អន្តរជាតិ
ព្រះមហាក្សត្រថៃ អញ្ជើញក្រុមអ្នកជួយសង្គ្រោះកុមារពីរូងភ្នំ ជប់លៀងដើម្បីអរគុណ
× នាយករដ្ឋមន្ត្រីថៃ ប្រាយុទ្ធ ចាន់អូចា បានឲ្យដឹងនៅថ្ងៃទី១៨ ខែកក្កដា ថាព្រះមហាក្សត្រថៃ Maha Vajiralongkorn នឹងរៀបចំពិធីជប់លៀង និងមានការសម្តែងលើឆាកដើម្បីថ្លែងអំណរគុណដល់អ្នកចូលរួមក្នុងបេសកកម្មជួយសង្គ្រោះក្រុមកីឡាករបាល់ទាត់យុវជនទាំង១២នាក់ រួមទាំងគ្រូបង្វឹករបស់ពួកគេម្នាក់ ឲ្យចេញផុតពីក្រុងរូងភ្នំ Tham Luang ក្នុងស្រុកម៉ៃសៃ ខេត្តឈៀងរ៉ៃ ប្រទេសថៃ។
បើតាមការផ្សាយរបស់កាសែត The Nation លោក ប្រាយុទ្ធ បន្តថាពិធីសំខាន់ៗនឹងត្រូវប្រារព្ធឡើងនៅទីក្រុងបាងកករួមជាមួយនឹងព្រឹត្តិការណ៍តូចៗមួយចំនួននៅតាមបណ្តាខេត្តផ្សេងៗ សម្រាប់អ្នកចូលរួមដែលមិនអាចធ្វើដំណើរទៅរដ្ឋធានីបាន។
នាយករដ្ឋមន្ត្រីថៃរូបនេះ ក៏បានបញ្ជាក់ប្រាប់ប្រព័ន្ធផ្សព្វផ្សាយនៅឯសាល Impact Muangthong Thani ដែរថាកីឡាករទាំង ១៣នាក់ នឹងផ្តល់បទសម្ភាសន៍មួយក្នុងកម្មវិធី Thailand Moves Forward នៅថ្ងៃទី១៨ ខែកក្កដា។
សូមបញ្ជាក់ថា បន្ទាប់ពីក្រុមអ្នករុករកបានចំណាយពេល១៨ថ្ងៃក្នុងបេសកកម្មជួយសង្គ្រោះ សមាជិកក្រុមកីឡាបាល់ទាត់ Wild Boars ចំនួន១២នាក់ ដែលមានអាយុចន្លោះពី១១ ទៅ១៦ឆ្នាំ រួមទាំងគ្រូបង្វឹកម្នាក់វ័យ២៥ឆ្នាំ បានចាកចេញពីក្នុងរូងភ្នំ Tham Luang ដោយសុវត្ថិភាពទាំងអស់គ្នា ក្រោយជាប់នៅក្នុងនោះកាលពីថ្ងៃទី២៣ ខែមិថុនា ឆ្នាំ២០១៨ មក៕
Tag:
ក្មេងប្រុសបាត់ខ្លួននៅថៃ
រូងភ្នំ Tham Laung
© រក្សាសិទ្ធិដោយ thmeythmey.com