ពីនេះ ពីនោះ
ត្រីកំព្រាមលឿងសម្បូរនៅក្នុងបឹងទន្លេសាប ទន្លេមេគង្គក្រោម និងទន្លេបាសាក់ ត្រីកំព្រាមលឿង។ រូបភាព៖ ថាច់ ផាណារ៉ា
× ត្រីកំព្រាមលឿង មានឈ្មោះវិទ្យាសាស្ត្រ (Polynemus melanochir) និងឈ្មោះជាភាសាអង់គ្លេស Blackhand paradise fish ជាប្រភេទត្រីដែលឃើញមានរស់នៅក្នុងទឹកភ្លាវ (ទឹកប្រៃលាយទឹកសាប) និងទឹកសាប ដែលស្រទាប់បាតក្រោមមានខ្សាច់ និងភក់ល្បាប់ ចាប់ពីទន្លេមេក្លងក្នុងប្រទេសថៃ ដល់ទន្លេមេគង្គ «ចាប់ពីភាគខាងត្បូងនៃប្រទេសឡាវ ខាងក្រោមល្បាក់ខោន ដល់អាងទន្លេក្នុងតំបន់ដីសណ្តទន្លេមេគង្គ ក្នុងប្រទេសវៀតណាម» បូករួមទាំងអាងទន្លេចៅប្រាយ៉ា ទន្លេសាប និងបឹងទន្លេសាប ទន្លេបាសាក់ក្នុងប្រទេសកម្ពុជាផងដែរ។ ត្រីកំព្រាមស មានប្រវែងដងខ្លួនអតិបរមា ២៥ស.ម។ វាស៊ីពពួកសត្វមានសម្បកដូចជា ក្តាម កំពឹស បង្គា ព្រោនជាដើម ជាអាហារ។
ត្រីកំព្រាមលឿង ត្រូវបានគេកត់ត្រាចូលក្នុងបញ្ជីក្រហម IUCN Red List (Least Concern) ក្នុងឆ្នាំ ២០១២ ជាប្រភេទត្រីរងគ្រោះតិចតួច ដែលអាចនឹងឈានដល់ការផុតពូជ។ បញ្ហាប្រឈមចំពោះត្រីកំព្រាមស មានដូចជា ការប្រែប្រួលអាកាសធាតុ ការនេសាទហួសកម្រិត ការប្រើប្រាស់ឧបករណ៍ខុសច្បាប់ដោយប្រើចរន្តអគ្គិសនីឆក់ ដែលគេនិយមហៅថា ឆក់ក្តៅ ឆក់ត្រជាក់ ដែលជាឧបករណ៍នេសាទដ៏គ្រោះថ្នាក់បំផុតសម្រាប់មច្ឆជាតិ និងការសាងសង់ទំនប់វារិអគ្គីសនី សុទ្ធតែជាបញ្ហាប្រឈមដល់កំណើតពួកវា។ ទៅថ្ងៃអនាគត ប្រភេទត្រីចំនួននៅក្នុងប្រទេសកម្ពុជា អាចនឹងឈានទៅផុតពូជ បើពុំមានការចូលរួមពីមជ្ឈដ្ឋានទូទៅ ដើម្បីថែរក្សាការពារធនធានមច្ឆជាតិស្រុកយើងទាំងអស់គ្នាទេនោះ។
© រក្សាសិទ្ធិដោយ thmeythmey.com