ជាតិ
បោះឆ្នោត
បោះឆ្នោត៖ គ.ជ.ប ទទួលបានបណ្តឹង២៥២៥ ដោយជាង៩៩ភាគរយជារបស់ LDP
× ភ្នំពេញ៖ ក្រោយការបោះឆ្នោតបានបិទបញ្ជប់ គណៈកម្មការជាតិរៀបចំការបោះឆ្នោត បានទទួលពាក្យបណ្ដឹងសរុប ជុំវិញការបោះឆ្នោត និងរាប់សន្លឹកឆ្នោត ចំនួន ២ ៥២៥បណ្ដឹង។ ក្នុងចំណោមបណ្ដឹងទាំងអស់ គ.ជ.ប ទទួលបានពី ៣គណបក្ស តែគណបក្សដែលដាក់បណ្ដឹងច្រើនជាងគេ គឺគណបក្សសម្ព័ន្ធដើម្បីប្រជាធិបតេយ្យ។
បណ្តឹង២៥២០ក្នុងចំណោម២៥២៥ ពោលគឺជាង៩៩,៨០ភាគរយ ជាបណ្តឹងដែលដាក់ដោយគណបក្សសម្ព័ន្ធដើម្បីប្រជាធិបតេយ្យ ក្រៅពីនេះ បណ្តឹងចំនួន៣ជារបស់គណបក្សប្រជាជនកម្ពុជា និង២ទៀតជារបស់គណបក្សប្រជាធិបតេយ្យមូលដ្ឋាន។ បើតាមសេចក្តីប្រកាសព័ត៌មានរបស់ គ.ជ.ប បណ្តឹងទាំងនោះ ពាក់ព័ន្ធនឹងការបោះឆ្នោត និងរាប់សន្លឹកឆ្នោត។
នៅក្នុងចំណោមបណ្ដឹងទាំងអស់ មាន៣៤បណ្ដឹង សុំឲ្យគ.ជ.ប ផ្តន្ទាទោស និងបណ្ដឹងពាក់ព័ន្ធនឹងការបោះឆ្នោត និងរាប់សន្លឹកឆ្នោត មានចំនួន២,៤៩១បណ្ដឹង។
បើតាមរបាយការណ៍ដដែលបានឲ្យដឹងថា គណៈកម្មការរៀបចំការបោះឆ្នោតឃុំ/សង្កាត់ បានចេញសេចក្ដីសម្រេច បដិសេធចំនួន ១,៨៦៩បណ្ដឹង, ផ្សះផ្សាសះជា ចំនួន២០បណ្ដឹង, ផ្សះផ្សាមិនសះជាចំនួន ១បណ្ដឹង, លិខិតជូនដំណឹង ចំនួន១បណ្ដឹង, ចារបដិសេធចំនួន ៩២បណ្ដឹង, ដើមបណ្ដឹងសុំដកពាក្យបណ្ដឹងចំនួន ២៦បណ្ដឹង និងកំពុងដោះស្រាយចំនួន ៥១៦បណ្ដឹង។
នៅក្នុងចំណោម មណ្ឌលបោះឆ្នោតទាំង២៥ រាជធានី ខេត្ត មានមណ្ឌលចំនួន២ប៉ុណ្ណោះ ដែលមិនមានពាក្យបណ្ដឹង គឺមណ្ឌលខេត្តព្រះសីហនុ និងខេត្តមណ្ឌលព្រះវិហារ។
អគ្គលេខាធិការគណបក្សសម្ព័ន្ធដើម្បីប្រជាធិបតេយ្យលោក ចិន ថុន ធ្លាប់បានឲ្យសារព័ត៌មានថ្មីៗដឹងថា គណបក្សរបស់លោក នឹងដាក់ពាក្យបណ្ដឹងទៅ គ.ជ.ប ដើម្បីសុំរាប់សន្លឹកឆ្នោតតាមការិយាល័យមួយចំនួនឡើងវិញ។ សុំឲ្យរាប់សន្លឹកឆ្នោតឡើងវិញ ក៏ដោយសារអ្នកសង្កេតការណ៍របស់ខ្លួនបានឃើញភាពមិនប្រក្រតីច្រើន តាមការិយាល័យខ្លះ មិនតែប៉ុណ្ណោះលោកអះអាងថា អ្នកសង្កេតការណ៍របស់លោក ត្រូវបានគេចាប់ដាក់ខ្នោះថែមទៀត៕
Tag:
បោះឆ្នោត
គ.ជ.ប
បណ្ដឹង
LDP
© រក្សាសិទ្ធិដោយ thmeythmey.com