ជាតិ
សេដ្ឋកិច្ច
៥ឆ្នាំ កម្ពុជា ទទួលបានទុនវិនិយោគក្នុងនិងក្រៅប្រទេសជាង២៣ពាន់លានដុល្លារ
× ភ្នំពេញ៖ ក្រុមប្រឹក្សាអភិវឌ្ឍន៍កម្ពុជា (CDC) តាមរយៈគណៈកម្មាធិការវិនិយោគ និងគណៈកម្មាធិការតំបន់សេដ្ឋកិច្ចពិសេសកម្ពុជា បានអនុញ្ញាតឲ្យក្រុមហ៊ុនក្នុង និងក្រៅប្រទេសវិនិយោគលើគម្រោងថ្មី និងគម្រោងពង្រីកផលិតកម្មមានចំនួន៩៧០គម្រោង ដែលមានទុនវិនិយោគ ២៣៤៨០លានដុល្លារ ក្នុងរយៈពេល៥ឆ្នាំ ពីឆ្នាំ២០១៣-២០១៧។ នេះបើយោងតាមទីភ្នាក់ងារសារព័ត៌មាន (AKP)។
AKP បានស្រង់របាយការណ៍ស្ដីពីសមិទ្ធផលសំខាន់ៗរបស់រាជរដ្ឋាភិបាលក្នុងរយៈពេល៥ឆ្នាំ មកបញ្ជាក់ថា ក្នុងបណ្ដាគម្រោងវិនិយោគទាំង៩៧០នោះ មានវិស័យឧស្សាហកម្ម និងកម្មន្តសាលចំនួន៨១១គម្រោង ដែលមានទុនវិនិយោគប្រមាណ ៧៣១៦លានដុល្លារ ស្មើនឹង៣១ភាគរយនៃទុនវិនិយោគសរុប។ វិស័យកសិកម្ម និងកសិឧស្សាហកម្ម មាន៧៨គម្រោង ក្នុងទុនវិនិយោគប្រមាណ ២៧៥០លានដុល្លារ ស្មើនឹង១២ភាពរយនៃទុនវិនិយោគសរុប។
វិស័យហេដ្ឋារចនាសម្ព័ន្ធ និងវិស័យផ្សេងៗ មាន៤៤គម្រោង ក្នុងទុនវិនិយោគប្រមាណ ៨១៤៧លានដុល្លារ ស្មើនឹង៣៥ភាគរយនៃទុនវិនិយោគសរុប និងវិស័យទេសចរណ៍ ៣៧គម្រោង មានទុនវិនិយោគប្រមាណ ៥២៦៤លានដុល្លារ ស្មើនឹង២២ភាគរយនៃទុនវិនិយោគសរុប។
ក្នុងរយៈពេល៥ឆ្នាំនេះ រាជរដ្ឋាភិបាល បានឯកភាពឲ្យមានការបង្កើតតំបន់សេដ្ឋកិច្ចពិសេសចំនួន២២ ដែលធ្វើឲ្យចំនួនតំបន់សេដ្ឋកិច្ចពិសេសសរុបបានកើនដល់៤៧ ហើយតំបន់សេដ្ឋកិច្ចពិសេសដែលបានដំណើរការមាន១៨កន្លែង។ ក្នុងនោះមានរោងចក្រចំនួន៣៣០ កំពុងមានសកម្មភាពផលិតដោយប្រើប្រាស់កម្លាំងពលកម្មជាង៩,៦ម៉ឺននាក់៕
© រក្សាសិទ្ធិដោយ thmeythmey.com