ជាតិ
បោះឆ្នោត
ក្នុងសម័យបោះឆ្នោត២០១៨ បក្សប្រជាជនកម្ពុជានៅតែជាតួអង្គដ៏ចម្រូងចម្រាស
× ភ្នំពេញ៖ ថ្ងៃបោះឆ្នោតជិតមកដល់។ គណបក្សនយោបាយនីមួយៗ កំពុងផ្សព្វផ្សាយកម្មវិធីនយោបាយខ្លួន ដើម្បីទាញបេះដូងអ្នកបោះឆ្នោត។ គណបក្សប្រជាជនកម្ពុជាកាន់អំណាចដែលសម្បូរធនធានបានបង្ហាញសាច់ដុំមាំទាំតាមរយៈសកម្មភាពដង្ហែក្បួន និងការជួបសមាជិកតាមមូលដ្ឋានរាល់ថ្ងៃ។ គណបក្សនេះត្រូវបានគេមើលឃើញថា អាចទទួលបានសំឡេងច្រើន បើសិនជាគណបក្សនេះគ្រាន់តែអាចរក្សាចំនួនសមាជិករបស់ខ្លួនដែលធ្លាប់ត្រូវបានផ្សព្វផ្សាយថាមានប្រមាណ៥លាននាក់នោះ។
គណបក្សប្រជាជនកម្ពុជាដ៏ចំណាស់ជាងគេ ហើយដែលទើបតែប្រារព្ធខួបកំណើតទី៦៧ (២៨មិថុនាឆ្នាំ១៩៥១) នៅចំថ្ងៃដំបូងនៃយុទ្ធនាការឃោសនាបោះឆ្នោតនោះ តែងបានធ្វើជារដ្ឋាភិបាលចាំផ្ទះនៅរៀងរាល់ក្នុងរយៈពេលនៃរៀបចំការបោះឆ្នោតជ្រើសតាំងតំណាងរាស្ត្រពីនីតិកាលមួយទៅនីតិកាលមួយ។ ជាអ្នកឈ្នះឆ្នោតដឹកនាំរដ្ឋាភិបាល (លើកលែងតែក្នុងនីតិកាលទីមួយ) គណបក្សប្រជាជនកម្ពុជារបស់សម្តេចនាយករដ្ឋមន្ត្រី ហ៊ុន សែន ត្រូវការពាខ្សែក្រវ៉ាត់ ដោយត្រូវទប់ទល់ផង និងប្រកួតយកឈ្នះផង។ ជាអ្នកដឹកនាំរដ្ឋាភិបាល ក្នុងរយៈពេល៥ឆ្នាំម្តងៗ គណបក្សនេះតែងត្រូវបានវាយប្រហារ រិះគន់ ដោយគូប្រកួតទៅលើរាល់ចំណុចខ្សោយ ទាំងនៅក្នុងការងារកសាងលទ្ធិប្រជាធិបតេយ្យនិយាយជារួម និងការងារដឹកនាំប្រទេសនិយាយដោយឡែក។
ពីយុទ្ធនាការបោះឆ្នោតមួយ ទៅយុទ្ធនាការបោះឆ្នោតមួយ គណបក្សកាន់អំណាចរាល់អាណត្តិមួយនេះ តែងត្រូវប្រឈមនឹងផលប៉ះពាល់ដែលកើតចេញពីចំណាត់ការរបស់ខ្លួននៅចុងអាណត្តិ។ ពិសេសចំណាត់ការលើគណបក្សប្រឆាំង។ បើសិនជាគេនៅចាំាបាន ក្រោយពេលចេញលទ្ធផលបោះឆ្នោត កម្ពុជាត្រូវដោះស្រាយជម្លោះនយោបាយ។
មកដល់ពាក់កណ្តាលនៃយុទ្ធនាការបោះឆ្នោតជ្រើសតាំងតំណាងរាស្ត្រនីតិកាលទី៦នេះ វាពុំមានវត្តមាននៃគណបក្សប្រឆាំងដ៏មានឥទ្ធិពល ដោយសារតែគណបក្សនយោបាយមួយនេះត្រូវបានរំលាយដោយសាលដីកាតុលាការកំពូលមែន ប៉ុន្តែគណបក្សប្រជាជនកម្ពុជារឹតតែមិនអាចនៅសំងំសុខបាន។ ក្រៅពីតាមដាន និងទប់ទល់នឹងសម្ពាធបរទេសមួយចំនួន រួមទាំងចលនានៃក្រុមនយោបាយប្រឆាំងដែលប្រើប្រាស់បណ្តាញសង្គមសម្រាប់ការឃោសនាមហាជនប្រឆាំងនឹងរដ្ឋាភិបាលចាំផ្ទះ គណបក្សប្រជាជនកម្ពុជានៅបារម្ភអំពីចំនួននៃអ្នកចូលរួមបោះឆ្នោត។ បាត់គណបក្សនយោបាយដ៏ធំមួយដែលមានអ្នកគាំទ្ររបស់គេនោះ តើវានឹងបាត់បង់ចំនួនអ្នកបោះឆ្នោតនោះទាំងដុលដែរឬទេ? ចំនួននៃការចូលរួមបោះឆ្នោត មិនមែនថាមិនសំខាន់នោះឡើយ។ វាជាធាតុមួយក្នុងចង្កោមមូលហេតុនៃជោគជ័យនៃការបោះឆ្នោតមួយ។ ឬក៏ថា គណបក្សប្រជាជនកម្ពុជាមិនខ្វាយខ្វល់?
មានលទ្ធភាពច្រើនដែលថា គណបក្សប្រជាជនកម្ពុជាអាចទទួលបានអាសនៈច្រើនក្នុងរដ្ឋសភា ប៉ុន្តែអវត្តមាននៃគណបក្សនយោបាយមួយដែលមានការគាំទ្រដ៏សំខាន់ដែរនោះ វានឹងមិនធ្វើឲ្យសហគមន៍អន្តរជាតិមួយចំនួននៅស្ងៀមឡើយ នៅក្រោយការបោះឆ្នោត។ សហភាពអឺរ៉ុប កំពុងតែជាប្រធានបទនៃក្តីបារម្ភមួយ ដែលការសម្រេចរបស់ពួកគេទាក់ទងនឹងការព្យួរ ឬលប់ប្រព័ន្ធអនុគ្រោះពន្ធនោះ នឹងជះផលអវិជ្ជមានមកលើសេដ្ឋកិច្ចកម្ពុជា។
និយាយអំពីអាសនៈក្នុងរដ្ឋសភាដដែល តើលទ្ធផលបោះឆ្នោតខាងមុខនេះនឹងបង្ហាញយ៉ាងណា? តើគណបក្សប្រជាជនកម្ពុជានឹងទទួលបានអាសនៈប៉ុន្មាន? តើវានឹងអាចមានគណបក្សនយោបាយផ្សេងៗលើសពីគណបក្សប្រជាជនកម្ពុជានៅក្នុងរដ្ឋសភាដែរឬទេ?
ទោះយ៉ាងណាក៏ដោយ តាំងពីមានការបោះឆ្នោតជ្រើសតាំងតំណាងរាស្ត្រមក វាពុំដែលមានគណបក្សនយោបាយណាមួយឈ្នះយកអាសនៈរដ្ឋសភា១០០ភាគរយឡើយ។ គិតចាប់ពីឆ្នាំ១៩៩៣ ដែលកម្ពុជាមានការបោះឆ្នោតជាលើកដំបូង ដោយមានការរៀបចំពីអាជ្ញាធរអន្តរកាល ហៅកាត់ថាអ៊ុនតាក់ មានគណបក្សចំនួន៤ ទទួលបានកៅអីរដ្ឋសភា ដែលក្នុងនោះគណបក្សហ្វ៊ុនស៊ិនប៉ិច មាន៥៨អាសនៈ គណបក្សប្រជាជនកម្ពុជា ៥១ អាសនៈ គណបក្សប្រជាធិបតេយ្យសេរីនិយមព្រះពុទ្ធសាសនា ១០អាសនៈ និងគណបក្សមូលីណាកានិងអ្នកតស៊ូខ្មែរដើម្បីសេរីភាព ១ អាសនៈ។ លទ្ធផលបោះឆ្នោតនៅ ឆ្នាំ១៩៩៨ គណបក្សប្រជាជនកម្ពុជា ឈ្នះឆ្នោតដឹកនាំរដ្ឋសភា ដោយទទួលបាន៦៤ អាសនៈ គណបក្សហ្វ៊ុនស៊ិនប៉ិច៤៣ អាសនៈ និងគណបក្សសមរង្ស៊ី ១៥ អាសនៈ។ ការបោះឆ្នោតនៅឆ្នាំ២០០៣ គណបក្សប្រជាជននៅតែឈ្នះដដែល ដោយចំនួនអាសនៈរដ្ឋសភាបានកើនឡើងដល់៧៣ គណបក្សសមរង្ស៊ី កើនដល់បាន២៤ និងអាសនៈគណបក្សហ្វ៊ុនស៊ីនប៉ិចបានធ្លាក់ចុះមកនៅ២៦។
ក្នុងនីតិកាលទី៤នៃឆ្នាំ២០០៨ គណបក្សប្រជាជនកម្ពុជា បានឈ្នះឆ្នោតភ្លូកទឹកភ្លូកដី ដោយទទួលបានអាសនៈក្នុងរដ្ឋសភា ៩០ (លើស២ភាគ៣) គណបក្សសមរង្ស៊ីទទួលបាន២៦ គណបក្សសិទ្ធិមនុស្សទទួលបាន៣ គណបក្សនរោត្តម រណឫទ្ធិទទួលបាន២ និងគណបក្សហ្វ៊ុនស៊ិនប៉ិចទទួលបាន២។ ប៉ុន្តែអាសនៈរដ្ឋសភាដ៏ច្រើនលើសលប់របស់គណបក្សប្រជាជនកម្ពុជាបានធ្លាក់មកនៅ៦៨វិញ នៅក្នុងការបោះឆ្នោត២០១៣ ហើយគណបក្សសង្គ្រោះជាតិ ដែលបង្កើតដោយគណបក្សពីររួមបញ្ចូលគ្នា រវាងគណបក្សសមរង្ស៊ី និងគណបក្សសិទ្ធិមនុស្ស ទទួលបានអាសនៈរដ្ឋសភាចំនួន៥៥ ។ មានតែគណបក្សពីរនេះទេ ដែលទទួលបានអាសនក្នុងរដ្ឋសភា នៅក្នុងនីតិកាលទី៥នេះ៕
Tag:
CPP
រដ្ឋសភា
បោះឆ្នោត
© រក្សាសិទ្ធិដោយ thmeythmey.com