អន្តរជាតិ
មហាធៀ៖ ប្រទេសអ្នកមានគឺ ប្រទេសមានប្រជាជនប្រឹងប្រែងធ្វើការដើម្បីជាតិ មិនមែនចាំតែសុំដំឡើងប្រាក់ខែ
× ប្រទេសអ្នកមាន គឺជាប្រទេសដែលប្រជាជនមានអំណាចទិញ (Purchasing power) ខ្ពស់ ដោយសារពួកគេមានផលិតភាពការងារខ្ពស់ និងប្រឹងប្រែងធ្វើការខ្លាំង។ នេះជាសម្តីរបស់លោក មហាធៀ មហាម៉ាត់ នាយរដ្ឋមន្ត្រីម៉ាឡេស៊ី ថ្លែងទៅកាន់សមាជិកគណៈរដ្ឋមន្ត្រីថ្ងៃចន្ទទី ១៣ ខែសីហា ពេលនិយាយពីការស្នើសុំដំឡើងប្រាក់បៀវត្សរ៍មន្ត្រី។
ពីការិយាល័យនាយករដ្ឋមន្ត្រីនៅក្រុង Putra Jaya លោក មហាធៀ បានពន្យល់ថា ការដំឡើងប្រាក់ខែទោះកម្រិត ១០ ឬ ដល់២៥ ភាគរយក៏ដោយ ក៏វាមិនមានតម្លៃដែរ បើសិនជាមន្ត្រី និងប្រជាជនទាំងអស់មិនប្រឹងប្រែងធ្វើការបង្កើនផលិតភាពការងារទេនោះ។
លោក មហាធៀ បន្ថែមថា ក្នុងករណីដែលមានការបង្កើនប្រាក់ខែ ហើយផលិតភាពការងារទាបឬ នៅដដែលមិនកើនឡើងនោះ ការចំណាយលើការរស់នៅនឹងកើនឡើងព្រោះទំនិញដែលធ្លាប់មានតម្លៃថោកនឹងឡើងថ្លៃ។ នេះក៏ដ្បិតថា ផលិតទាំងនោះផលិតដោយកម្លាំងពលកម្មដែលមានប្រាក់ខែខ្ពស់តែផលិតភាពការងារទាប។
បើតាមសារព័ត៌មាន Malaysiakini នាយករដ្ឋមន្ត្រីវ័យ ៩៣ ឆ្នាំនេះនិយាយដូច្នេះ៖«ប្រាក់ខែច្រើនហើយ ប៉ុន្តែសមត្ថភាពឬអំណាចនៃការទិញរបស់ប្រជាជននៅដដែលដូចមុន។ ស្ថានភាពដូច្នេះវាមិនមែនជាប្រទេសដែលមានឡើយ។ តើក្លាយជាមហាសេដ្ឋីបានប្រយោជន៍អី បើសិនជាយើងអាចមានលទ្ធភាពត្រឹមទិញផលិតផលតាមថ្នល់ដដែលនោះ?»
លោក មហាធៀ បន្តថា ជារួមសមត្ថភាពឬអំណាចនៃការទិញរបស់ប្រជាជនម៉ាឡេស៊ីពឹងផ្អែកសំខាន់លើផលិតភាពការងារ និងការប្រឹងប្រែងធ្វើការងាររៀងរាល់ថ្ងៃ។ ក្នុងកាលៈទេសៈនេះ លោកនាយករដ្ឋមន្ត្រីទី៧ រូបនេះបានឆ្លៀតឱកាសផងដែរដោយអំពាវនាវឲ្យពលរដ្ឋម៉ាឡេស៊ីជាពិសេសក្មេងជំនាន់ក្រោយ គួរគោរពឲ្យបាននូវតម្លៃនៃភាពស្មោះត្រង់ និងប្រឹងប្រែងខ្ពស់សម្រាប់ជួយជាតិ។ ម៉ាឡេស៊ីត្រូវក្លាយជាប្រទេសដែលឧស្សាហ៍ព្យាយាមប្រឹងប្រែងធ្វើការ ហើយផ្តោតការយកចិត្តទុកដាក់ខ្លាំងលើផលិតភាពការងារ ដោយមិនមែនជាប្រទេសដែលមានពលរដ្ឋចាំសុំដំឡើងតែប្រាក់ខែ។
លោក មហាធៀ និយាយថា ដោយសារវ័យចាស់ជរាទៅនោះ អ្វីដែលលោកជួយបានពេលនេះគឺ ជួយជំរុញ និងបណ្តុះស្មារតីមន្ត្រីរាជការឲ្យមានភាពស្មោះត្រង់និងឧស្សាហ៍ព្យាយាមធ្វើការងារដើម្បីជាតិ។ ពួកគេជាគ្រឿងម៉ាស៊ីនដែលធ្វើឲ្យម៉ាឡេស៊ីរីកចម្រើនលូតលាស់ និងទទួលបានការគោរពពីសហគមន៍អន្តរជាតិនៅពេលអនាគតផង៕
Tag:
មហាធៀ មហាម៉ាត់
ម៉ាឡេស៊ី
ផលិតភាពការងារ
© រក្សាសិទ្ធិដោយ thmeythmey.com