អន្តរជាតិ
តួកគីមិនចុះញ៉ម ទោះរងសម្ពាធសេដ្ឋកិច្ចរបស់អាមេរិករហូតរូបិយវត្ថុក្នុងស្រុកធ្លាក់ថ្លៃខ្លាំង បុរសម្នាក់កាន់ក្រដាសប្រាក់ Lira តួកគី និងក្រកាសប្រាក់ដុល្លារអាមេរិក (រូបភាព AFP)
× សម្ពាធផ្នែកសេដ្ឋកិច្ចរបស់អាមេរិក កំពុងធ្វើឲ្យតួកគីជួបបញ្ហាយ៉ាងខ្លាំង ហើយរូបិយវត្ថុជាតិតួកគី lira បានដាំក្បាលចុះមិនធ្លាប់មាន។ សម្ពាធរបស់អាមេរិកផ្ដើមចេញពីការជំហរតឹងរ៉ឹងរបស់តួកគី ដែលមិនព្រមដោះលែងអាចារ្យសាសនាគ្រិស្តម្នាក់ដែលត្រូវបានចាប់ខ្លួនក្រោមការចោទប្រកាន់ថា ធ្វើសកម្មភាពភេរវកម្ម និងស៊ើបការណ៍សម្ងាត់។ យ៉ាងណាមិញ ក្រុងអង់ការ៉ាមិនចុះញ៉មនឹងចំណាត់ការរបស់ក្រុងវ៉ាស៊ីនតោនឡើយ និងត្រៀមចាត់វិធានការតបវិញផងនៅថ្ងៃទី១៣ ខែសីហា។
ផ្ដើមចេញពីការចាប់ចងអាចារ្យគ្រិស្តសាសនាម្នាក់ ទំនាក់ទំនងរវាងអាមេរិក និងតួកគីបានប្រែទៅជាល្អក់កករខ្លាំង។ ក្រោយតួកគីមិនព្រមដោះលែងតាមការទាមទារ អាមេរិកក៏លែងធម៌ក្ដៅដាក់តួកគីតែម្ដង ដោយប្រធានាធិបតីអាមេរិកបានបង្កើនពន្ធនាំចូលទ្វេដងលើដែកថែម និងអាលុយមីញ៉ូមរបស់តួកគី។ ពោល គឺតួកគីត្រូវបង់ពន្ធនាំចូលអាលុយមីញ៉ូមចំនួន២០ភាគរយ ហើយដែកថែបត្រូវបង់ដល់ទៅ៥០ភាគរយឯណោះ។
បន្ទាប់ពីទណ្ឌកម្មរបស់អាមេរិក ប្រាក់ជាតិតួកគី lira បានធ្លាក់ថ្លៃរហូតដល់ទៅ៤០ភាគរយតាំងពីសប្ដាហ៍មុនមក បើប្រៀធៀបលុយដុល្លារអាមេរិក ដោយតួកគីបានចោទប្រធានាធិបតីអាមេរិក ដូណាល់ ត្រាំ ថា កំពុងវាយប្រហារលើរូបិយវត្ថុជាតិរបស់ខ្លួន។ ឆ្លើយតបសកម្មភាពរបស់អាមេរិក ក្រុងអង់ការ៉ាបានរៀបចំផែនការបន្ទាន់វិញដើម្បីទប់ទល់ស្ថានការណ៍ដែលអាក្រក់ខ្លាំងនេះ។ រដ្ឋមន្ត្រីហិរញ្ញវត្ថុតួកគី Berat Albayrak បានហៅទង្វើអាមេរិកជាស្ថានភាពដែលកើតឡើងនៅគ្រប់ប្រទេសកំពុងអភិវឌ្ឍ។
ក្នុងគោលដៅបន្ធូរស្ថានការណ៍ រដ្ឋាភិបាលតួកគីបានណែនាំស្ថាប័នពាក់ព័ន្ធរបស់ខ្លួនឲ្យចាត់វិធានការនៅថ្ងៃទី១៣ ខែសីហា ព្រោះរដ្ឋមានផែនការត្រៀមស្រេចអស់ហើយ។ «ជាមួយនឹងធនាគារ យើងបានត្រៀមខ្លួនផែនការសកម្មភាពពាក់ព័ន្ធស្ថានភាពរបស់ក្រុមហ៊ុនយើងរាប់តាំងពីក្រុមហ៊ុនខ្នាតតូច និងធំ ដែលរងគ្រោះដោយអាមេរិក។ ព្រមគ្នានឹងធនាគារជាមួយទីភ្នាក់ងារត្រួតពិនិត្យហិរញ្ញវត្ថុ យើងនឹងចាត់វិធានការចាំបាច់បន្ទាន់»។ នេះជាការលើកឡើងរបស់លោក Albayrak នៅថ្ងៃទី១៣ ។
ដោយឡែកប្រធានាធិបតីតួកគីផ្ទាល់ តៃយីប អ៊ែរដូហ្កាន់ ក៏បានរិះគន់ចំណាត់ការរបស់លោក ត្រាំ ដែលបង្កើនការយកពន្ធទ្វេដងលើដែកថែប និងអាលុយមីញ៉ូម។ នៅថ្ងៃទី១២ ខែសីហា លោក អ៊ែរដូហ្កាន់ និយាយថា នេះជាប្រតិបត្តិការមួយប្រឆាំងតួកគី សំដៅធ្វើឲ្យតួកគីចុះចាញ់តែផ្នែកហិរញ្ញវត្ថុ និងនយោបាយ និងធ្វើឲ្យតួកគីទាំងមូលលុតជង្គង់។ ប៉ុន្តែលោកបានប្រាប់អាមេរិកវិញថា តួកគីដឹងគន្លឹះរបស់អាមេរិកហើយ។
ករណីខាងលើ ជាករណីមួយក្នុងចំណោមការខ្វែងគំនិតរវាងអាមេរិក និងតួកគី ដែលជាសមាជិកសម្ព័ន្ធយោធាណាតូដូចគ្នា។ ទំនាក់ទំនងទ្វេភាគីនេះ បានរអាក់រអួលខ្លាំងក្រោយតួកគីទិញប្រព័ន្ធការពារមីស៊ីល S-400 របស់រុស្ស៊ី ដែលកំពុងមិនត្រូវគ្នាជាមួយអាមេរិកនោះ។ ក្រុងវ៉ាស៊ីនតោនបានប្រាប់ឲ្យក្រុងអង់ការ៉ាផ្អាកទិញអាវុធរុស្ស៊ី បើមិនចង់អស់សិទ្ធិទិញយន្តហោះ F-35 ។ ស្របគ្នាទំនាក់ទំនងធ្លាក់ចុះ តួកគីឆ្លើយទៅអាមេរិកថា បើអាមេរិកបន្តអាកប្បកិរិយាបែបនេះ ខ្លួននឹងរកសម្ព័ន្ធមិត្តថ្មីហើយ៕
© រក្សាសិទ្ធិដោយ thmeythmey.com