កម្ពុជា ត្រៀមបញ្ជូនយុវសិស្ស ៣រូបដើម្បីប្រកួតប្រជែង ASEAN Quiz ឆ្នាំ២០១៨ នៅប្រទេសឥណ្ឌូណេស៊ី

ជាតិ

កម្ពុជា ត្រៀមបញ្ជូនយុវសិស្ស ៣រូបដើម្បីប្រកួតប្រជែង ASEAN Quiz ឆ្នាំ២០១៨ នៅប្រទេសឥណ្ឌូណេស៊ី

07, Aug 2018 , 7:39 pm

រូបភាព

ដោយ:

ភ្នំពេញ៖ យុវសិស្សចំនួន ៣រូប ដែលមកពីរាជធានីភ្នំពេញ នឹងត្រៀមខ្លួនចូលរួមប្រកួតប្រជែង ក្នុងកម្មវិធី ASEAN Quiz ថា្នក់ជាតិ នៅខែធ្នូ ឆ្នាំ២០១៨ នាប្រទេសឥណ្ឌូណេស៊ី ។ យុវសិស្ស ៣រូបនេះ ត្រូវបានក្រសួងអប់រំ យុវជន និងកីឡា និងក្រសួងការបរទេស និងសហប្រតិបត្តិការអន្តរជាតិ សម្រិតសម្រាំងយ៉ាងម៉ត់ចត់ តាមរយៈការប្រឡងក្របខណ្ឌសាលារៀនចំនួន២៤ ទូទាំងរាជធានីភ្នំពេញ។

ក្នុងកម្មវិធី ជួបសំណេះសំណាលជាមួយយុវសិស្សទាំង ៣រូបនេះ លោក ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានឲ្យដឹងថា ការបញ្ចូនសិស្សទៅចូលរួមប្រកួតប្រជែងនេះ ក្នុងគោលបំណងលើកស្ទួយវិស័យអប់រំដល់យុវសិស្ស ឲ្យខិតខំរៀនសូត្រ និងយល់ដឹងពីអាស៊ានឲ្យកាន់តែរឹងមាំ ។ ជាពិសេសផ្តល់ឱកាសដល់យុវសិស្សអាចបង្ហាញពីសមត្ថភាពទៅបណ្តាប្រទេសក្នុងអាស៊ានផង។

បេក្ខជន ៣រូប ដែលត្រៀមខ្លួនប្រកួតក្នុងកម្មវិធី ASEAN Quiz ថា្នក់ជាតិ ឆ្នាំ២០១៨ នៅប្រទេស ឥណ្ឌូណេស៊ី ខាងមុខនេះ រួមមាន កញ្ញា សុង វីរីកា មកពីសាលាវេស្ទើនអន្តរជាតិ, កញ្ញា ឃៀង សុជីវី សាលាអន្តរជាតិសិង្ហបុរី និងកញ្ញា យ៉ង សុវិចារ ពីវិទ្យាល័យជាស៊ីមសន្ធរម៉ុក។

ជាសិស្សនៅសាលាវេស្ទីនអន្តរជាតិ កញ្ញា សុង វីរីកា បានបេ្តជ្ញាចិត្តថា នាងនឹងខំស្រាវជ្រាវ រកចំណេះដឹងទាក់ទងនឹងអាស៊ានបន្ថែមទៀត ដើម្បីទទួលបានជ័យលាភីជូនប្រទេសជាតិឲ្យមានមុខមាត់នៅក្នុងឆាកអន្តរជាតិ។

ទោះបីលទ្ធផលយ៉ាងណា ក៏កញ្ញា សុជីវី រីករាយនឹងទទួលបានបទពិសោធន៍ ពីការចូលរួមប្រកួតប្រជែងនេះ។ យុវសិស្ស ដែលមកពីសាលាអន្តរជាតិសិង្ហបុរីរូបនេះ បានតាំងចិត្តរួចជាស្រេចថា ខ្លួននឹងទទួលបានជោគជ័យ។

នេះជាលើកទី៨ ដែលក្រសួងបញ្ជូនយុវសិស្ស ចូលរួមប្រកួតប្រជែងASEAN Quiz ក្នុងចំណោមសិស្សទូទាំងប្រទេសអាស៊ាន៕