ជាតិ
នយោបាយជាតិ
លោក ខៀវ សុភ័គ ៖យុទ្ធនាការដើម្បីកោះត្រល់របស់បក្សខ្មែរក្រោក នឹងបរាជ័យដូចលោក សម រង្ស៊ី ប្រភពរូបពីផេកគណបក្សខ្មែរក្រោក
× ភ្នំពេញ៖ គណបក្សខ្មែរក្រោក កំពុងប្រកាសប្រមូលស្នាមមេដៃរបស់ពលរដ្ឋ ដើម្បីទាមទារកោះត្រល់ត្រឡប់វិញ ។ តែយុទ្ធនាការនេះ ទំនងអាចប្រឈមមុខផ្លូវច្បាប់ផងដែរ។
ដ្បិតយុទ្ធនាការប្រមូល «ស្នាមមេដៃដើម្បីកោះត្រល់» ដែលជាគំនិតផ្តួចផ្ដើមរបស់គណបក្សខ្មែរក្រោក មិនទាន់លេចចេញជារូបរាងក្តី តែក្រសួងមហាផ្ទៃ បានព្រលយសម្ដីដោយប្រយោលទៅគណបក្សមួយនេះ ដើម្បីឲ្យប្រុងប្រយ័ត្នចំពោះផែនការខ្លួន។ សម្រាប់លោក ខៀវ សុភ័គ ទង្វើដែលប្រធានគណបក្សខ្មែរក្រោក ចង់ប្រមូល«ស្នាមមេដៃដើម្បីកោះត្រល់» នេះ គឺជាចលនាបំផុសបំផុល ឲ្យកម្ពុជាមានទំនាស់ជាមួយប្រទេសវៀតណាម។
ថ្លែងប្រាប់សារព័ត៌មានថ្មីៗ អ្នកនាំពាក្យក្រសួងមហាផ្ទៃរូបនេះ បានរំឭកពីបញ្ហាប្រឈមរបស់គណបក្សខ្មែរក្រោក ដោយធៀបទៅនឹងអតីតមេដឹកនាំគណបក្សសង្គ្រោះជាតិដូច្នេះថា៖«ចលនានេះមិនខុសអ្វីពីចលនា សម រង្ស៊ីនោះទេ ហើយវាក៏បរាជ័យដូចចលនា សម រង្ស៊ីដែរ»។
បើតាមលោក ខៀវ សុភ័គ សម្ដេចនាយករដ្ឋមន្ត្រី ហ៊ុន សែន ក៏ធ្លាប់ព្រមានចំពោះអ្នកដែលចង់ទាមទារកោះត្រល់ត្រឡប់មកវិញដែរ។
បើទោះជាក្រសួងមហាផ្ទៃ ព្រលយសម្តីដោយប្រយោលពីវិធានការច្បាប់ក្តី ប៉ុន្តែគណបក្សខ្មែរក្រោក នៅតែប្ដេជ្ញាធ្វើយុទ្ធនាការប្រមូលស្នាមមេដៃនេះ ទោះជាមានបញ្ហាអ្វីក៏ដោយ ។ ប្រធានគណបក្សខ្មែរក្រោក លោក សុខសុវណ្ណ វឌ្ឍនា សារពង្ស បញ្ជាក់យ៉ាងដូច្នេះថា៖ «ចំពោះបញ្ហាប្រទេសជាតិ បញ្ហាទឹកដី គឺជារឿងសំខាន់ណាស់ បើទោះជាប្រៀបធៀបជីវិតយើងមួយ វាគ្មានតម្លៃស្មើទឹកដីទេ ដូច្នេះយើងនៅតែបន្ត។ បើយើងអ្នកដឹកនាំគេ យើងមានភាពខ្លាចរអាយើងមិនអាចធ្វើថ្នាក់ដឹកនាំគេបានទេ»។
បើតាមលោក សុខសុវណ្ណ វឌ្ឍនា សារពង្ស ការធ្វើយុទ្ធនាការខាងមុខនេះ គឺធ្វើតាមច្បាប់កម្ពុជា ដូច្នេះគ្មានអ្វីដែលហាមលោកអនុវត្តឡើយ។ «ខ្ញុំមិនគិតថាវាប៉ះពាល់អ្វីទេ ព្រោះវាគ្រាន់តែជាការបង្ហាញឆន្ទៈ ដែលអនុលោមតាមការចង់បានភាគច្រើនរបស់ម្ចាស់ឆ្នោត។ យុទ្ធនាការនេះស្នាមមេដៃនេះ គឺដើម្បីឲ្យក្រុមប្រឹក្សារដ្ឋធម្មនុញ ដែលមានសមត្ថកិច្ចលើការងារនិង ជំរុញឲ្យរដ្ឋសភារំលាយចោលនូវសន្ធិសញ្ញាឆ្នាំ២០០៥»។ នេះជាការបញ្ជាក់របស់ប្រធានបក្សខ្មែរក្រោក ដែលបានយកពាក្យជូនដំណឹងទៅដាក់នៅក្រសួងមហាផ្ទៃ នៅថ្ងៃទី៣ សីហានេះ។
គណបក្សខ្មែរក្រោក នឹងអនុវត្តយុទ្ធនាការប្រមូល«ស្នាមមេដៃដើម្បីកោះត្រល់» នៅថ្ងៃទី៨ សីហាខាងមុខ។ សម្រាប់យុទ្ធនាការនេះ លោក សារពង្ស រំពឹងថា គណបក្សលោកអាចទទួលបានស្នាមមេដៃគាំទ្រពីពលរដ្ឋលើសពី ៥ម៉ឺននាក់ ប្រសិនជាគ្មានការរារាំង ឬគំរាមកំហែងពីសំណាក់អាជ្ញាធរមានសមត្ថកិច្ច។
គួរបញ្ជាក់ថា កម្ពុជាបានបាត់បង់កោះត្រល់របស់ខ្លួននៅឆ្នាំ ១៩៣៩ ក្រោយពីទេសាភិបាលឥណ្ឌូចិន របស់បារាំង ដោយលោក ប្រេវីយេ បានដាក់កោះត្រល់ ឲ្យស្ថិតក្នុងការគ្រប់គ្រងរបស់ដែនកម្ពុជាក្រោម ឬតំបន់កូសាំងសីន។ នៅឆ្នាំ១៩៤៩ បារាំងបានប្រគល់ដែនដីកូសាំងស៊ីន ដែលជាទឹកដីកម្ពុជាក្រោមនេះ ទៅឲ្យព្រះចៅបៅដាយ របស់ប្រទេសវៀតណាម។ នេះបើតាមការបញ្ជាក់ពីសម្ដេច ហ៊ុន សែន កាលពីថ្ងៃទី៩ ខែសីហា ឆ្នាំ២០១២ ក្នុងកិច្ចប្រជុំរដ្ឋសភា។
សម្ដេច ហ៊ុន សែន បានបន្ថែមថា មូលហេតុដែលនាំឲ្យកោះត្រល់លែងជាកម្មសិទ្ធិរបស់ខ្មែរ ព្រោះឯកសាររបស់ព្រះបរមរតនកោដ្ឋ ព្រះបាទនរោត្តម សីហនុ ដាក់កម្កល់នៅអង្គការសហប្រជាជាតិឆ្នាំ១៩៦៤ បានទទួលស្គាល់ខ្សែបន្ទាត់ ប្រេវីយេ ដែលកាត់កោះត្រល់ឲ្យទៅវៀតណាម៕
Tag:
នយោបាយ
កោះត្រល់
អធិបតេយ្យភាព
© រក្សាសិទ្ធិដោយ thmeythmey.com