រថយន្ត
អន្តរជាតិ
ឥណ្ឌូណេស៊ី និងម៉ាឡេស៊ី ចុះហត្ថលេខាផ្លូវការលើកិច្ចព្រមព្រៀងផលិតរថយន្តប្រចាំតំបន់អាស៊ាន
× ឈរតាមគោលការណ៍សហប្រតិបត្តិការ និងស្មារតីរបស់ប្រមុខដឹកនាំនៃប្រទេសទាំងពីរ ឥណ្ឌូណេស៊ី និងម៉ាឡេស៊ី បានចុះហត្ថលេខាស្តីពីការរួមគ្នាផលិតរថយន្តសម្រាប់ទីផ្សារអាស៊ានដែលដំឡើងដោយប្រើប្រាស់វត្ថុធាតុដើមក្នុងតំបន់តែម្តង។ នេះគឺជាជំហានដំបូង និងថ្មីមួយហើយរបស់ប្រទេសអាស៊ាន ដែលបានចាប់ដៃគ្នាបង្កើតផលិតផលប្រចាំតំបន់។
រដ្ឋាភិបាលក្រុងហ្សការតា និងរដ្ឋាភិបាលក្រុងកូឡាឡាំពួរ នៅថ្ងៃ១០ សីហា បានចុះហត្ថលេខាជាផ្លូវការលើអនុស្សារណយោគយល់ក្នុងការផលិតរថយន្តប្រចាំតំបន់អាស៊ាន។ នេះ គឺជាការចាប់ផ្តើមនៃកិច្ចសហប្រតិបត្តិការរបស់ប្រទេសទាំងពីរក្នុងការពង្រឹងកម្លាំងការងាររោងចក្ររថយន្តស្វ័យប្រវត្តិ និងសង្វាក់នៃការផ្គត់ផ្គង់ដែលមានវត្ថុធាតុដើមនៅក្នុងតំបន់ ក៏ដូចជាបង្កើតម៉ាករថយន្តថ្មីនៅក្នុងតំបន់។
តាមការចុះផ្សាយរបស់សារព័ត៌មានសិង្ហបុរី Straits Times កិច្ចព្រមព្រៀងនេះ នឹងត្រូវអនុវត្តដោយក្រុមហ៊ុនម៉ាឡេស៊ី Malaysian Automotive Institute (MAI) និងក្រុមហ៊ុនឥណ្ឌូណេស៊ី Indonesian Automotive Institute (IOI) ដែលសុទ្ធសឹងតែជាអង្គភាពរបស់រដ្ឋាភិបាលទាំងពីរ។
ជាមួយគ្នានេះ តាមការបញ្ជាក់របស់នាយកប្រតិបត្តិក្រុមហ៊ុន MAI លោក Mohamad Madani ឥណ្ឌូណេស៊ី និងម៉ាឡេស៊ី បានត្រៀមខ្លួនរួចជាស្រេច ក៏ដូចជាមានសមត្ថភាពក្នុងការផលិតរថយន្ត ជាមួយនឹងគ្រឿងផ្សំ៩០ភាគរយជាសមាសធាតុក្នុងតំបន់។ លោក អះអាងថា ភាគីទាំងពីរ នឹងបន្តស្រាវជ្រាវលើបច្ចេកទេសក្នុងការផលិតបន្ថែម ប៉ុន្តែលោកបដិសេធបញ្ជាក់កាលបរិច្ឆេទដែលរថយន្តអាចផលិតរួចរាល់។
ជុំវិញកិច្ចព្រមព្រៀងនេះដែរ រដ្ឋមន្ត្រីពាណិជ្ជកម្ម និងឧស្សាហកម្មអន្តរជាតិម៉ាឡេស៊ី លោក Leiking បានឲ្យដឹងថា កិច្ចព្រមព្រៀងនេះ ជាលទ្ធផលមួយនៃជំនួបរបស់លោកនាយករដ្ឋមន្ត្រីម៉ាឡេស៊ី មហាធៀ មហាម៉ាត់ និងលោកប្រធានាធិបតីឥណ្ឌូណេស៊ី ចូកូ វីដូដូ កាលពីខែមិថុនាកន្លងទៅ។ លោករដ្ឋមន្ត្រី បន្ថែមថា កិច្ចព្រមព្រៀងនេះ បានបង្ហាញថា ប្រទេសទាំងពីរ បានសហការគ្នាទាំងផ្នែកសេដ្ឋកិច្ច និងការអភិវឌ្ឍសង្គម នៅក្នុងតំបន់អាស៊ាន។
សូមរម្លឹកផងដែរថា នៅខែមិថុនាកន្លងទៅ លោកនាយករដ្ឋមន្ត្រីម៉ាឡេស៊ី មហាធៀ បានជ្រើសរើសឥណ្ឌូណេស៊ី ជាទិសដៅដំបូងសម្រាប់ការបំពេញទស្សនកិច្ចផ្លូវការនៅក្នងុតំបន់អាស៊ាន។ ពេលនោះហើយ ដែលលោកនាយករដ្ឋមន្ត្រីរូបនេះ បានបបួលប្រធានាធិបតីឥណ្ឌូណេស៊ី ផលិតរថយន្តរួមគ្នាសម្រាប់ផ្គត់ផ្គង់ក្នុងទីផ្សារអាស៊ាន៕
Tag:
ឥណ្ឌូណេស៊ី
ម៉ាឡេស៊ី
© រក្សាសិទ្ធិដោយ thmeythmey.com