អន្តរជាតិ
គីម ផ្ញើសំបុត្រឲ្យ ត្រាំ តែមិននិយាយរឿងរំសាយនុយក្លេអ៊ែរសូម្បីមួយម៉ាត់ លោក គីម ជុងអ៊ុន និងលោក ដូណាល់ ត្រាំ នាជំនួបនៅសិង្ហបុរី (រូបភាព AFP)
× ប្រធានាធិបតីអាមេរិក ដូណាល់ ត្រាំ នៅថ្ងៃទី១២ ខែកក្កដា បានបង្ហោះរូបភាពសំបុត្រដែលផ្ញើដោយមេដឹកនាំកំពូលកូរ៉េខាងជើង គីម ជុងអ៊ុន ។ អត្ថន័យក្នុងសំបុត្រនេះមិនបាននិយាយអ្វីមួយម៉ាត់ជុំវិញការរំសាយនុយក្លេអ៊ែរឡើយ តែបានលើកឡើងពីការប្រឹងប្រែងរបស់មេដឹកនាំទាំងពីរ និងក្ដីសង្ឃឹមក្នុងការឈានទៅបង្កើតទំនាក់ទំនងទ្វេភាគីមួយដ៏ល្អប្រសើរ។ ប៉ុន្តែសម្រាប់លោក ត្រាំ សំបុត្រមួយច្បាប់នេះ ពិតជាមានអត្ថន័យធំធេងណាស់។
កូរ៉េខាងជើង បានបង្ហាញអាកប្បកិរិយាសោះអង្គើយដាក់មន្ត្រីអាមេរិករាប់ទាំងរដ្ឋមន្ត្រីការបរទេស ម៉ៃ ប៉ុមប៉េអូ និងការឲ្យមន្ត្រីអាមេរិកអង្គុយចាំនៅឯជំនួបមួយនៅតំបន់គ្មានកងទ័ពនៅដើមសប្ដាហ៍នេះ។ ប៉ុន្តែចំពោះប្រធានាធិបតី ដូណាល់ ត្រាំ វិញ កូរ៉េខាងជើង បានបង្ហាញការគោរពគួរឲ្យកត់សម្គាល់។ ប្រមុខដឹកនាំកូរ៉េខាងជើង គីម ជុងអ៊ុន បានផ្ញើសំបុត្រឲ្យលោក ត្រាំ តាមរយៈលោក ប៉ុមប៉េអូ ដែលធ្វើទស្សនកិច្ចនៅរដ្ឋធានីព្យុងយ៉ាងកាលពីសប្ដាហ៍មុន។
តាមរយៈ Twitter របស់ខ្លួន លោក ត្រាំ បានបញ្ចេញខ្លឹមសារក្នុងសំបុត្រលោក គីម ដែលសរសេរជាភាសាកូរ៉េ និងបកប្រែជាភាសាអង់គ្លេស ហើយសរសេរសារភ្ជាប់ថា ដំណើរការអស្ចារ្យកំពុងកើតឡើង។ អ្វីគួរឲ្យចាប់អារម្មណ៍នោះ មេដឹកនាំកូរ៉េខាងជើងមិនបានលើកឡើងសូម្បីតែបន្តិចពាក់ព័ន្ធសកម្មភាពរបស់របបក្រុងព្យុងយ៉ាងក្នុងការរំសាយនុយក្លេអ៊ែរ ទោះជាវាជាប្រធានបទសំខាន់ក្នុងជំនួបប្រវត្តិសាស្ត្ររវាមេដឹកនាំអាមេរិក និងកូរ៉េខាងជើងនៅថ្ងៃទី១២ ខែមិថុនា នៅឯសិង្ហបុរី។
ក្នុងសារភាសាអង់គ្លេសដែលមានបួនកថាខណ្ឌ លោក គីម បានសរសើរលោក ត្រាំ ដែលប្រឹងប្រែងជាខ្លាំងក្នុងការជំរុញទំនាក់ទំនងប្រទេសទាំងពីរ ក៏ដូចជាការអនុវត្តសេចក្ដីថ្លែងការណ៍រួមផង។ លោកចង់សំដៅដល់សេចក្ដីថ្លែងការណ៍ក្រោយជំនួបនៅសិង្ហបុរី ដែលមេដឹកនាំទាំងពីរឯកភាពគ្នាសម្រេចឲ្យបានគោលដៅរំសាយនុយក្លេអ៊ែរពីឧបទ្វីបកូរ៉េ។ លោក គីម ក៏សង្ឃឹមថា ជាមួយនឹងឆន្ទៈរឹងមាំ និងការស្មោះត្រង់ ការបើកចំហអនាគតរវាងកូរ៉េខាងជើង និងអាមេរិក នឹងលេចចេញជាផ្លែផ្កាមិនខាន។
យ៉ាងណាមិញ សាររបស់លោក គីម ដែលមានអត្ថន័យវិជ្ជមាននេះ ពិតជាមិនអាចលាក់បាំងការខ្វែងគំនិតរវាងកូរ៉េខាងជើង និងអាមេរិកលើរឿងលុបបំបាត់នុយក្លេអ៊ែឡើយ។ មកទល់ពេលនេះ ក្រុងព្យុងយ៉ាងមិនទាន់ចាត់វិធានការអ្វីតាមកិច្ចព្រមព្រៀងនៅសិង្ហបុរីឡើយ ខណៈក្រុងវ៉ាស៊ីនតោននៅតែរំអុកឲ្យរដ្ឋកុម្មុយនីស្តមួយនេះធ្វើសកម្មភាពជាក់ស្ដែងផង។ ការទាមទាររបស់អាមេរិកធ្វើឲ្យកូរ៉េខាងជើងខឹងសម្បារយ៉ាងខ្លាំង និងចាត់ទុកជាសកម្មភាពរបស់ជើងកាងទៅទៀត។
ក្រៅពីសំណុំរឿងរំសាយនុយក្លេអ៊ែរ គេក៏មិនទាន់ឃើញមានលទ្ធផលអ្វីទៀតដែរលើបញ្ហាសំខាន់ៗដែលត្រូវបានឯកភាពគ្នានៅសិង្ហបុរី ជាពិសេសរឿងបញ្ជូនធាតុទាហានអាមេរិកទៅស្រុកកំណើតវិញ ទោះជាលោក គីម សន្យាថា នឹងប្រគល់ឲ្យអាមេរិកវិញក្ដី។ ក្នុងសប្ដាហ៍នេះ មន្ត្រីកូរ៉េខាងជើងបានទុកឲ្យមន្ត្រីអាមេរិកអង្គុយចាំឥតប្រយោជន៍ក្នុងជំនួបស្ដីពីបញ្ហាមួយនេះនៅតំបន់ខណ្ឌចែកឧបទ្វីបកូរ៉េ។ យ៉ាងណាមិញ ភាគីទាំងសងខាងនឹងជួបគ្នាម្ដងទៀតនៅចុងសប្ដាហ៍នេះ៕
Tag:
កូរ៉េខាងជើង
អាមេរិក
គីម ជុងអ៊ុន
ដូណាល់ ត្រាំ
នុយក្លេអ៊ែរ
© រក្សាសិទ្ធិដោយ thmeythmey.com