អន្តរជាតិ
លោក ត្រាំ រិះគន់នាយករដ្ឋមន្ត្រីអង់គ្លេសរឿងចរចាលែងលះពីសហភាពអឺរ៉ុប លោក ដូណាល់ ត្រាំ ជជែកជាមួយលោកស្រី ថេរ៉េសា ម៉េយ៍ មុនពិធីអាហារពេលល្ងាចនៅថ្ងៃទី១២ ខែកក្កដា (រូបភាព AFP)
× ប្រធានាធិបតីអាមេរិក ដូណាល់ ត្រាំ បាននិយាយរិះគន់ចំៗនាយករដ្ឋមន្ត្រីអង់គ្លេស ថេរ៉េសា ម៉េយ៍ ជុំវិញការចរចាចែកផ្លូវជាមួយសហភាពអឺរ៉ុប។ ក្នុងន័យមិនពេញចិត្តនឹងរបៀបចរចារបស់លោកស្រី ម៉េយ៍ ប្រធានាធិបតីអាមេរិកជឿថា អង់គ្លេសនឹងមិនអាចលែងលះដាច់ស្រេចជាមួយសហភាពអឺរ៉ុបឡើយ ហើយថែមទាំងប៉ះពាល់ដល់កិច្ចព្រមព្រៀងពាណិជ្ជកម្មទ្វេភាគីផង។ សម្ដីរិះគន់របស់លោក ត្រាំ ប្រៀបដូចជាសាំងចាក់លើភ្លើង ចំពេលមតិសាធារណៈនៅអង់គ្លេសកំពុងមិនរីករាយនឹងរឿងនេះស្រាប់ផង។
ក្នុងកិច្ចសម្ភាសជាមួយកាសែតអង់គ្លេស The Sun ដែលចេញផ្សាយនៅថ្ងៃទី១២ ខែកក្កដា ប្រធានាធិបតីអាមេរិក ដូណាល់ ត្រាំ បាននិយាយដោយមិនលាក់លៀមថា អង់គ្លេសនឹងមិនអាចសម្រេចបានកិច្ចព្រមព្រៀងពាណិជ្ជកម្មជាមួយអាមេរិកឡើយ បើរដ្ឋាភិបាលនាយករដ្ឋមន្ត្រី ថេរ៉េសា ម៉េយ៍ បន្តអនុវត្តតាមផែនការ Brexit ទៀតនោះ។ ផែនការ Brexit ដែលគណៈរដ្ឋមន្ត្រីអង់គ្លេសអនុម័តកាលពីសប្ដាហ៍មុន រងការរិះគន់ថា ទន់ខ្សោយដែលអាចធ្វើឲ្យអង់គ្លេសនៅបន្តវាក់វិនជាមួយអឺរ៉ុបដដែល។
ក៏ព្រោះតែរឿងនេះ រដ្ឋាភិបាលអង់គ្លេសបានបាត់បង់មន្ត្រីជាន់ខ្ពស់ដល់ទៅបីរូប ដែលមិនពេញចិត្តនឹងជំហររបស់លោកស្រី ម៉េយ៍ ព្រោះអង់គ្លេសអាចបាត់បង់សិទ្ធិគ្រប់គ្រងសេដ្ឋកិច្ចដូចដែលមាននៅពេលសព្វថ្ងៃនេះ។ ដោយចង់សំដៅផែនការចាកចេញរបស់អង់គ្លេស លោក ត្រាំ និយាយថា ប្រសិនបើអង់គ្លេសមានកិច្ចព្រមព្រៀងបែបនោះជាមួយអឺរ៉ុប អាមេរិកនឹងទៅជជែកជាមួយសហភាពអឺរ៉ុបជំនួសវិញ ហើយវានឹងសម្លាប់កិច្ចព្រមព្រៀងពាណិជ្ជកម្មតែម្ដង។
មិនត្រឹមរិះគន់គោលនយោបាយឡើយ លោក ត្រាំ ក៏វាយប្រហារលោកស្រី ម៉េយ៍ ដែលមិនស្ដាប់យោបល់របស់លោកជុំវិញការចរចានេះ ខណៈលោកចង់ឲ្យអង់គ្លេសជ្រើសរើសផ្លូវផ្សេងពីនេះ។ ក្នុងកិច្ចសម្ភាសដដែល មេដឹកនាំអាមេរិករូបនេះបញ្ជាក់ថា៖ «ខ្ញុំអាចសម្រេចលទ្ធផលខុសពីនេះ។ ខ្ញុំបានបប្រាប់លោកស្រី ម៉េយ៍ ពីមធ្យោបាយដោះស្រាបញ្ហានេះ ប៉ុន្តែគាត់មិនយល់ស្រប ហើយក៏មិនស្ដាប់ឡើយ។ គាត់បានចង់បានផ្លូវផ្សេង។»
ជុំវិញបញ្ហានេះ លោកស្រី ម៉េយ៍ ផ្ទាល់ធ្លាប់បាននិយាយការពារផែនការ Brexit នេះ ដោយថា វានឹងអនុញ្ញាតឲ្យចក្រភពអង់គ្លេសអាចបង្កើតកិច្ចព្រមព្រៀងពាណិជ្ជកម្មជាមួយប្រទេសផ្សេង ក្រោយការចាកចេញពីសហភាពអឺរ៉ុបនៅខែមីនា ឆ្នាំ២០១៩ ។ សម្រាប់ប្រមុខរដ្ឋាភិបាលអង់គ្លេស ការចាកចេញពីសហភាពអឺរ៉ុប គឺជាឱកាសសម្រាប់អង់គ្លេស និងអាមេរិក ក្នុងការបង្កើតកិច្ចព្រមព្រៀងពាណិជ្ជកម្មសេរីទ្វេភាគី។
ការចាក់ផ្សាយកិច្ចសម្ភាសនេះ ធ្វើឡើងស្របពេលដែលលោក ត្រាំ កំពុងធ្វើទស្សនកិច្ចលើកដំបូងនៅអង់គ្លេស។ បន្ថែមពីលើការរិះគន់លោកស្រី ម៉េយ៍ លោក ត្រាំ បែរជានិយាយថា លោក បូរីស ចនសុន ដែលទើបលាលែងពីតំណែងរដ្ឋមន្ត្រីការបរទេស អាចធ្វើជានាយករដ្ឋមន្ត្រីអស្ចារ្យទៀតផង។ មេដឹកនាំអាមេរិកក៏ឆ្លៀតរិះគន់អភិបាលក្រុងឡុងដ៏ Sadiq Khan ដែលបើកផ្លូវឲ្យមានការធ្វើបាតុកម្មទ្រង់ទ្រាយធំប្រឆាំងទស្សនកិច្ចរបស់លោកផង៕
Tag:
អាមេរិក
អង់គ្លេស
អឺរ៉ុប
Brexit
ដូណាល់ ត្រាំ
ថេរ៉េសា ម៉េយ៍
© រក្សាសិទ្ធិដោយ thmeythmey.com