អន្តរជាតិ
UN ដាក់ទណ្ឌកម្មហ៊ុមព័ទ្ធការទិញដូរអាវុធកូនពៅខ្លួន ដ្បិតការបំពានសិទ្ធិមនុស្សធ្ងន់ធ្ងរពេក
× ក្រុមប្រឹក្សាសន្តិសុខអង្គការសហប្រជាជាតិ បានសម្រេចអនុម័តទណ្ឌកម្មថ្មីមួយប្រឆាំងនឹងប្រទេសស៊ូដង់ខាងត្បូង ខណៈស្ថានភាព នៃរដ្ឋវ័យក្មេងបំផុតរបស់ពិភពលោកមួយនេះ ពោរពេញទៅដោយភាពអសន្តិសុខ និងការបំពានសិទ្ធិមនុស្សធ្ងន់ធ្ងរ។
តាមរយៈសេចក្តីសម្រេច ដែលបោះឆ្នោតអនុម័តគាំទ្រដោយរដ្ឋសមាជិកចំនួន៩ និង៦រដ្ឋផ្សេងទៀត បោះឆ្នោតអនុប្បវាទ ក្រុមប្រឹក្សាសន្តិសុខ នៅថ្ងៃ១៣ កក្កដាកន្លងទៅ បានសម្រេចដាក់ទណ្ឌកម្មហ៊ុមព័ទ្ធការធ្វើពាណិជ្ជកម្មសព្វាវុធលើស៊ូដង់ខាងត្បូង។ សេចក្តីសម្រេចនេះ ត្រូវអនុវត្តរហូតដល់ថ្ងៃ៣១ ឧសភា ឆ្នាំ២០១៩ ដែលរដ្ឋសមាជិកអង្គការសហប្រជាជាតិទាំងអស់ត្រូវតែអនុវត្តឲ្យបានខ្ជាប់ខ្ជួនដូចគ្នាផងដែរ។
តាមការចុះផ្សាយរបស់មជ្ឈមណ្ឌលព័ត៌មានអង្គការសហប្រជាជាតិ សេចក្តីសម្រេចនេះ តម្រូវឲ្យគ្រប់សមាជិកទាងអស់ធានាឲ្យបានការទប់ស្កាត់អាវុធ និងសព្វាវុធពាក់ព័ន្ធគ្រប់ប្រភេទមិនឲ្យចូលទៅក្នុងទឹកដីរបស់ស៊ូដង់ខាងត្បូងបានឡើយ។ មិនត្រឹមតែប៉ុណ្ណោះ ក្រុមប្រឹក្សាសន្តិសុខ ក៏បានដាក់បម្រាមធ្វើដំណើរ និងបង្កកទ្រព្យសម្បត្តិមន្ត្រីជាន់ខ្ពស់ស៊ូដង់ខាងត្បូងដែលពាក់ព័ន្ធហិង្សាក្នុងប្រទេសផងដែរ។
តាមប្រភពព័ត៌មានដដែល នាឱកាសនៃការអនុម័តសេចក្តីសម្រេចនោះ លោកស្រីអគ្គរដ្ឋទូតអាមេរិក Nikki Haley បានថ្លែងចំណាប់អារម្មណ៍យ៉ាងដូច្នេះ៖«ប្រសិនបើចង់ជួយប្រជាជនស៊ូដង់ខាងត្បូង យើងត្រូវតែបញ្ឈប់ហិង្សា។ ហើយដើម្បីបញ្ឈប់ហិង្សា យើងត្រូវតែបញ្ឈប់លំហូរនៃអាវុធទៅកាន់ក្រុមប្រដាប់អាវុធ ដែលពួកគេ កំពុងតែវាយប្រហារគ្នាបង្កជាការគំរាមកំហែងដល់ប្រជាជន។»
សូមជម្រាបផងដែរថា ស៊ូដង់ខាងត្បូង ទើបតែទទួលបានឯករាជ្យពេញលេញនៅក្នុងឆ្នាំ២០១១ បន្ទាប់ពីអង្គការសហប្រជាជាតិ បានប្រកាសទទួលស្គាល់ជារដ្ឋសមាជិកចុងក្រោយរបស់ខ្លួន។ រយៈពេលប៉ុន្មានឆ្នាំក្រោយនៃការប្រកាសឯករាជ្យនេះ រដ្ឋអាហ្វ្រិកក្រីក្របំផុតមួយនេះ មិនទាន់មានស្ថិរភាព និងសន្តិភាពនៅក្នុងប្រទេសនៅឡើយនោះទេ។ អ្នកនយោបាយ មានប្រដាប់អាវុធរៀងៗខ្លួន បន្តដណ្តើមអំណាចគ្នា។
បើតាមរបាយការណ៍របស់ភ្នាក់ងារជំនាញអង្គការសហប្រជាជាតិ ដោយសារតែការមិនត្រូវរ៉ូវគ្នារបស់អ្នកនយោបាយស៊ូដង់ខាងត្បូង ធ្វើឲ្យក្មេងជំនាន់ក្រោយរាប់លាននាក់ ស្គាល់តែសង្គ្រាម ខណៈជនភៀសខ្លួនទៅកាន់ប្រទេសជិតខាង ក៏កាន់តែកើនឡើង។ ជាពិសេសនោះ បញ្ហាសិទ្ធិមនុស្ស រួមមានទាំងការសម្លាប់ជនស៊ីវិល ការបង្ខំឲ្យចាកចេញពីលំនៅ និងការរំលោភជាដើមនោះ បានកើតឡើងស្ទើរតែពាសពេញប្រទេស៕
Tag:
ស៊ូដង់ខាងត្បូង
សិទ្ធិមនុស្ស
© រក្សាសិទ្ធិដោយ thmeythmey.com