ភ្នំពេញ៖ នរាអង្គរ ជាសិប្បកម្មកែច្នៃចង្កៀងពីសូត្រខ្មែរ និងសង្ហារិមធ្វើដោយដៃដទៃទៀត ជាង២០មុខ ដូចជា ពូក សាឡុង និងតុជាដើម។ សិប្បកម្មនេះ បង្កើតឡើងនៅក្នុងឆ្នាំ២០១១ ដោយស្ត្រីវ័យក្មេងមួយរូប គឺអ្នកនាង ថានី ខាធើរីន។ ស្ត្រីវ័យ២៨រូបនេះ អះអាងថា នាងបង្កើត នរា គឺដើម្បីច្នៃផលិតផលសូត្រខ្មែរ ឱ្យក្លាយជាសម្ភារប្រើប្រាស់សម្បូរបែប និងជួយបង្កើតការងារកាន់តែច្រើនឱ្យកូនខ្មែរ ដែលខ្វះជំនាញ ដើម្បីកុំឲ្យពួកគេធ្វើចំណាកស្រុក។ អ្នកនាង ថានី ខាធើរីន ដែលទើបតែទទួលបានពានរង្វាន់សហគ្រិនឆ្នើមវ័យក្មេង ផ្នែក មុខរបរបង្កើតថ្មីកាលពីខែមិថុនាកន្លងទៅនោះ ក៏មានក្ដីស្រមៃឱ្យបុគ្គលិកនរាទាំងអស់ មានជំនាញច្បាស់លាស់ និងមានសមត្ថភាពបើកអាជីវកម្មដោយខ្លួនឯង នៅថ្ងៃអនាគតដូចខ្លួនផងដែរ។ ហេតុអ្វីបានជា សហគ្រិនវ័យក្មេងរូបនេះមានក្ដីប្រាថ្នាបែបនេះ?
តទៅនេះសូមនាងកញ្ញា លោក លោកស្រី អញ្ជើញស្ដាប់បទយកការណ៍ដែលរៀបរៀងដោយកញ្ញា ប៉ូ សាគុន ដូចតទៅ៖
មានវ័យ២៨ឆ្នាំ អ្នកនាង ថានី ខាធើរីន ទើបតែទទួលបានពានរង្វាន់សហគ្រិនឆ្នើមវ័យក្មេងផ្នែក មុខរបរបង្កើតថ្មី ក្រោយពីអាជីវកម្មនេះចាប់កំណើតឡើងនៅឆ្នាំ២០១១ ពោលតាំងពីអ្នកនាងនៅអាយុ២១ឆ្នាំ។ អាជីវកម្មធ្វើអំពូលចង្កៀងច្នៃពីសូត្រខ្មែរ ខ្នើយ សាឡុង តុ និងគ្រឿងសង្ហារឹមជាច្រើនទៀតប្រមាណ២០ប្រភេទច្នៃជាលក្ខណៈខ្មែរ និងជាគំនិតបង្កើតថ្មី គឺនរាកំពុងមានសព្វថ្ងៃ។ ចាប់ផ្ដើមពីមានបុគ្គលិកតែ៣នាក់រហូតដល់៣០នាក់ អ្នកនាង ខាធើរីន មានក្ដីប្រាថ្នាតាំងពីគិតបង្កើតអាជីវកម្មដំបូង ថាអាជីវកម្មរបស់ខ្លួនបង្កើតឡើង ដើម្បីច្នៃសូត្រខ្មែរឱ្យក្លាយជាសម្ភារប្រើប្រាស់សម្បូរបែប និងជួយបង្កើតការងារឱ្យកូនខ្មែរ។ ក្នុងទឹកមុខញញឹម ស្របពេលភ្នែករេទៅមើលអំពូលចង្កៀងដែលដាក់តាំងបង្ហាញ នៅក្នុងស្ដង់របស់ខ្លួន ព្រមដោយសម្ដីមិនខ្លាចគេសើចចំអកពីក្ដីសុបិនរបស់ខ្លួន អ្នកនាង ខាធើរីន ពិតជាចង់ឱ្យក្រុមហ៊ុននរាមានបុគ្គលិករាប់ម៉ឺននាក់នៅថ្ងៃអនាគត។ ទោះកូនអ្នកសៀមរាបរូបនេះ ខំប្រឹងបង្កើតក្រុមហ៊ុននរាទាំងលំបាកលំបិនយ៉ាងណាក្ដី ប៉ុន្តែនាងនៅតែចង់ឱ្យកូនខ្មែរច្រើននាក់ ជាពិសេសបុគ្គលិកដែលធ្លាប់ធ្វើការជាមួយខ្លួន ទៅបើកក្រុមហ៊ុនដូចខ្លួន ឱ្យកាន់តែច្រើនថែមទៀតនៅពេលខាងមុខ។
ថ្វីដ្បិតមុខជំនួញដែលទាក់ទងនឹងគ្រឿងសង្ហារឹមប្រមាណ២០ប្រភេទ ដែលនរាកំពុងមានសព្វថ្ងៃនេះ មិនទាន់មានក្រុមហ៊ុនណាលក់ដូចខ្លួន ដែលជាផ្លូវមួយជួយឱ្យក្រុមហ៊ុននេះមានប្រាក់ច្រើនលើការវាយលុកទីផ្សារទាំងក្នុង និងក្រៅប្រទេស តែស្ថាបនិកនរា បែរជាចង់បានក្រុមហ៊ុនដែលលក់សម្ភារដូចខ្លួន បង្កើតច្រើនដើម្បីប្រកួតប្រជែង។ ឥទ្ធិពលពីប្រព័ន្ធគ្រប់គ្រងទីផ្សារប្រមាណជាង១០ប្រទេស ធ្វើឱ្យអ្នកជំនួញជាស្ត្រីវ័យក្មេងដែលជាកូនពៅក្នុងគ្រួសាររូបនេះ ហាក់មានសុទិដ្ឋិនិយមច្រើន ទៅលើការប្រកួតប្រជែងជំនួញដែលមានមុខទំនិញដូចគ្នា ព្រោះនាងមានជំនឿថា ការប្រកួតប្រជែងដោយភាពស្មោះត្រង់ នឹងធ្វើឱ្យក្រុមហ៊ុនកាន់តែរីកចម្រើន។ តស៊ូរហូតបានបង្កើតអាជីវកម្មថ្មីដោយខ្លួនឯង អ្នកនាង ខាធើរីន និយាយថានាងចង់ឱ្យបុគ្គលិករបស់ខ្លួន ទទួលបានចំណេះច្រើនពីនរា ទោះមិនបាន១០០ភាគរយក៏ដោយចុះ។ «បើមើលក្នុងវិស័យពាណិជ្ជកម្ម គេអាចហៅថាកាប្រកួតប្រជែងគ្នា ប៉ុន្តែសូមប្រកួតប្រជែងក្នុងក្រមសីលធម៌។ យើងសហការគ្នាក្នុងយុទ្ធសាស្ត្រឈ្នះឈ្នះ។ គាត់ធ្វើឲ្យល្អ ទៅលើការងារគាត់។ ខ្ញុំធ្វើឲ្យបានល្អចំពោះការងារខ្ញុំ។ ខ្ញុំអត់ដណ្តើមភ្ញៀវទេ។ អីចឹងធ្វើយ៉ាងម៉េច ជួយគ្នាផលិតផលិតផលនេះឲ្យកាន់តែច្រើន ប្រជាជនមានការងារ។ ហេតុអ្វីយើងត្រូវឈ្លោះគ្នា? ពេលមានការងារ លុយហូរចូលមកក្នុងស្រុក។ ឲ្យតែពួកគាត់រៀនពីខ្ញុំបានច្រើន ខ្ញុំកាន់តែសប្បាយចិត្ត»។
បានជួបផលវិបាកជាច្រើនស្ទើរតែធ្វើឱ្យនរាបាត់ ឈ្មោះម្ដងៗយ៉ាងណាក្ដី ប៉ុន្តែនរានៅតែទៅមុខ ដោយសារតែអ្នកនាង ខាធើរីន ដែលជាម្ចាស់សិប្បកម្មនេះ ប្រាប់ខ្លួនឯងថាមិនត្រូវបោះបង់ក្ដីស្រមៃខ្លួនឡើយ។ ដើរមកដល់ពេលបច្ចុប្បន្ននេះ នរា បានបង្កើតគ្រឿងសង្ហារិមមានពណ៌សម្បុរខ្មែរ ដែលផ្គត់ផ្គង់ទៅសណ្ឋាគារលំដាប់ផ្កាយ៥ ភោជនីយដ្ឋាន និងផ្គត់ផ្គង់តម្រូវការក្នុងស្រុក ថែមទាំងនាំចេញទៅក្រៅប្រទេសផង។ «យើងផ្គត់ផ្គង់មិនត្រឹមតែក្នុងស្រុកទេ គឺទៅក្រៅស្រុកទៀត។ តាមចិត្តភ្ញៀវ។ គាត់មានតម្រូវការម៉ូដបែបណា? គឺគាត់កម្មង់តាមហ្នឹង។ យើងធ្លាប់ផ្ញើទៅបារាំង អូស្ត្រាលី បែលហ្សិក អាមេរិក និងអង់គ្លេស»។
និយាយដោយភាពជឿជាក់ ក្នុងដំណើរសម្ដីម៉ឺងម៉ាត់ និងមានមហិច្ឆតាខ្ពស់ អ្នកនាង ថានី ខាធើរីន ចង់ឱ្យសិប្បកម្មនរា ល្បីឈ្មោះលើឆាកជាតិ និងអន្តរជាតិ ដោយស្នាដៃកូនខ្មែរទាំងស្រុង ដោយមិនមានជនបរទេស សូម្បីម្នាក់ ធ្វើការក្នុងសិប្បកម្មនេះ។ មកដល់ត្រង់នេះ មិនមែននរារើសអើងពូជសាសន៍ឡើយ ប៉ុន្តែអ្នកនាងខាធើរីន គ្រាន់តែចង់លើកទឹកចិត្តខ្មែរ ថាខ្លួនពិតជាមានសមត្ថភាពពេញលេញ ដើរដោយខ្លួនឯងដើម្បីឱ្យអន្តរជាតិទទួលស្គាល់ ស្របពេលនាងពោលសរសើរថា បុគ្គលិកខ្មែរធ្វើការលើសពីទំនួលខុសត្រូវរបស់ខ្លួន ។«ខ្មែរមានមនោសញ្ចេតនាច្រើនជាង ព្រោះនៅពេលគាត់ធ្វើការ គាត់យោគយល់ច្រើន។ ការងារខ្លះ យើងកាន់តែផ្នែកទីផ្សារ ប៉ុន្តែពេលខ្លះគាត់ត្រូវជួបជាមួយជាង។ នេះបានន័យថា គាត់ធ្វើលើសពីទំនួលខុសត្រូវគាត់ទៅហើយ ដើម្បីក្រុមហ៊ុនរីកចម្រើនទៅមុខលឿន។ បរទេស ក៏ធ្វើមិនលើសពីខ្មែរយើងប៉ុន្មានដែរ។ ខ្ញុំចង់ឃើញក្រុមហ៊ុនមួយនេះជោគជ័យ ដោយកូនខ្មែរសុទ្ធសាធ។ ផលិតផលដូចគ្នា បើបរទេសគាត់យកទៅលក់ បានថ្លៃជាង។ ចុះហេតុអ្វីក៏ខ្មែរយើងមិនព្រមជួយខ្មែរគ្នាឯង ជាជាងទៅទិញពីបរទេស»។
ព្រោះតែគ្រឿងសង្ហារិមច្នៃពីសូត្រ មានសម្ភារអំពូលចង្កៀងជាប់ជញ្ជាំង និងដាក់លើតុ ពូក សាឡុង តុ និងសម្ភារផ្សេងទៀត ប្រមាណ២០មុខធ្វើដោយដៃ មិនទាន់មានសិប្បកម្ម ឬ ក្រុមហ៊ុនណាមានដូចខ្លួន នរា ត្រូវទទួលយកបុគ្គលិកដែលមិនចេះសោះ មកធ្វើការ។ ដោយធ្វើការបណ្ដើរ បង្រៀនពួកគេបណ្ដើរ ហើយនេះក៏ជាបំណងរបស់ម្ចាស់សិប្បកម្មនេះដែរ ដែលចង់កាត់បន្ថយចំណាកស្រុក របស់អ្នកគ្មានជំនាញ។ អ្នកនាង ខាធើរីន មានជំនឿថា ខ្លួនអាចបណ្ដុះអ្នកគ្មានជំនាញជាច្រើននាក់ ដែលមកធ្វើការឱ្យខ្លួន ឱ្យមានជំនាញ និងមានសមត្ថភាព ដើម្បីបើកអាជីវកម្មខ្លួនឯងទៅថ្ងៃអនាគត។ «ចង្កៀងនេះ គឺជាការងារអត់ទូលំទូលាយក្នុងទីផ្សារទេ។ អីចឹងរាល់ថ្ងៃ ខ្ញុំទទួលយកបុគ្គលិកដែលមិនចេះសោះ មកបង្រៀន។ យើងអត់រើសអើងថាបុគ្គលិកនោះ ចេះ ឬមិនចេះ ពីព្រោះការងារចង្កៀង ជាការងារថ្មី។ តែអ្វីដែលសំខាន់ គាត់មានឆន្ទៈក្នុងការរៀនឬអត់?»។
ផ្ដើមក្ដីសង្ឃឹមចេញពីការឈឺចាប់ ព្រោះតែអ្នកភូមិមើលងាយគ្រួសារខ្លួន ដែលមានសុទ្ធតែកូនស្រី ថាមិនអាចធ្វើឱ្យគ្រួសាររុងរឿងបាន ក្មេងស្រី ខាធើរីន បានតាំងចិត្តខំរៀន រហូតដល់ទទួលបានពិន្ទុល្អតាំងពីតូច។ «គ្រួសារខ្ញុំមានកូនតែ២នាក់។ ស្រីទាំង២នាក់។ ប្រឈមនឹងការមើលងាយ គេថាគ្មានអ្នកណាស្នងត្រកូល។ មួយទៀតគេថា កូនស្រីគ្មានទៅមុខទេ។ គ្រួសារក្រហើយ នៅតែក្រអីចឹង។ បើមានកូនប្រុស ក្រែងគេខំ ជ្រោងគ្រួសារ។ ឪពុកខ្ញុំឈឺចាប់នឹងការមើលងាយនេះ គាត់បានបង្រៀនកូនឲ្យឈរដោយខ្លួនឯង ហើយប្រឹងប្រែង ឲ្យមានលក្ខណៈពិសេសមួយដែលគេឈប់មើលងាយគ្រួសារយើង»។
អ្នកនាង រ៉េត កិត្យា ជាបុគ្គលិកនៅសិប្បកម្មនរា ផ្នែកទីផ្សារ ដែលទើបតែចូលធ្វើនៅទីនេះបានរយៈពេល២ខែតែប៉ុណ្ណោះ។ តាមពិតទៅ មុនចូលមកនរា កិត្យា ធ្លាប់មានបទពិសោធន៍ធ្វើការផ្នែកលក់១០ឆ្នាំមកហើយ។ រយៈពេលពីរខែនេះ អ្វីដែលនារីវ័យ២៨ឆ្នាំរូបនេះ រៀនសូត្របានពីនរា គឺនាងអាចធ្វើការលើសពីជំនាញរបស់ខ្លួន។ អ្នកនាងកិត្យាបញ្ជាក់ថា មុនមកធ្វើការនៅនរា នាងមានតែជំនាញផ្នែកលក់តែប៉ុណ្ណោះប៉ុន្ដែនៅនរា បានបង្រៀននាងឱ្យចេះផ្នែកច្នៃម៉ូដគ្រឿងសង្ហារិម ចេះមើលទីតាំងរៀបចំគ្រឿងសង្ហារិមលំអក្នុងបន្ទប់សណ្ឋាគារ ភោជនីយដ្ឋាន ចេះផ្នែកគ្រប់គ្រង និងវិធីសាស្ត្រទាក់ទាញអតិថិជនជាដើម។ ដ្បិតម្នាក់ឯងធ្វើការងារច្រើន តែកិត្យាមិនបានត្អូញត្អែរ ពីការធ្វើការងារច្រើនឡើយ នាងបែរជាយល់ថា នាងកំពុងតែទទួលបានចំណេះច្រើនទៅវិញ។ «គាត់តែងតែផ្តល់ព័ត៌មានទាំងអស់ពីភ្ញៀវរបស់គាត់មកខ្ញុំ ហើយគាត់ឲ្យខ្ញុំទាក់ទងផ្ទាល់ជាមួយអតិថិជនតែម្តង។ ហ្នឹងដែលខ្ញុំទទួលបាន ហើយដែលខុសប្លែកពីកន្លែងមុន។ ជាគោលដៅដ៏មុតស្រួចមួយ ដែលធ្វើឲ្យខ្ញុំឈានជើង ចូលក្នុងសង្គមបានលឿន។ ទោះជាថ្ងៃក្រោយខ្ញុំឈប់ធ្វើការនៅទីនេះ ឬខ្ញុំបង្កើតអាជីវកម្មផ្ទាល់ខ្លួន ក៏ខ្ញុំមានបណ្តាញស្រាប់។ ចឹងការបង្កើតបណ្តាញ គឺសំខាន់នាស់ មិនថាសម្រាប់អ្នកធ្វើការ ឬអ្នករកស៊ីទេ»។
ដូចទៅនឹងបំណងរបស់ស្ថាបនិកសិប្បកម្មនរា អ្នកនាង កិត្យា ពោលដោយស្នាមញញឹម និងមានជំនឿ នាងថា ក្រោយពីបានមើលឃើញគំរូរបស់ អ្នកនាងខាធើរីន នាងពិតជាមានគម្រោងបើកអាជីវកម្មផ្ទាល់ខ្លួននៅថ្ងៃខាងមុខ ក្រោយពីនាងទទួលបានចំណេះច្រើននៅទីនេះ។
បុគ្គលិកមួយរូបទៀត លោក ធាង រតនា ធ្វើការនៅក្រុមហ៊ុននរានេះ បានរយៈពេល១ឆ្នាំ ផ្នែកគូរប្លង់គំរូ។ ដោយត្រូវការប្រាក់យកទៅផ្គត់ផ្គង់ការសិក្សា រតនា ដែលកំពុងរៀនផ្នែកព័ត៌មានវិទ្យា ដំបូងឡើយលោកចាប់ផ្ដើមការងាររចនាម៉ូដគំរូ ដោយយល់ដឹងពីការងារនេះតិចតួច។ រតនា ត្រូវធ្វើការយ៉ាងលំបាកទៅនឹងការសិក្សាស៊ីជម្រៅ លើការគូរម៉ូដគំរូ និងធ្វើការជាមួយជាងផង។ ក្រោយពីបានធ្វើការនៅទីនេះរយៈពេល១ឆ្នាំ បន្តិចម្ដងៗ រតនា ថា ការងារនៅទីនេះ បានបង្រៀនលោក ឱ្យដឹងពីរបៀបធ្វើការ ប្រកបដោយប្រសិទ្ធភាព។ «ឃើញគាត់ទាក់ទងភ្ញៀវយ៉ាងម៉េច? យើងលួចរៀន។ សំខាន់គឺគំនិតរចនាម៉ូដរបស់គាត់។ ខ្ញុំរៀនចេះចំណុចពីគាត់ច្រើន ព្រោះនៅសាលាខ្ញុំរៀនតែទ្រឹស្តីទេ ពេលខ្ញុំចូលធ្វើការ ទើបដឹងថា គេអនុវត្តយ៉ាងម៉េច? គេធ្វើការយ៉ាងម៉េច? ត្រូវបត់បែនយ៉ាងម៉េច? ផលវិបាកគឺយើងជាអ្នករចនាម៉ូដ។ ពេលយើងចេញម៉ូដហើយ យើងយកទៅឲ្យជាង។ ពេលខ្លះយើងពិបាកពន្យល់គាត់ ដោយសារយើងនៅថ្មីដែរ»។
ការជឿជាក់លើខ្លួនឯង ដួលហើយនៅតែមានក្ដីសង្ឃឹមក្រោកជាថ្មី ទោះតែមនុស្សភាគច្រើនមិនគាំទ្រការងាររបស់ខ្លួនយ៉ាងណាក្ដី តែនារីដែលបានទទួលបទពិសោធន៍ពីក្រៅប្រទេសជាង១០ប្រទេសរូបនេះ តែងប្រាប់ខ្លួនឯងជានិច្ចថា បើមិនដើរទៅមុខ អ្នកប្រាកដជាដូចពាក្យគេថា។ ព្យាយាមមើលពីភាពបរាជ័យរបស់បុគ្គលជោគជ័យ ជាចំណុចនាំឱ្យមនុស្សមានកម្លាំងដើរទៅមុខ ។ នេះជាការលើកឡើងរបស់អ្នកនាង ខាធើរីន។ ម្ចាស់ពានរង្វាន់សហគ្រិនឆ្នើមវ័យក្មេង ថានី ខាធើរីន បានលើកទឹកចិត្តបុគ្គលិករបស់ខ្លួន ជាពិសេសស្ត្រី គួរតែបង្កើតអាជីវកម្ម ឱ្យបានច្រើនដើម្បីបង្កើតការងារឱ្យខ្មែរ និងដើម្បីប្រកួតប្រជែងទីផ្សារក្រៅប្រទេស៕