អន្តរជាតិ
លោក ប្រាយុទ្ធ៖ គ្មានរដ្ឋាភិបាលកើតក្រោយរដ្ឋប្រហារណា មានសមិទ្ធផលច្រើនដូចខ្ញុំឡើយ មេដឹកនាំរបបយោធាថៃ ប្រាយុទ្ធ ចន្ទអូចា (រូបភាព The Nation)
× មេដឹកនាំរបបយោធាថៃ ប្រាយុទ្ធ ចន្ទអូចា នៅថ្ងៃទី១០ ខែកក្កដា បាននិយាយអួតអាងពីការដឹកនាំរបស់ខ្លួន ទោះជាមានការរិះគន់ខ្លាំងជុំវិញបញ្ហាសិទ្ធិមនុស្ស និងការលើកពេលការបោះឆ្នោតម្ដងជាពីរដងក្ដី។ ជាមួយនឹងការកាន់អំណាចពេញដៃក្រោយរដ្ឋប្រហារខែឧសភា ឆ្នាំ២០១៤ មកនោះ លោក ប្រាយុទ្ធ អះអាងថា រដ្ឋាភិបាលរបស់លោកបានប្រឹងប្រែងធ្វើការយ៉ាងខ្លាំង ហើយក៏សម្រេចបានលទ្ធផលជាច្រើនដែរ។
ក្នុងចំណោមរដ្ឋាភិបាលក្រោយរដ្ឋប្រហារទាំងអស់ តើពួកគេមានបានធ្វើការងារដូចរដ្ឋាភិបាលខ្ញុំទេ? រដ្ឋាភិបាលខ្ញុំបន្តអភិវឌ្ឍ ឯបរទេសបានលើកសរសើរយើងផង។ នេះជាសម្ដីរបស់ប្រមុខរដ្ឋាភិបាលយោធាថៃ ប្រាយុទ្ធ ចន្ទអូចា នៅថ្ងៃទី១០ ខែកក្កដា ដែលបានបង្កប់ន័យអួតអាងពីសមិទ្ធផលរបស់រដ្ឋាភិបាលលោកក្នុងរយៈពេល៤ឆ្នាំក្រោយប្រហារឆ្នាំ២០១៤ ខណៈសហគមន៍អន្តរជាតិរិះគន់ពេញៗមាត់នាពេលកន្លងមក។
យោងតាមសារព័ត៌មានថៃ The Nation លោក ប្រាយុទ្ធ បានប្រាប់តារាសម្ដែង និងចម្រៀងជើងចាស់នៅវិមានរដ្ឋាភិបាល ថា គ្មានប្រទេសកំពុងអភិវឌ្ឍណាមួយ អាចសម្រេចបានលទ្ធផលដូចរដ្ឋាភិបាលលោកឡើយ ហើយលោកចង់ចែករំលែកមោទកភាពនេះជាមួយអ្នកចូលរួមទាំងអស់។ យ៉ាងណាមិញ ប្រមុខរបបយោធារូបនេះ មិនបានបរិយាយឲ្យបានលម្អិតពីសមិទ្ធផលរបស់ថៃក្រោមការដឹកនាំរបស់លោកឡើយ។
បន្ថែមពីលើនោះ លោក ប្រាយុទ្ធ ដែលបានពន្យារពេលបោះឆ្នោតម្ដងជាពីរដង និងសរសេររដ្ឋធម្មនុញ្ញថ្មីដែលបើកផ្លូវឲ្យខ្លួនលោកធ្វើជានាយករដ្ឋមន្ត្រីក្រោយការបោះឆ្នោតខាងមុខនោះ បានប្រកាសដែរថា លោកគ្មានបំណងក្រាញអំណាចអ្វីឡើយ។ ជាមួយនឹងការពេញចិត្តការដឹកនាំរបស់ខ្លួន មេដឹកនាំរបបយោធារូបនេះសង្កត់ធ្ងន់ថា លោកមិនដែលទទួលបានផលប្រយោជន៍ពីតំណែងនាយករដ្ឋមន្ត្រីទេ ហើយលោកមិនមែនជាអ្នកជំនួញឡើយ ដូចនេះគ្មានការចាំបាច់ដើម្បីទាញប្រយោជន៍ដែរ។
បកក្រោយបន្តិចទៅកាន់ខែឧសភា ឆ្នាំ២០១៤ លោក ប្រាយុទ្ធ ដែលកាលនោះមានតំណែងជាមេបញ្ជាការកងទ័ពភូមិន្ទថៃក៏មានឥទ្ធិពល បានដឹកនាំក្រុមយោធាធ្វើរដ្ឋប្រហារទម្លាក់រដ្ឋាភិបាលស៊ីវិលដែលដឹកនាំដោយបក្សភឿថៃ។ មូលហេតុនៅពីក្រោយ គឺដោះស្រាយបញ្ហាសង្គមដែលបែកបាក់ដោយសារវិបត្តិនយោបាយរបស់ក្រុមអាវក្រហម និងក្រុមអាវលឿង។ ក្រុមប្រឹក្សាសន្តិភាព និងសណ្ដាប់ធ្នាប់ (NCPO) ក៏បង្កើតឡើងដើម្បីដឹកនាំប្រទេស។
បន្ទាប់ពីក្ដាប់អំណាចមកនោះ របបសឹកថៃបានរឹតត្បិតសកម្មភាពនយោបាយទាំងអស់ ហើយហាមការជួបជុំគ្នាទៀតផង។ របបយោធាក៏សន្យារៀបចំការបោះឆ្នោតម្ដងហើយម្ដងទៀត តែក៏ត្រូវបានលើកពេលជាបន្តបន្ទាប់ដែរ។ ទោះជាមានរដ្ឋធម្មនុញ្ញថ្មីក្នុងឆ្នាំ២០១៧ និងច្បាប់បម្រើការបោះឆ្នោតក្ដី លោក ប្រាយុទ្ធ នៅតែមិនអាចប្រាកដពីកាលបរិច្ឆេទបោះឆ្នោតដដែល ទោះជាសន្យាថា មិនឲ្យហួសពីឆ្នាំ២០១៩ ក៏ដោយ៕
Tag:
ថៃ
ប្រាយុទ្ធ ចន្ទអូចា
© រក្សាសិទ្ធិដោយ thmeythmey.com