កម្ពុជា នាំចូលអគ្គិសនីកាន់តែតិចពីបរទេស

ជាតិ

កម្ពុជា នាំចូលអគ្គិសនីកាន់តែតិចពីបរទេស

28, Jul 2018 , 1:59 pm

រូបភាព

ដោយ: អ៊ូ សុខមាន (OU Sokmean)

ភ្នំពេញ៖ ក្នុងរយៈពេល៥ឆ្នាំ គិតចាប់ពីឆ្នាំ២០១៣ ដល់២០១៧ កម្ពុជាមានថាមពលអគ្គិសនីដែលអាចផ្គត់ផ្គង់ការប្រើប្រាស់ក្នុងស្រុកបាន៨១.៤ភាគរយ។ ចំនួននេះ បានកើនពី ៤៣.៧ភាគរយនៅឆ្នាំ២០១៣ ដល់៨១.៤ភាគរយ ក្នុងឆ្នាំ២០១៧។ ដោយឡែកបរិមាណអគ្គិសនីនាំចូលកាន់តែថយចុះ ពី៥៦.៣ភាគរយ មកត្រឹម១៨.៦ភាគរយនៅរយៈពេលដូចគ្នា។ នេះបើយោងតាមទីភ្នាក់ងារសារព័ត៌មានAKP។

តាមAKP ដែលបានស្រង់របាយការណ៍របស់អគ្គិសនីកម្ពុជា ក្រៅពីប្រភពអគ្គិសនីដើរដោយវារីអគ្គិសនី និងធ្យូងថ្ម រាជរដ្ឋាភិបាលបានយកចិត្តទុកដាក់ ជំរុញការចូលរួមអភិវឌ្ឍដល់ប្រភពអគ្គិសនីស្អាត ដូចជាប្រភពអគ្គិសនីដើរដោយថាមពលព្រះអាទិត្យ នៅខេត្តស្វាយរៀង មានអានុភាព១០មេហ្កាវ៉ាត់។ ក្រៅពីនោះកម្ពុជាក៏មានប្រភពថាមពលកកើតឡើងវិញដែរដូចជាប្រភពថាមពលជីវម៉ាស ប្រព័ន្ធពន្លឺព្រះអាទិត្យតាមផ្ទះនៅតំបន់ជនបទ និងប្រព័ន្ធថាមពលពន្លឺព្រះអាទិត្យសម្រាប់សាកអាគុយ គម្រោងចង្ក្រានប្រសិទ្ធភាព ឬចង្ក្រានប្រណិត។

របាយការណ៍ដដែលឲ្យដឹងដែរថា បច្ចុប្បន្នកម្ពុជាមានទំបន់វារីអគ្គិសនី៦កន្លែង ក្នុងនោះ៤កន្លែងនៅខេត្តកោះកុង មួយកន្លែងនៅខេត្តកំពត និងមួយកន្លែងនៅខេត្តពោធិ៍សាត់។ ជាមួយគ្នាក៏មានគម្រោងវារីអគ្គិសនីសេសានក្រោម២ នៅខេត្តស្ទឹងត្រែងមួយដែរ ខណៈរោងចក្រអគ្គិសនីដុតធ្យូងថ្ម២កន្លែង នៅខេត្តព្រះសីហនុ និងមួយកន្លែងទៀត នៅខេត្តកណ្តាល៕