ជាតិ
ស៊ុយអែតផ្ដល់ថវិកា២លានដុល្លារអាមេរិក គាំទ្រវិស័យបដិសណ្ឋារកិច្ចនៅកម្ពុជា
× ភ្នំពេញ៖ ស្ថានទូតស៊ុយអែត បានផ្ដល់ជំនួយថវិកា២លានដុល្លារ ដល់វិទ្យាស្ថានម្ហូបអាហារកម្ពុជា សម្រាប់ការបណ្ដុះបណ្ដាលយុវជនលើមុខវិជ្ជាចំអិនម្ហូបអាហារ និងលើកកម្ពស់វិស័យបដិសណ្ឋារកិច្ចនៅកម្ពុជា។
ដើម្បីបណ្ដុះធនធានមនុស្សលើវិស័យបដិសណ្ឋារកិច្ច ប្រកបដោយជំនាញត្រឹមត្រូវ តាមរយៈកម្មវិធីសិក្សាលំដាប់ស្ដង់ដារ និងប្រកបដោយភាពច្នៃប្រឌិត ប្រទេសស៊ុយអែតបានផ្ដល់ប្រាក់ប្រមាណ២លានដុល្លារអាមេរិក ដល់វិទ្យាស្ថានម្ហូបអាហារកម្ពុជា សម្រាប់គម្រោងរយៈពេល៣ឆ្នាំ ។
លោក Pierre Tami នាយកប្រតិបត្តិវិទ្យាស្ថានម្ហូបអាហារកម្ពុជា លើកឡើងថា ការកើនឡើងយ៉ាងលឿននៃចំនួនយុវជនកម្ពុជាចូលរួមក្នុងទីផ្សារការងារ កំពុងជួបប្រទះការលំបាក ក្នុងការទទួលបានការងារល្អ ដោយសារតែពួកគេខ្វះខាតជំនាញសមស្រប។ បើតាមលោក Pierre ការផ្ដល់ជំនួយដល់ការបណ្ដុះបណ្ដាលយុវជនកម្ពុជានេះ គឺដើម្បីឆ្លើយតបនិយោជកជាច្រើន ក្នុងវិស័យបដិសណ្ឋារកិច្ច ដែលកំពុងតែងាកទៅស្វែងរកកម្មករមានជំនាញមកពីប្រទេសក្នុងតំបន់ ដើម្បីបំពេញកង្វះខាតនេះ។
សម្រាប់លោក Pierre ភាពចន្លោះប្រហោងនៃជំនាញក្នុងចំណោមកម្មករខ្មែរ ឆ្លុះបញ្ចាំងអំពីកង្វះខាតវិទ្យាស្ថានបណ្ដុះបណ្ដាលបច្ចេកទេសប្រកបដោយគុណភាពខ្ពស់។ «គោលបំណងសំខាន់របស់វិទ្យាស្ថានម្ហូបអាហារកម្ពុជា គឺរួមចំណែកក្នុងការកសាងជំនាញ និងបង្កើតឱកាសការងារសម្រាប់យុវជនកម្ពុជា តាមរយៈការរៀបចំបង្កើតជាវិទ្យាស្ថាន ដែលមានកម្មវិធីសិក្សា ផ្នែកបដិសណ្ឋារកិច្ចស្របតាមបទដ្ឋានស្តង់ដារប្រទេសអាស៊ាន និងអប់រំតាមស្តង់ដារប្រទេសស្វីស»។ នេះជាការបញ្ជាក់របស់លោក Pierre Tami។
លោក Samuel Hurtig ប្រធានកិច្ចសហប្រតិបត្តិការអភិវឌ្ឍន៍អន្តរជាតិរបស់ស៊ុយអែតប្រចាំកម្ពុជា លើកឡើងថា ការអភិវឌ្ឍជំនាញនៅក្នុងវិស័យបដិសណ្ឋារកិច្ចនេះ ពិតជាមានសារសំខាន់សម្រាប់ការគាំពារដល់សុខុមាលភាពប្រជាជនក្នុងប្រទេស។ លោក Samuel Hurtig បញ្ជាក់ថា៖« យើងពិតជារីករាយក្នុងការគាំទ្រដល់វិទ្យាស្ថានម្ហូបអាហារកម្ពុជាដើម្បីបណ្ដុះបណ្ដាលយុវជនកម្ពុជាអំពីជំនាញ និងចំណេះដឹងផ្សេងៗនៅក្នុងវិស័យបដិសណ្ឋារកិច្ច»។
វិទ្យាស្ថានម្ហូបអាហារកម្ពុជា បានបើកដំណើរការនៅក្នុងខែមីនាឆ្នាំ២០១៧។ អាហារូបករណ៍ Naomi Tami Memorial Scholarship បានផ្ដល់ឱកាសឲ្យសិស្សានុសិស្ស ដែលពុំមានលទ្ធភាពបង់ថ្ងៃសិក្សា អាចរៀនបានដោយឥតបង់ប្រាក់ ក្នុងគោលបំណងលើកកម្ពស់ការទទួលបានការអប់រំ និងការចិញ្ចឹមជីវិតរបស់ពួកគេ។
វិទ្យាស្ថានម្ហូបអាហារ ជាវិទ្យាស្ថានបណ្ដុះបណ្ដាលជំនាញថ្មីមួយ ដែលត្រូវបានបង្កើតឡើងដោយកិច្ចសហការរួមគ្នារវាងស្ថាប័នរដ្ឋនិងឯកជន ដើម្បីឆ្លើយតបទៅនឹងកំណើនខ្ពស់នៃវិស័យទេសចរណ៍នៅកម្ពុជា។ វាក៏ជាវិទ្យាស្ថានដំបូងគេបង្អស់នៅកម្ពុជា ដែលមានកម្មវិធីបដិសណ្ឋារកិច្ចលំដាប់អន្តរជាតិ ដែលអនុលោមតាមបទដ្ឋានស្តង់ដាប្រទេសអាស៊ាន និងស្វីសផងដែរ។
ប្រទេសកម្ពុជាប្រឈមនឹងការប្រកួតប្រជែងខ្លាំងជាងមុនពីបណ្ដាប្រទេសក្នុងតំបន់ និងនៅលើសាកលលោកនៅក្នុងវិស័យទេសចរណ៍។ តម្រូវការធនធានមនុស្សដែលមានជំនាញផ្នែកចំអិនអាហារ និងបដិសណ្ឋារកិច្ច កំពុងតែកើនឡើង ខណៈវិស័យទេសចរណ៍នៅកម្ពុជាមានការកើនឡើងនៅក្នុងឆ្នាំ២០១៧ ហើយការអភិវឌ្ឍថ្មីៗនៅក្នុងវិស័យសណ្ឋាគារ កំពុងតែដំណើរការក្នុងឆ្នាំ២០១៨នេះ៕
Tag:
ស៊ុយអែត
កម្ពុជា
ម្ហូបអាហារ
© រក្សាសិទ្ធិដោយ thmeythmey.com