លោក សុខ ទូច មិនខ្វល់ពីបណ្ដឹងរបស់គណបក្សខ្មែរក្រោក

ជាតិ

នយោបាយជាតិ

លោក សុខ ទូច មិនខ្វល់ពីបណ្ដឹងរបស់គណបក្សខ្មែរក្រោក

07, Aug 2018 , 6:20 pm

រូបភាព

លោក សុខ ទូច ប្រធានរាជ្យបណ្ឌិតសភាកម្ពុជា

ដោយ:

ភ្នំពេញ៖ លោក សុខ ទូច ប្រធានរាជបណ្ឌិត្យសភាកម្ពុជា មិនខ្វល់ជាមួយពាក្យបណ្ដឹងដែលគណបក្សខ្មែរក្រោក បានប្ដឹងឡើយ។ លោក សុខ ទូច រងបណ្តឹងនេះ ក្រោយពីលោក លើកឡើងថា គួរតែចាប់អ្នកធ្វើចលនាទាមទារកោះត្រល់ ដែលផ្តើមគំនិតដោយគណបក្សខ្មែរក្រោក។

ប្រធានរាជបណ្ឌិត្យសភាកម្ពុជារូបនេះ បានឲ្យសារព័ត៌មានថ្មីៗដឹងថា អ្វីដែលលោក បានលើកឡើង គឺមិនបានហាមឃាត់មិនឲ្យមានយុទ្ធនាការអ្វីនោះទេ តែនៅក្នុងដំណាក់កាលនេះ ជាការបោះឆ្នោត។ លោក បញ្ជាក់បែបនេះថា៖«ធ្វើយុទ្ធនាការអី្វធ្វើទៅ តែចាំក្រោយការបោះឆ្នោត ចាំមានរដ្ឋាភិបាលគ្រប់គ្រាន់ ចាំមានយុទ្ធនាការ។ បច្ចុប្បន្នយើងមានតែ រដ្ឋាភិបាលចាំផ្ទះ។ បើយើងទៅធ្វើព្យុះសង្ឃរា រដ្ឋាភិបាល អាចចាប់ដាក់គុកបាន»។

ប្រធានរាជបណ្ឌិត្យសភា បានបន្តថា តាមផ្លូវច្បាប់ គណបក្សមួយ មិនអាចទៅនិយាយជាមួយប្រទេសមួយបានឡើយ។ ការបង្កើតស្ថានការណ៍បែបនេះ អាចធ្វើឲ្យប៉ះពាល់ដល់អ្នកវិនិយោគ នៅក្នុងប្រទេសកម្ពុជា។ មិនតែប៉ុណ្ណោះ រដ្ឋធម្មនុញកម្ពុជា បានទទួលស្គាល់ផែនទីក្រោយអាណានិគមបារាំង ដែលបារាំងបានកាត់តំបន់កូសាំងស៊ិន ដែលមានកោះត្រល់នៅជាមួយផង ទៅឲ្យវៀតណាម។

យ៉ាងណា លោក សុខ ទូច លើកឡើងថា កិច្ចការនេះ គឺជារឿងរបស់អ្នកនយោបាយ ហើយអ្នកមានសមត្ថកិច្ចលើរឿងនេះ គឺជាអ្នកទទួលសំឡេងឆ្នោតគាំទ្រឲ្យធ្វើជារដ្ឋាភិបាល ហើយអាចបង្កើតកងទ័ព ឬដោះស្រាយតាមវិធីអ្វីផ្សេង ដែលជាសិទ្ធិរបស់អ្នកដឹកនាំ។ តែបើគ្រាន់តែផ្ដិតមេដាយ នោះមិនអាចទាមទារកោះត្រល់មកវិញបានឡើយ។

គណបក្សខ្មែរក្រោក ដែលប្រកាសធ្វើយុទ្ធនាការប្រមូលស្នាមមេដៃ ដើម្បីទាមទារយកកោះត្រល់មកវិញ បានដាក់បណ្តឹងទៅកាន់សាលាដំបូងរាជធានីភ្នំពេញហើយ នៅល្ងាចថ្ងៃទី៧ ខែសីហា។ ពាក្យបណ្ដឹងនោះ បានចោទលោក សុខ ទូច ថាជ្រៀតជ្រែកដោយខុសច្បាប់នៅក្នុងការបំពេញការងារសាធារណៈ និងញុះញង់ឲ្យមានការរើសអើង ក៏ដូចជារំលោភលើអំណាចតុលាការ។

គណបក្សខ្មែរក្រោក ដែលមានលោក សុខសុវណ្ណ វឌ្ឍនា សារពង្ស ជាប្រធាន បានសុំឲ្យតុលាការផ្ដន្ទាទោសលោក សុខ ទូច តាមច្បាប់ និងទាមទារឲ្យសងជំងឺចិត្តចំនួន ១០០លានរៀល៕