កីឡាអន្តរជាតិ
អន្តរជាតិ
២៣នាក់របស់បារាំង មានតម្លៃថ្លៃជាងគេបំផុតនៅ World Cup 2018 រូបភាព ពី FIFA
× ក្នុងនាមជាម្ចាស់ជើងឯកពាន់រង្វាន់កីឡាបាល់ទាត់ពិភពលោក FIFA World Cup 2018 នៅរុស្ស៊ី ជម្រើសជាតិបារាំងក៏ជាក្រុមដែលមានសមាសភាពកីឡាករថ្លៃជាងគេបំផុត ក្នុងចំណោមក្រុមទាំង៣២ ខណៈអេស្ប៉ាញ ប្រេស៊ីល អាល្លឺម៉ង់ និងអង់គ្លេសស្ថិតនៅលេខរៀងបន្តបន្ទាប់ដែលមានតម្លៃលើសពី១ពាន់ដុល្លារឡើងទៅ។
ប្រាក់ ១២៧៤ លានដុល្លារអាមេរិក អាចទិញកោះឯកជនដល់ទៅពីរនៅឯឆ្នេរសមុទ្រក្នុងក្រុង Miami សហរដ្ឋអាមេរិក យន្តហោះឯកជនពីរគ្រឿង កប៉ាលកំសាន្តបែបឯកជនមួយគ្រឿង រថយន្ដទំនើបៗ ដែលធ្វើឲ្យជីវិតរស់នៅរបស់អស់លោកអ្នកប្រកបទៅដោយភាពរុងរឿង។ យ៉ាងណាមិញ ប្រាក់ជាងមួយពាន់លានដុល្លារនេះ លោកអ្នកក៏អាចធ្វើជាម្ចាស់ក្រុមកីឡាបាល់ទាត់ជម្រើសជាតិបារាំងដែលមានសមាជិក២៣នាក់នាពេលបច្ចុប្បន្ននេះផងដែរ។
បើតាមទិន្ន័យ BloombergQuint ដែលបានសិក្សាលើតម្លៃខ្លួនកីឡាករម្នាក់ៗនៅតាមបណ្តាក្លិបនានាលើពិភពលោក ក្រៅពីបារាំងដែលមានតម្លៃ ១២៧៤ លានដុល្លារ មានក្រុជម្រើសជាតិ៤ទៀតរួមមានម្ចាស់ជើងឯកឆ្នាំ២០១០អេស្ប៉ាញស្ថិតនៅលេខ២មានតម្លៃ ១២១៩លានដុល្លារ លេខ៣ ប្រេស៊ីល ១១៥៩លានដុល្លារ លេខ៤ ម្ចាស់ជើងឯកឆ្នាំ២០១៤ អាល្លឺម៉ង់ ១០៤១លានដុល្លារ និងលេខ៥ អង់គ្លេស ១០៣១លានដុល្លារ។
អ្វីដែលនាំឲ្យក្រុមរបស់លោក Didier Deschamps មានតម្លៃថ្លៃជាងគេប្រចាំព្រឹត្តិការណ៍កីឡាបាល់ទាត់ពិភពលោកនៅរុស្ស៊ីនេះ ដោយសារក្រុមរហស្សនាមមាន់គកមានសមាសភាពកីឡាករល្បីៗដូចជា Kylian Mbappe ខ្សែប្រយុទ្ធក្លិប Paris Saint Germain មានតម្លៃខ្លួន ១៤១លានដុល្លារ, Antoine Griezmann សមាជិកក្រុម Atletico Madrid តម្លៃ ១១៨ លានដុល្លារ, Paul Pogba ខ្សែបម្រើ Manchester United មានតម្លៃខ្លួន ១០៦លានដុល្លារ និង Ousmane Dembélé របស់ Barcelona ដែលមានតម្លៃលើសពី១០០លានដុល្លារដែរ។
ចំណែក អេស្ប៉ាញមិនមានឡើយកីឡាករសូម្បីតែម្នាក់ដែលមានតម្លៃលើសពី ១០០លានដុល្លារ ប៉ុន្តែពួកគេមានកីឡាករតម្លៃជាមធ្យមគឺ ៥៣លានដុល្លារ ដែលនាំឲ្យម្ចាស់ជើងឯកឆ្នាំ២០១០ ស្ថិតនៅចំណាត់ថ្នាក់ទី២។
រីឯ ម្ចាស់ជើងឯក៥សម័យ ប្រេស៊ីលដែលឈរនៅលេខរៀងទី៣ ដោយសារពួកគេមាន Neymar ដែលមានតំលៃខ្លួនខ្ពស់បំផុតលើលោក ២១២លានដុល្លារ រូមទាំង Coutinho ដែលថ្លៃលើសពី១០០លានដុរល្លារដែរ។
Toni Kroos ជាកីឡករថ្ងៃជាងគេរបស់អាល្លឺម៉ង់ ៩៥លានដុល្លារ ហើយពួកគេក៏មានកីឡាករថ្លៃៗផ្សេងទៀតជាច្រើនផងដែរ។ ក្រុមលេខ៥ អង់គ្លេស ព្រោះពួកគេមានប្រធានក្រុមខ្លួន Harry Kane ដែលបានស្បែកជើងមាសនៅ World Cup លើកនេះមានតម្លៃខ្លួនរហូតដល់ ១៧៧លានដុល្លារ។
ដោយឡែក សមាសភាពកីឡាករ២៣រូប មានតម្លៃទាបជាងគេបំផុតត្រឹម១០លានដុល្លារ គឺប៉ាណាម៉ា ដែលទើបមានវត្តមានលើកដំបូងនៅ World Cup នៅរុស្ស៊ីនេះ៕
Tag:
បាល់ទាត់
FIFA World Cup
© រក្សាសិទ្ធិដោយ thmeythmey.com