ជប៉ុនមិនពេញចិត្តចំពោះការបោះឆ្នោតកម្ពុជា

ជាតិ

នយោបាយជាតិ

ជប៉ុនមិនពេញចិត្តចំពោះការបោះឆ្នោតកម្ពុជា

05, Aug 2018 , 2:31 pm

រូបភាព

រដ្ឋមន្រ្តីការបរទេសកម្ពុជា លោក ប្រាក់ សុខុន ចាប់ដៃសមភាគីជប៉ុន តារ៉ូ កូណូ នាជំនួបនៅសិង្ហបុរី។ (រូបភាពពីហ្វេសប៊ុកក្រសួងការបរទេស)

ដោយ: ធឿន បញ្ញាឬទិ្ធ

ភ្នំពេញ៖ ក្រោយពីអន្តរជាតិរិះគន់លើការបោះឆ្នោតកម្ពុជា ជាបន្តបន្ទាប់ ដល់វេនរដ្ឋាភិបាលជប៉ុន ចេញមុខរិះគន់វិញម្ដង។ ការខកចិត្តរបស់ជប៉ុន បានបង្ហាញចំពោះមុខលោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិអន្តរជាតិ កាលពីថ្ងៃទី៤ សីហា។

ជប៉ុនដែលរក្សាជំហរស្ងៀមស្ងាត់ចំពោះការបោះឆ្នោតនៅកម្ពុជានេះ បែរជាផ្លាស់ប្ដូរជំហរភ្លាមៗ ក្រោយពីបានសួរនាំលោក ប្រាក់ សុខុន ពីរឿងលទ្ធផលបោះឆ្នោតនៅកម្ពុជា។ ក្នុងជំនួបទ្វេរភាគី នៅប្រទេសសិង្ហបុរី លោក Taro Kono រដ្ឋមន្ត្រីការបរទេសជប៉ុន បានវាយតម្លៃថា ការបោះឆ្នោតនៅកម្ពុជា មានចំណុចជាច្រើនដែលគួរឲ្យខកចិត្ត។ ចំណុចដែលលោក Taro Kono មើលឃើញថា ជាបញ្ហាក្នុងការបោះឆ្នោតនោះ គឺសន្លឹកជាច្រើន ដែលមិនបានការ បើទោះជាជប៉ុន បានគាំទ្រផ្ដល់ជំនួយបច្ចេកទេសសម្រាប់ការបោះឆ្នោត ដើម្បីធានាថាការបោះឆ្នោតនឹងអាចឆ្លុះបញ្ចាំងពីឆន្ទៈរបស់ពលរដ្ឋកម្ពុជាក្តី។

អមជាមួយការខកចិត្តនេះ លោក Taro Kono ក៏បានរំឭកថា ជប៉ុនបានគាំទ្រដល់ការស្ថាបនា និងការអភិវឌ្ឍប្រទេសកម្ពុជា ដែលជាមិត្តរបស់ជប៉ុននេះ ចាប់តាំងពីដំណើរសន្តិភាពរហូតដល់បច្ចុប្បន្ន។ ថ្លែងចំពោះមុខលោក ប្រាក់ សុខុន នៅក្នុងជំនួបទ្វេរភាគី ក្រោយកិច្ចប្រជុំរដ្ឋមន្ត្រីការបរទេសអាស៊ាន នៅសិង្ហបុរី លោក Taro Kono បានបញ្ជាក់ដូច្នេះថា៖«ជប៉ុនចង់ឃើញកម្ពុជា បន្តដើរលើគន្លងផ្លូវអភិវឌ្ឍប្រទេស»។

អត្ថបទទាក់ទង

អ្នកនាំពាក្យ CPP ថា សហភាពអឺរ៉ុបគ្មានផ្លូវដាក់ទណ្ឌកម្មលើកម្ពុជាឡើយ

សមភាគីវៀតណាម និងឡាវ សាទរសម្តេច ហ៊ុន សែន

តើលោក កឹម សុខា អាចត្រូវដោះលែង នៅក្រោយការបោះឆ្នោតដែរទេ?

អង់គ្លេសស្តាយដែលគ្មានបក្សប្រឆាំងដ៏ទុកចិត្តបាន ប្រជែងការបោះឆ្នោតនៅកម្ពុជា

មន្ត្រីរដ្ឋាភិបាល និងគ.ជ.ប ថា អន្តរជាតិខ្លះវាយតម្លៃទាំងបិទភ្នែក!

អាល្លឺម៉ង់ ថា ការបោះឆ្នោតនៅកម្ពុជាមានសន្តិភាព តែមិនទាន់ស្របច្បាប់ទេ

បន្ថែមពីនេះរដ្ឋមន្ត្រីការបរទេសជប៉ុន ក៏បានជំរុញឲ្យរដ្ឋាភិបាលកម្ពុជា បង្កើតបរិយាកាសនយោបាយថ្មី ដោយងាកទៅបើកច្រកចរចាជាមួយអតីតគណបក្សសង្គ្រោះជាតិ ដើម្បីបន្តដំណើរលទ្ធិប្រជាធិបតេយ្យ។«គាត់ចង់ឃើញកម្ពុជាដើរលើផ្លូវនាំយកលទ្ធិប្រជាធិបតេយ្យរួមគ្នារវាងបក្សកាន់អំណាច និងបក្សប្រឆាំង»។ នេះជាការលើកឡើងរបស់លោក Taro Kono ដែលចុះផ្សាយរបស់ទូរទស្សន៍ជប៉ុន NHK។

ជាការឆ្លើយតបលោក ប្រាក់ សុខុន បានប្រាប់លោក Taro Kono ថា លទ្ធផលនៃការបោះឆ្នោតនៅកម្ពុជា គឺបង្ហាញពីលទ្ធិប្រជាធិបតេយ្យពិតប្រាកដ។

បើទោះជាការបោះឆ្នោតនៅកម្ពុជា ដំណើរការទៅដោយរលូន ដែលមានពលរដ្ឋចូលរួមបោះឆ្នោត៨២,៨៩ភាគរយក្តី ប៉ុន្តែអន្តរជាតិនៅតែរិះគន់ ដំណើរការបោះឆ្នោតមួយនេះ។ នោះក៏ព្រោះតែ ការបោះឆ្នោតនេះ គ្មានវត្តមានអតីតគណបក្សប្រឆាំងដ៏ធំចូលរួម ស្របជាមួយបរិយាកាសនយោបាយ ឃុំខ្លួនមេដឹកនាំ ហាមសកម្មភាពនយោបាយថ្នាក់ដឹកនាំបក្ស១១៨នាក់ និងរំលាយបក្សប្រឆាំងមួយនេះ៕