ស៊ិកដែលគេរំពឹងថា នឹងធ្វើឡើងដោយតានតឹង ប្រធានគណៈកម្មការអឺរ៉ុប ដូណាល់ ទូស ( Donald Tusk) នៅថ្ងៃទី១០ ខែកក្កដា បានប្រាប់ឲ្យលោកប្រធានាធិបតី ត្រាំ យោគយល់សម្ព័ន្ធមិត្តរបស់ខ្លួនឲ្យបានច្រើន។ ថ្លែងក្រោយចុះហត្ថលេខាកិច្ចព្រមព្រៀងស្ដីពីកិច្ចសហប្រតិបត្តិការយោធារវាងអឺរ៉ុប និងណាតូ លោក ទូស និយាយថា អាមេរិកគួរគោរពសម្ព័ន្ធរបស់ខ្លួន ព្រោះចុងក្រោយទៅ អាមេរិកមិនមានមិត្តច្រើនឡើយ។
យោងតាមទីភ្នាក់ងារព័ត៌មាន Xinhua ប្រធានគណៈកម្មការអឺរ៉ុបរូបនេះក៏ឆ្លៀតប្រាប់ឲ្យរដ្ឋសមាជិកអឺរ៉ុបបង្កើនការចំណាយលើវិស័យយោធាឲ្យច្រើនដូចគ្នា ព្រោះអាមេរិកគោរពសម្ព័ន្ធមិត្តណាដែលប្រុងប្រៀបខ្លួនបានល្អ និងបំពាក់សព្វាវុធត្រឹមត្រូវ។ «លុយជារឿងសំខាន់ ប៉ុន្តែសាមគ្គីភាពពិតប្រាកដ គឺរឹតតែសំខាន់ទៅទៀត។» នេះជាសម្ដីលោក ទូស ដែលបន្ថែមថា លោកចង់ឲ្យលោក ត្រាំ ចងចាំរឿងនេះទុកក្នុងចិត្តអំឡុងពេលជំនួបណាតូ៕
មេដឹកនាំរដ្ឋាភិបាលប្រទេសច្រើនជាង៤០ ដែលជាសមាជិកបក្សសម្ព័ន្ធយោធាណាតូ និងរដ្ឋដៃគូ នឹងជួបជុំគ្នារយៈពេលពីរថ្ងៃចាប់ពីថ្ងៃទី១១ ដល់ថ្ងៃទី១២ ខែកក្កដា នៅទីក្រុងព្រុចសែល។ ជំនួបលើកនេះ ប្រាកដជាធ្វើឡើងទាំងទើសទាល់ ដ្បិតមេដឹកនាំសមាជិកសម្ព័ន្ធយោធាណាតូ ត្រូវរកផ្លូវដោះស្រាយជាមួយនយោបាយរបស់ប្រធានាធិបតីអាមេរិក ដូណាល់ ត្រាំ ដែលពាក់មុខយក្សតាំងពីពេលហោះទៅកាន់បែលហ្ស៊ិកមកនោះ។
កាន់តែបារម្ភនោះ ស្រមោលនៃជំនួប G7 ដែលលោក ត្រាំ មិនខ្ចីទុកមុខឲ្យសម្ព័ន្ធមិត្តរបស់ខ្លួន អាចលងបន្លាចមេដឹកនាំអឺរ៉ុប និងណាតូជាថ្មីទៀត។ ក្នុងដំណើរទស្សនកិច្ចនៅទ្វីបអឺរ៉ុបដើម្បីចូលរូមជំនួបមេដឹកនាំណាតូលើកនេះ លោក ត្រាំ បានផ្ញើសាររួចស្រេចទៅហើយ គឺរដ្ឋសមាជិកណាតូត្រូវបង់ថ្លៃចំណាយឲ្យបានច្រើនថែមទៀតសម្រាប់អង្គការយោធាមួយនេះ ដ្បិតអាមេរិកបានចេញថ្លៃច្រើនជាងគេរាប់សិបឆ្នាំមកហើយ។
១. រឿងលុយជាប្រធានបទសំខាន់របស់លោក ត្រាំ នៅក្នុងជំនួបនៅព្រុចសែល
បញ្ហាចំណាយរបស់សម្ព័ន្ធយោធាណាតូ នៅតែជាសំណុំរឿងសំខាន់ក្នុងចិត្តរបស់លោក ត្រាំ ដដែល។ កំពុងស្ថិតលើយន្តហោះ លោក ត្រាំ បានសរសេរតាម Twitter ក្នុងន័យរិះគន់សមាជិកណាតូដែលមិនព្រមបង្កើនការចំណាយរបស់ខ្លួន។ ប្រធានាធិបតីអាមេរិកបញ្ជាក់ថា ប្រទេសជាច្រើននៅក្នុងណាតូ មិនត្រឹមតែមិនអាចធ្វើតាមការសន្យាបង្កើនការចំណាយការពារជាតិឲ្យបាន២ភាគរយឡើយ ហើយថែមទាំងមិនព្រមបង់លុយចំណាយរបស់ខ្លួនទៀត។
តាមពិតទៅ ការសន្យាបង្កើនថវិកាការពារជាតិដល់២ភាគរយនៅត្រឹមឆ្នាំ២០២៤ ត្រូវបានឯកភាពគ្នាតាំងពីឆ្នាំ២០១៤ មកម្ល៉េះ។ ចាប់តាំងពីពេលនេះមក សមាជិកណាតូនៅអឺរ៉ុប និងកាណាដា បានពង្រីកការចំណាយលើវិស័យការពារជាតិរបស់ខ្លួនរហូតដល់ជិត៩០ពាន់លានដុល្លារចាប់តាំងពីឆ្នាំ២០១៥ មក។ ប៉ុន្តែសមាជិកធំៗរបស់ណាតូដូចជាអាល្លឺម៉ង់ជាដើមនោះ នៅមិនទាន់ធ្វើការព្រមព្រៀងគ្នានៅឡើយទេ។
នៅមុនហោះទៅបែលហ្ស៊ិក លោក ត្រាំ ក៏ឆ្លៀតនិយាយវាយប្រហារអឺរ៉ុប និងប្រកាសថា លោកមិនឲ្យអ្នកផ្សេងកេងចំណេញពីអាមេរិកទៀតឡើយ។ មេដឹកនាំអាមេរិកដដែលថែមទាំងនិយាយថា ជំនួបរវាលោកជាមួយសមភាគីរុស្ស៊ី វ្ល៉ាឌីមៀ ពូទីន នៅឯទីក្រុងហែលស៊ីនគីក្រោយជំនួបនៅព្រុចសែល នឹងធ្វើឡើងដោយងាយស្រួលផង មិនដូចជំនួបជាមួយមេដឹកនាំណាតូឡើយ។ ចំពោះមុខអ្នកសារព័ត៌មាននៅសេតវិមាន លោក ត្រាំ បន្តថា ជំនួបណាតូនឹងមានរឿងគួរឲ្យចាប់អារម្មណ៍។
២. អឺរ៉ុបប្រាប់លោក ត្រាំ កុំយកលុយជាធំជាងសាមគ្គីភាព
ជំនួបមេដឹកនាំណាតូនៅបែលហ្ស៊ិកដែលគេរំពឹងថា នឹងធ្វើឡើងដោយតានតឹង ប្រធានគណៈកម្មការអឺរ៉ុប ដូណាល់ ទូស ( Donald Tusk) នៅថ្ងៃទី១០ ខែកក្កដា បានប្រាប់ឲ្យលោកប្រធានាធិបតី ត្រាំ យោគយល់សម្ព័ន្ធមិត្តរបស់ខ្លួនឲ្យបានច្រើន។ ថ្លែងក្រោយចុះហត្ថលេខាកិច្ចព្រមព្រៀងស្ដីពីកិច្ចសហប្រតិបត្តិការយោធារវាងអឺរ៉ុប និងណាតូ លោក ទូស និយាយថា អាមេរិកគួរគោរពសម្ព័ន្ធរបស់ខ្លួន ព្រោះចុងក្រោយទៅ អាមេរិកមិនមានមិត្តច្រើនឡើយ។
យោងតាមទីភ្នាក់ងារព័ត៌មាន Xinhua ប្រធានគណៈកម្មការអឺរ៉ុបរូបនេះក៏ឆ្លៀតប្រាប់ឲ្យរដ្ឋសមាជិកអឺរ៉ុបបង្កើនការចំណាយលើវិស័យយោធាឲ្យច្រើនដូចគ្នា ព្រោះអាមេរិកគោរពសម្ព័ន្ធមិត្តណាដែលប្រុងប្រៀបខ្លួនបានល្អ និងបំពាក់សព្វាវុធត្រឹមត្រូវ។ «លុយជារឿងសំខាន់ ប៉ុន្តែសាមគ្គីភាពពិតប្រាកដ គឺរឹតតែសំខាន់ទៅទៀត។» នេះជាសម្ដីលោក ទូស ដែលបន្ថែមថា លោកចង់ឲ្យលោក ត្រាំ ចងចាំរឿងនេះទុកក្នុងចិត្តអំឡុងពេលជំនួបណាតូ៕
Tag:
អាមេរិក
NATO
ដូណាល់ ត្រាំ
© រក្សាសិទ្ធិដោយ thmeythmey.com
