អន្តរជាតិ
នយោបាយអន្តរជាតិ
របាយការណ៍៖ ជាងបីខែ ប៉ូលិសឥណ្ឌូណេស៊ីចាប់ខ្លួនជនសង្ស័យភេរវកម្មជិត៣០០នាក់
× រយៈពេលប៉ុន្មានខែចុងក្រោយនេះ ឥណ្ឌូណេស៊ី បានទទួលរងការវាយប្រហារពីក្រុមភេរវជនជាបន្តបន្ទាប់ ខណៈដែលរដ្ឋមានប្រជាជនឥស្លាមច្រើនបំផុតរបស់ពិភពលោកមួយនេះ ព្យាយាមរឹតបន្តឹងសន្តិសុខខ្លាំងក្នុងនាមជាម្ចាស់ផ្ទះ Asian Games ឆ្នាំ២០១៨។ ជនសង្ស័យ ក៏ត្រូវបានចាប់ខ្លួនជាបន្តបន្ទាប់ដូចគ្នាផងដែរ។
មេប៉ូលិសជាតិឥណ្ឌូណេស៊ី លោក Tito Karnavian នៅដើមសប្តាហ៍នេះ បានឲ្យដឹងថា គិតចាប់ពីមានការវាយប្រហាររបស់ភេរវករជាបន្តបន្ទាប់គ្នានៅកោះ Java ក្នុងខែឧសភាកន្លងមក ប៉ូលិសឥណ្ឌូណេស៊ី បានចាប់ខ្លួនជនសង្ស័យជិត៣០០នាក់ហើយ។ នេះបើយោងតាមការចុះផ្សាយរបស់សារព័ត៌មាន The Jakarta Globe។
តាមប្រភពព័ត៌មនដដែលនោះ មេប៉ូលិសជាតិឥណ្ឌូណេស៊ីរូបនេះ បានអះអាងថា កងកម្លាំងសន្តិសុខរបស់រដ្ឋាភិបាលបានផ្តោតសំខាន់បំផុតលើការងារពាក់ព័ន្ធនឹងការគំរាមកំហែងបែបភេរវកម្ម ជាពិសេសដើម្បីធានាពីសុវត្ថិភាពសម្រាប់ព្រឹត្តិការណ៍ធំប្រចាំតំបន់ដែលឥណ្ឌូណេស៊ីធ្វើជាម្ចាស់ផ្ទះ Asian Games ដែលនឹងត្រូវចាបផ្តើមនៅថ្ងៃ១៨ សីហាខាងមុខដ៏ខ្លីនេះ។
ជុំវិញព្រឹត្តិការណ៍ Asian Games នេះដែរ រដ្ឋាភិបាលក្រុងហ្សាការតា ថ្មីៗនេះ ក៏បានអះអាងថា ឥណ្ឌូណេស៊ី នឹងដាក់ពង្រាយកងកម្លាំងប្រដាប់អាវុធដែលមានទាំងប៉ូលិស និងទាហាន បួនម៉ឺននាក់ដើម្បីធានាពីសុវត្ថិភាពដល់អត្តពលិក ១៥០០០នាក់ និងមន្ត្រីជាន់ខ្ពស់ពីបណ្តាប្រទេស៤៥។
គួរជម្រាបផងដែរថា ជាញឹកញាប់ឥណ្ឌូណេស៊ី តែងទទួលរងការប្រវាយពីក្រុមភេរវជន ខណៈដែលមានរបាយការណ៍ជាច្រើន មានការព្រួយបារម្ភកាន់តែខ្លាំងពីការវិលត្រឡប់ និងបែកខ្ញែករបស់ក្រុមភេរវករដែលចាញ់សង្គ្រាមនៅមជ្ឈិមបូព៌ា ហើយដាក់គោលដៅមកអាស៊ីអាគ្នេយ៍វិញ។
ដោយសារតែការគំរាមកំហែងពីភេរវករ នៅខែឧសភាកន្លងទៅសភាឥណ្ឌូណេស៊ី បានអនុម័តលើសំណើវិសោធនកម្មស្តីពីច្បាប់ប្រឆាំងភេរវកម្ម ដោយផ្តល់បុព្វសិទ្ធិដល់កងកម្លាំងក្នុងការបំពេញបេសកម្មរបស់ពួកគេឲ្យកាន់តែមានប្រសិទ្ធភាព។ ពីមុនកងកម្លាំងឥណ្ឌូណេស៊ី ពិបាកធ្វើការបន្តិច ដ្បិតពួកគេ មិនចាត់វិធានការលើជនសង្ស័យភេរវកម្មបានឡើយ ប្រសិនបើពួកគេ មិនទាន់មានសកម្មភាពជាក់ស្តែងនោះ៕
Tag:
ឥណ្ឌូណេស៊ី
អាស៊ាន
ភេរវកម្ម
© រក្សាសិទ្ធិដោយ thmeythmey.com