សមាជិកសភានីតិកាលទី៦ នឹងធ្វើសច្ចាប្រណិធាននៅថ្ងៃទី១៩ ខែកញ្ញា

ជាតិ

សមាជិកសភានីតិកាលទី៦ នឹងធ្វើសច្ចាប្រណិធាននៅថ្ងៃទី១៩ ខែកញ្ញា

02, Aug 2018 , 11:20 am

រូបភាព

វិមានសភាកម្ពុជា។ រូបថត AFP

ដោយ:

ភ្នំពេញ៖ សមាជិករដ្ឋសភានីតិកាលទី៦ នឹងធ្វើសច្ចាប្រណិធាន នៅថ្ងៃទី១៩ កញ្ញាខាងមុខ ក្រោយពីគណៈកម្មាធិការជាតិរៀបចំការបោះឆ្នោត (គ.ជ.ប) ប្រកាសលទ្ធផល និងបែងចែកអាសនជាផ្លូវការ។ នេះជាការបញ្ជាក់របស់សម្ដេចនាយករដ្ឋមន្ត្រី ហ៊ុន សែន ដែលថ្លែងក្នុងពិធីជួបសំណេះសំណាល ជាមួយកម្មករក្នុងខណ្ឌមានជ័យ នៅថ្ងៃទី២ សីហា។

សម្ដេច ហ៊ុន សែន បានពន្យល់ថា ព្រះមហាក្សត្រ នឹងចេញព្រះរាជសារមួយ កោះប្រជុំសមាជិកតំណាងរាស្ត្រពីគណបក្សដែលឈ្នះចូលរដ្ឋសភា នឹងស្បថសច្ចាប្រណិធានចូលកាន់តំណែង។ នាយករដ្ឋមន្ត្រី ហ៊ុន សែន បានបញ្ជាក់ថា ក្រោយធ្វើសច្ចាប្រណិធាន នៅចំពោះព្រះភក្ត្រអង្គព្រះមហាក្សត្ររួចហើយ រដ្ឋាភិបាលថ្មី ក៏ត្រូវបានបង្កើតឡើងនៅថ្ងៃទី២០ ខែកញ្ញា ហើយស្បថចូលកាន់តំណែង គណៈរដ្ឋមន្ត្រី នឹងត្រូវធ្វើឡើង នៅល្ងាចថ្ងៃដដែលនេះ។

បើតាមសម្ដេច ហ៊ុន សែន ក្រោយពីធីស្បថចូលកាន់តំណែងរួចរាល់ ប្រធានរដ្ឋសភានឹងកោះអញ្ជើញក្រុមអ្នកតំណាងរាស្ត្រទាំងអស់ មកបើកកិច្ចប្រជុំនៃអាណត្តិថ្មីរបស់ខ្លួន ដើម្បីពិភាក្សាការងារនៅថ្ងៃទី ២១ ខែកញ្ញា។

ទាក់ទងនឹងការប្រកាសលទ្ធផលផ្លូវការ នៃចំនួនអាសនៈក្នុងរដ្ឋសភា អ្នកនាំពាក្យ គ.ជ.ប លោក ហង្ស ពុទ្ធា បាននិយាយថា អាចធ្វើឡើង២ដំណាក់កាល។ តំណាក់កាលទី១ គ.ជ.ប នឹងប្រកាសលទ្ធផលបណ្ដោះអាសន្ននៅថ្ងៃទី១១ ខែសីហា ដើម្បីទទួលពាក្យបណ្ដឹងផ្សេងៗពីគ្រប់គណបក្សទាំងអស់ រហូតដល់ថ្ងៃទី១៥ ខែសីហា។ «ប្រសិនជាមិនមានពាក្យបណ្ដឹងនោះទេ ការប្រកាសលទ្ធផលផ្លូវការនឹងធ្វើឡើងនៅថ្ងៃទី១៥ ខែសីហាតែម្ដង។ ប៉ុន្តែបើមានពាក្យបណ្ដឹងមក គ.ជ.ប ដើម្បីដោះស្រាយនោះ ការប្រកាសលទ្ធផលផ្លូវការនឹងធ្វើឡើងនៅថ្ងៃទី១០ ខែកញ្ញាវិញ»។ នេះជាការបញ្ជាក់របស់អ្នកនាំពាក្យគ.ជ.ប៕