អន្តរជាតិ
នយោបាយជាតិ
អាមេរិក នៅតែឲ្យគោរពតួនាទីស្នូលរបស់អាស៊ានក្នុងយុទ្ធសាស្ត្រឥណ្ឌូ-ប៉ាស៊ីហ្វិក
រដ្ឋមន្រ្តីការបរទេសអាមេរិក ម៉ៃ ប៉ុមប៉េអូ ថតរូបជាមួយរដ្ឋមន្រ្តីការបរទេសអាស៊ាន (រូបភាពពី Twitter របស់បេសកកម្មអាមេរិកប្រចាំអាស៊ាន)
×![]()
ដោយ: តន ចាន់រិទ្ធារ៉ា
វត្តមានរបស់រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ នៅសិង្ហបុរីដើម្បីចូលរួមកិច្ចប្រជុំថ្នាក់រដ្ឋមន្ត្រីការបរទេសជាច្រើននៅចុងសប្ដាហ៍នេះ ជាការទទួលស្គាល់តួនាទីស្នូលរបស់អាស៊ានក្នុងយុទ្ធសាស្ត្រឥណ្ឌូ-ប៉ាស៊ីហ្វិក។ នេះជាការលើកឡើងរបស់លោកស្រី Piper Campbell ភារធារីស្ថានទូតអាមេរិកប្រចាំអាស៊ាននៅថ្ងៃទី៧ ខែសីហា។ មន្ត្រីការទូតអាមេរិកក៏បញ្ជាក់ពីការប្ដេជ្ញាចិត្តរបស់រដ្ឋបាលប្រធានាធិបតី ដូណាល់ ត្រាំ ក្នុងបន្តទំនាក់ទំនងជាមួយជិតស្និទ្ធជាមួយអាស៊ានដែរ។
អំឡុងពេលទស្សនកិច្ចនៅសិង្ហបុរី រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានចូលរួមក្នុងកិច្ចប្រជុំជាច្រើនដូចជា កិច្ចប្រជុំរដ្ឋមន្ត្រីការបរទេសអាមេរិក-អាស៊ាន កិច្ចប្រជុំរដ្ឋមន្ត្រីការបរទេសនៃប្រទេសគំនិតផ្ដួចផ្ដើមមេគង្គក្រោម កិច្ចប្រជុំអាស៊ីបូព៌ា និងវេទិកាតំបន់អាស៊ានជាដើម។ លោក ប៉ុមប៉េអូ ក៏បានជួបជជែកជាមួយសមភាគីនៃសមាជិកអាស៊ានជាច្រើនរូបទៀត សំដៅរឹតបន្តឹងទំនាក់ទំនងទ្វេភាគី និងទំនាក់ទំនងអាមេរិក-អាស៊ានជារួមផង។
លោកស្រី Piper Campbell ភារធារីនៃបេសកកម្មអាមេរិកប្រចាំអាស៊ាន និយាយថា ជំនួបជាបន្តបន្ទាប់នេះ បានបង្ហាញពីជំហររបស់អាមេរិកក្នុងការទទួលស្គាល់តួនាទីស្នូលរបស់អាស៊ាន។ លោកស្រី Campbell និយាយបែបនេះក្នុងសន្និសីទព័ត៌មានតាមទូរសព្ទនៅថ្ងៃទី៧ ខែមិថុនា ជុំវិញទំនាក់ទំនាក់អាមេរិក-អាស៊ាននៅខួបទី៥១ឆ្នាំនៃការបង្កើតសមាគមប្រជាជាតិអាស៊ីអាគ្នេយ៍កាលពីឆ្នាំ១៩៦៧ នៅទីក្រុងបាងកក។
បើតាមមន្ត្រីទូតអាមេរិករូបនេះ ការចូលរួមរបស់លោក ប៉ុមប៉េអូ ជាការទទួលស្គាល់ជាក់ច្បាស់របស់អាមេរិកពីរចនាសម្ព័ន្ធរបស់អាស៊ាន និងកិច្ចសហប្រតិបត្តិការរស់រវើករវាងភាគីទាំងពីរ។ លោកស្រី Campbell បន្តថា ដំណើរទស្សនកិច្ចរបស់ប្រមុខការទូតអាមេរិកនៅម៉ាឡេស៊ី ឥណ្ឌូណេស៊ី និងការចូលរួមប្រជុំនៅសិង្ហបុរី ក៏ជាការទទួលស្គាល់តួនាទីរបស់អាស៊ាននៅចំកណ្ដាលយុទ្ធសាស្ត្រឥណ្ឌូ-ប៉ាស៊ីហ្វិក ក៏ដូចជាការទទួលស្គាល់ឥណ្ឌូ-ប៉ាស៊ីហ្វិក ជាតំបន់មួយផង។
សូមរំឭកថា មុនធ្វើដំណើរមកកាន់តំបន់អាស៊ានកាលពីសប្ដាហ៍មុន លោក ប៉ុមប៉េអូ បានប្រកាសគំនិតផ្ដួចផ្ដើមសេដ្ឋកិច្ចថ្មីមួយដែលមានទំហំទឹកប្រាក់១១៣លានដុល្លារ។ គំនិតផ្ដួចផ្ដើមនេះ មានគោលដៅគាំទ្រវិស័យអាទិភាពបីនៅឥណ្ឌូ-ប៉ាស៊ីហ្វិក គឺសេដ្ឋកិច្ចឌីជីថល ថាមពល និងហេដ្ឋារចនាសម្ព័ន្ធ។ នេះជាការវិនិយោគបែបយុទ្ធសាស្ត្រមួយរបស់អាមេរិកក្នុងការបន្តទំនាក់ទំនងស៊ីជម្រៅជាមួយប្រទេសឥណ្ឌូ-ប៉ាស៊ីហ្វិក ដែលនឹងនាំដល់កំណើនសេដ្ឋកិច្ច និងការបង្កើតការងារនៅអាមេរិក។
ជាមួយគ្នានេះ អំឡុងពេលចូលរួមកិច្ចប្រជុំវេទិកាតំបន់អាស៊ាន ប្រមុខការទូតអាមេរិកក៏ប្រកាសផ្ដល់ប្រាក់ចំនួន៣០០លានដុល្លារទៀតដើម្បីពង្រឹងកិច្ចសហប្រតិបត្តិការសន្តិសុខក្នុងតំបន់។ កិច្ចសហប្រតិតការនេះនឹងរួមបញ្ចូលជំនួយមនុស្សធម៌ និងសន្តិសុខលំហសមុទ្រដែរ។ សម្រាប់ចំណុចក្រោយនេះ លោកស្រី Campbell ពន្យល់ថា អាមេរិកនឹងសហការជាមួយរដ្ឋក្នុងតំបន់ឥណ្ឌូ-ប៉ាស៊ីហ្វិកដើម្បីបង្កើតប្រព័ន្ធការពារសន្តិសុខផ្ទៃសមុទ្រ ព្រោះនឹងផ្ដល់ប្រយោជន៍ដល់ភាគីទាំងអស់៕
Tag:
អាមេរិក
អាស៊ាន
ឥណ្ឌូ-ប៉ាស៊ីហ្វិក
© រក្សាសិទ្ធិដោយ thmeythmey.com
