អន្តរជាតិ
ចិនស្នើបង្កើតយន្តការអន្តរជាតិដោះស្រាយបញ្ហាសន្តិសុខដែលបង្កដោយការប្រែប្រួលអាកាសធាតុ
× តំណាងអចិន្ត្រៃយ៍របស់ចិនប្រចាំអង្គការសហប្រជាជាតិបានអំពាវនាវឲ្យសហគមន៍អន្តរជាតិគិតគូរលើការបង្កើតយន្តការអន្តរជាតិថ្មីដែលមានគោលដៅដោះស្រាយគ្រោះថ្នាក់ផ្នែកសន្តិសុខដែលកើតឡើងដោយការប្រែប្រួលអាកាសធាតុ។ មហាអំណាចសេដ្ឋកិច្ចនេះចង់សំដៅលើបញ្ហាកង្វះទឹក កង្វះស្បៀង កង្វះដីធ្លីដែលជាប្រភពនៃជម្លោះប្រដាប់អាវុធ និងកំណើនជនអន្តោប្រវេសន៍ និងជនភៀសខ្លួន។
នាកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិថ្ងៃពុធទី ១១ ខែកក្កដា លោក Ma Zhaoxu ឯកអគ្គរដ្ឋទូតចិនប្រចាំអង្គការសហប្រជាជាតិបានបង្ហាញក្តីបារម្ភរបស់ខ្លួនចំពោះផលប៉ះពាល់ផ្នែកសន្តិសុខដែលកើតឡើងដោយសារការប្រែប្រួលអាកាសធាតុសាកលនោះ។
តំណាងចិនរូបនេះលើកឡើងថា ដោយសារស្ថានភាពនេះ វាចាំបាច់ណាស់ដែលសហគមន៍អន្តរជាតិត្រូវចាប់ដៃគ្នាបង្កើតយន្តការថ្មីមួយដែលមានគោលឆ្លើយតបនឹងបញ្ហាសន្តិសុខអន្តរជាតិកើតចេញពីបាតុភូតធម្មជាតិមួយនេះដែរ។ នេះបើតាមការចុះផ្សាយរបស់ទីភ្នាក់ងារព័ត៌មានចិន Xinhua។
«ប្រទេសទាំងអស់ត្រូវចាត់វិធានការរួម ពង្រឹងកិច្ចសហប្រតិបត្តិការ ចាប់ផ្តើមដើរលើផ្លូវនៃការអភិវឌ្ឍដោយនិរន្តរភាព ដោយមានគោលដៅដោះស្រាយរាល់បញ្ហាសន្តិសុខដែលកើតចេញពីការប្រែប្រួលអាកាសធាតុ។ វាអាចមានទាំងបញ្ហាកង្វះខាតដី ទឹក អសន្តិសុខស្បៀង វិបត្តិមនុស្សជាតិ រួមទាំងវិបត្តិ ជនអន្តោប្រវេសន៍ផង»។ លោក Ma ពន្យល់ដូច្នេះ។
របាយការណ៍ស្រាវជ្រាវជាច្រើនបានព្រមានពីផលប៉ះពាល់ធំមិនធ្លាប់មានដែលបង្កើតឡើងដោយការប្រែប្រួលអាកាសធាតុ ជាពិសេសអសន្តិសុខស្បៀង កើនឡើងរលកកម្តៅ ជម្លោះប្រដាប់អាវុធ និងវិបត្តិជនអន្តោប្រវេសន៍ និងជនភៀសខ្លួនជាដើម។ របាយការណ៍របស់មូលនិធិយុត្តិធម៌បរិស្ថាន (EJF) ដែលចុះផ្សាយកាលពីដើមឆ្នាំ ២០១៨ នេះបានបង្ហាញថា វិបត្តិជនភៀសខ្លួននឹងកាន់តែធ្ងន់ធ្ងរ ដោយសារចំនួនជនភៀសខ្លួនកើនឡើងយ៉ាងហោចណាស់ ១០លាននាក់ដោយសារតែការប្រែប្រួលអាកាសធាតុនេះ។
បើតាមតំណាងក្រុងប៉េកាំងរូបនេះ យន្តការថ្មីដែលខ្លួនកំពុងស្នើនេះអាចដើរតួនាទីសំខាន់ក្នុងការពង្រឹងកិច្ចសហប្រតិបត្តិការរបស់សហគមន៍អន្តរជាតិដែលការប្រែប្រួលអាកាសធាតុ។ ភាគីពាក់ព័ន្ធនឹងផ្លាស់ប្តូរ ក៏ដូចជាពង្រឹងការសហការគ្នារកដំណោះស្រាយ និងផ្តល់ជំនួយទៅកាន់ប្រទេសកំពុងអភិវឌ្ឍតាមរយៈការចែករម្លែកបច្ចេកវិទ្យា និងជួយកសាងសមត្ថភាពជាដើម។
បោះបង់ផ្នត់គំនិតអាត្មានិយម ហើយព្យាយាមគោរពច្បាប់ និងកិច្ចព្រមព្រៀងអន្តរជាតិដោះស្រាយបញ្ហាប្រែប្រួលអាកាសធាតុដែលវានឹងអាចនាំមកនូវផលប្រយោជន៍ និងលទ្ធផលឈ្នះៗទាំងសងខាងផងដែរ។ គោរពគោលការណ៍រួមតែមានទំនួលខុសត្រូវផ្សេងគ្នានោះជាចំណុចស្នូលនៃកិច្ចព្រមព្រៀងអន្តរជាតិនេះ។
អាចថា តំណាងក្រុងប៉េកាំងទំនងជាសំដៅដល់ អាមេរិកដែលសម្រេចដើរចេញពីកិច្ចព្រមព្រៀងអាកាសធាតុក្រុងប៉ារីស (Paris Climate Agreement) កាលពីខែមិថុនាឆ្នាំមុន ដែលវាធ្វើឲ្យប្រទេសជាច្រើនភ្ញាក់ផ្អើលនិងថ្កោលទោសផងដែរ។
ទោះជាប្រទេសបំពុលបរិយាកាសធំជាងគេមួយក៏ដោយ មហាអំណាចសេដ្ឋកិច្ចចិនបានបង្ហាញឆន្ទៈក្នុងការចូលរួមដោះស្រាយបញ្ហាប្រែប្រួលអាកាសធាតុសាកលដែរតាមរយៈការប្តេជ្ញាចិត្តកាត់បន្ថយការបញ្ចេញឧស្ម័នកាបូនឌីអុកស៊ីតទៅបរិយាកាស និងជំរុញការប្រើប្រាស់ថាមពលកើតឡើងវិញ។ មហាអំណាចនេះក៏បន្តទទូចឲ្យប្រទេសដទៃទៀតបន្តរួបរួមគ្នាជាធ្លុងមួយដើម្បីបន្តដោះស្រាយបញ្ហាប្រឈមសាកលនេះដូចគ្នា។
លោក Ma Zhaoxu បានសង្កត់ធ្ងន់ដែរថា ចិនបន្តគាំទ្រកិច្ចសហប្រតិបត្តិការអន្តរជាតិលើការដោះស្រាយបញ្ហាប្រែប្រួលអាកាសធាតុនេះ និងបន្តគោរពការប្តេជ្ញាចិត្តគាំទ្រប្រទេសកំពុងអភិវឌ្ឍក្រោមក្របខណ្ឌកិច្ចសហប្រតិបត្តិការត្បូង-ត្បូងដើម្បីឲ្យពួកគេអាចមានលទ្ធភាពដោះស្រាយរាល់បញ្ហាប្រឈមនៃការប្រែប្រួលអាកាសធាតុនេះ៕
Tag:
ចិន
សន្តិសុខ
ប្រែប្រួលអាកាសធាតុ
© រក្សាសិទ្ធិដោយ thmeythmey.com