ជាតិ
នយោបាយជាតិ
សម្តេច ហ៊ុន សែន៖ រដ្ឋាភិបាលថ្មី នឹងប្រឹងធ្វើការទ្វេដង រូបពីហ្វេសបុករបស់សម្តេច ហ៊ុន សែន
× រដ្ឋាភិបាលអាណត្តិទី៦ នឹងបំពេញការងារឲ្យកាន់តែខ្លាំងឡើង ក្នុងការអភិវឌ្ឍប្រទេសជាតិ។ នេះជាការប្តេជ្ញារបស់សម្តេច ហ៊ុន សែន ក្នុងនាមជាប្រមុខរដ្ឋាភិបាលកម្ពុជា។
តាមរយៈសារលើទំព័រហ្វេសប៊ុក នៅថ្ងៃទី៧ ខែសីហា ឆ្នាំ២០១៨នេះ សម្តេច ហ៊ុន សែន បានសរសេរយ៉ាងដូច្នេះថា៖«រាជរដ្ឋាភិបាលថ្មី ដែលមានខ្ញុំជាអ្នកដឹកនាំ នឹងប្រឹងប្រែងទ្វេដង ឲ្យសមទៅនឹងទឹកចិត្តស្រឡាញ់គាំទ្ររបស់បងប្អូន ដើម្បីកម្ពុជាយើង រីកចម្រើនទៅមុខទាំងអស់គ្នា»។
បន្ទាប់ពីបោះឆ្នោត នាយករដ្ឋមន្ត្រី និងជាប្រធានគណបក្សកាន់អំណាចរូបនេះ បាននិយាយតាមវេទិកាមួយចំនួនរួចមកហើយ ដោយផ្តាំផ្ញើទៅមន្ត្រីគ្រប់លំដាប់ថ្នាក់ ឲ្យខិតខំបម្រើប្រជាពលរដ្ឋ។ ប្រមុខរដ្ឋាភិបាល ថែមទាំងសង្កត់ធ្ងន់ថា មន្ត្រីទាំងអស់ មិនត្រូវជិះសេះលែងដៃ ក្រោយឈ្នះឆ្នោតនោះទេ។
ក្នុងពីធីជួបសំណេះសំណាលជាមួយកម្មករ-កម្មការិនី កាលពីថ្ងៃទី២ សីហា មេដឹកនាំកម្ពុជារូបនេះ បានបញ្ជាក់យ៉ាងដូច្នេះថា៖«ខ្ញុំសូមដាស់តឿន ក៏ដូចជាដាក់ចេញនូវបទបញ្ជាឲ្យមន្ត្រីទាំងអស់ចុះបម្រើប្រជាជនឲ្យបានល្អជាមុន ទូលាយជាងមុន ប្រសិទ្ធភាពជាងមុន និងបានផលចំពោះប្រជាជនឲ្យបានច្រើនជាងមុន»។
បើតាមសម្តេច ហ៊ុន សែន សមាសភាពរដ្ឋាភិបាលថ្មី ត្រូវបានរៀបចំរួចអស់ហើយ។ តាមការគ្រោងទុក រដ្ឋាភិបាលថ្មី នឹងត្រូវបង្កើតឡើងនៅថ្ងៃទី២០ ខែកញ្ញា ឆ្នាំ២០១៨ ក្រោយមួយថ្ងៃនៃការប្រជុំលើកដំបូងរបស់រដ្ឋសភា៕
Tag:
ហ៊ុន សែន
រដ្ឋាភិបាល
អាណត្តិទី៦
© រក្សាសិទ្ធិដោយ thmeythmey.com