ជាតិ
នាយកដ្ឋានប្រយុទ្ធនឹងជំងឺឆ្លង ប្រាប់វិធីបង្ការគ្រោះថា្នក់ ដោយសារទឹកជំនន់ រូបភាពពី នាយកដ្ឋានប្រយុទ្ធនឹងជំងឺឆ្លង CDC
× ភ្នំពេញ៖ ភ្លៀងធា្លក់ក្នុងរយៈពេលប៉ុន្មានថ្ងៃចុងក្រោយនេះ ធ្វើឲ្យបណ្តាខេត្តមួយចំនួនគ្របដណ្តប់ដោយទឹកជំនន់។ នាយកដ្ឋានប្រយុទ្ធនឹងជំងឺឆ្លង (CDC) នៃក្រសួងសុខាភិបាល បានប្រកាសសេចក្តីជូនដំណឹងដល់ពលរដ្ឋឲ្យបង្កើនការប្រុងប្រយ័ត្នខ្ពស់ ដើម្បីជៀសផុតពីគ្រោះថ្នាក់ និងបង្ការជំងឺឆ្លងផ្សេងៗ ពីទឹកជំនន់។
នាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានប្រកាសឲ្យប្រជាពលរដ្ឋការពារខ្លួនពេលមានភ្លៀងធា្លក់ខ្លាំង ហើយបណ្តាលឲ្យមានលិចទឹកនៅតាមមូលដ្ឋាននានា ដើម្បីចៀសផុតពីជំងឺរាតត្បាតផ្សេងៗ ដែលកើតឡើងជាយថាហេតុ។ នេះបើតាមសេចក្តីជូនដំណឹងរបស់នាយកដ្ឋានប្រយុទ្ធនឹងជំងឺឆ្លង បានចេញផ្សាយនៅថ្ងៃទី១៨ ខែកក្កដា។
នាយកដ្ឋានប្រយុទ្ធនឹងជំងឺឆ្លង បានណែនាំពីការប្រុងប្រយ័ត្នក្នុងអំឡុងមានទឹកជំនន់។ វិធីទាំងនោះរួមមាន៖ ពលរដ្ឋត្រូវតាមដានស្ថានភាពទឹកជំនន់, ត្រៀមរកទួលសុវត្ថិភាព, កុំបើកបរលើទឹកជំនន់, កុំហែលលេងទឹកជំនន់(ជៀសវាងការលង់ទឹក), កុំប្រើដៃផ្ទាល់ទៅកាយកន្លែងទួល ឬពុំនូកនានា (ជៀសវាងពស់ចឹក), ផ្តាច់ចរន្តអគ្គិសនី និងដឹងពីរបៀបការពារកុំឲ្យឆក់, ជាតិពុលនានា ដាក់ឲ្យខ្ពស់ពីទឹកលិច ដើម្បីជៀសវាងពុលដល់មនុស្ស និងសត្វ, ប្រើប្រាស់ទឹកស្អាត និងផឹកទឹកឆ្អិនជានិច្ច, ហើយចំណីអាហារត្រូវគ្របឲ្យត្រឹមត្រូវ ដើម្បីជៀសវាងពីជំងឺរាគមួល។
ក្រៅពីនេះ នាយកដ្ឋានប្រយុទ្ធនឹងជំងឺឆ្លង ណែនាំបន្ថែមថា ពលរដ្ឋត្រូវបង្ការជំងឺឆ្លងផ្សេងៗ ដូចជា ជំងឺគ្រុនពោះវៀន, អាសន្នរោគ, ជំងឺពុលចំណីអាហារ, ជំងឺរលាកថ្លើមប្រភេទA, ជំងឺបណ្តាលមកពីព្រូន, ជំងឺលិបតូ, ជំងឺគ្រុនចាញ់, ជំងឺផ្តាសាយធំ, ជំងឺរមាស់ស្បែក និងជំងឺភ្នែកក្រហម។
នាយកដ្ឋានប្រយុទ្ធនឹងជំងឺឆ្លង បានប្រកាសទូរសព្ទលេខ ១១៥ ដើម្បីឲ្យពលរដ្ឋទាក់ទងបន្ថែមទៀតជុំវិញបញ្ហាផ្សេងៗ ដែលបានកើតឡើង៕
Tag:
CDC
ជំងឺឆ្លង
ទឹកជំនន់
© រក្សាសិទ្ធិដោយ thmeythmey.com