ជាតិ
នយោបាយជាតិ
ប្រធានបក្សខ្មែរអភិវឌ្ឍន៍សេដ្ឋកិច្ច នឹងងើបតវ៉ា បើរដ្ឋាភិបាល មិនបម្រើប្រយោជន៍ពលរដ្ឋ
× ភ្នំពេញ៖ ក្រោយបោះឆ្នោត លោក ហួន រាជចំរើន ប្រធានគណបក្សខ្មែរអភិវឌ្ឃន៍សេដ្ឋកិច្ច បានប្រកាសធ្វើជាអ្នកប្រឆាំង ដើម្បីការពារផលប្រយោជន៍របស់ប្រជាជនពិតប្រាកដ។ មិនតែប៉ុណ្ណោះ លោក ហួន រាជចំរើន បានអះអាងថា គណបក្សលោក នឹងមានការធ្វើបាតុកម្មផ្សេងៗ នៅពេល ដែលថ្នាក់ដឹកនាំរដ្ឋាភិបាល មិនបម្រើដល់ផលប្រយោជន៍ពលរដ្ឋ។
ទោះជាមិនទទួលបានកៅអីក្នុងរដ្ឋសភាសម្រាប់ការបោះឆ្នោតនីតិកាលទី៦នេះក្តី តែប្រធានគណបក្សខ្មែរអភិវឌ្ឍន៍សេដ្ឋកិច្ច លោកហួន រាជចំរើន បានតាំងចិត្តថា នឹងមិនបញ្ឈប់សកម្មភាពនយោបាយឡើយ។ លោក ប្រកាសថា នឹងធ្វើជាប្រធានគណបក្សប្រឆាំង ដើម្បីការពារផលប្រយោជន៍ដល់ប្រជាជន ក៏ដូចជាប្រទេសជាតិទាំងមូល។ សកម្មភាពប្រឆាំង ដែលប្រធានគណបក្សនេះ សំដៅ គឺការធ្វើបាតុកម្ម ដោយមានការគោរពច្បាប់។
តាមរយៈការផ្តល់បទសម្ភាសដល់សារព័ត៌មានថ្មីៗ នៅថ្ងៃទី៦ ខែសីហា ឆ្នាំ២០១៨នេះ លោក ហួន រាជចំរើន បញ្ជាក់យ៉ាងដូច្នេះថា៖«បើជាមាននរណាម្នាក់ យកអំណាចជារាជរដ្ឋាភិបាល ទៅធ្វើទុក្ខបុកម្នេញដល់ប្រជារាស្ត្រ ខ្ញុំត្រូវតែការពារ។ ខ្ញុំ ត្រូវតែស្នើសុំដល់រដ្ឋាភិបាល ឲ្យដោះស្រាយ នឹងដាក់ទោសទៅលើជនទាំងឡាយណា ដែលធ្វើបាបប្រជារាស្ត្រ»។
ប្រធានគណបក្សខាងលើ បានអះអាងទៀតថា គណបក្សរបស់លោក នឹងមិនធ្វើនយោបាយលាបពណ៌គ្នាឡើយ ក្នុងន័យធ្វើយ៉ាងណាដើម្បីចូលរួមអភិវឌ្ឍប្រទេសឲ្យមានការរីកចម្រើន៕
Tag:
នយោបាយ
បាតុកម្ម
បោះឆ្នោត
គ.ជ.ប
© រក្សាសិទ្ធិដោយ thmeythmey.com