រដ្ឋាភិបាលមីយ៉ាន់ម៉ា ទាត់ចោលការកោះហៅរបស់តុលាការព្រហ្មទណ្ឌអន្តរជាតិលើសំណុំរឿងរ៉ូហ៊ីងយ៉ា

អន្តរជាតិ

រដ្ឋាភិបាលមីយ៉ាន់ម៉ា ទាត់ចោលការកោះហៅរបស់តុលាការព្រហ្មទណ្ឌអន្តរជាតិលើសំណុំរឿងរ៉ូហ៊ីងយ៉ា

14, Aug 2018 , 8:59 am

រូបភាព

ដោយ: ថ្មីៗ

រដ្ឋាភិបាលក្រុងណៃពិដោរ បានចេញសេចក្តីថ្លែងការណ៍មួយពាក់ព័ន្ធនឹងការកោះហៅរបស់តុលាការព្រហ្មណ្ឌអន្តរជាតិ (ICC)ឲ្យមីយ៉ាន់ម៉ាចូលបំភ្លឺករណីវិបត្តិជនភៀសខ្លួនក្នុងរដ្ឋរ៉ាខាន (Rakhine)។ ក្រុងពិដោរ បានអះអាងថា ខ្លួនមិនឲ្យតម្លៃលើការកោះនោះឡើយ ដ្បិតមីយ៉ាន់ម៉ា មិនមែនជារដ្ឋភាគីរបស់លក្ខន្តិកៈក្រុងរ៉ូមឡើយ។

តុលាការព្រហ្មទណ្ឌអន្តរជាតិ កាលពីថ្ងៃ២១ មិថុនាកន្លងទៅ បានចេញសម្រេចមួយដោយបានកោះហៅរដ្ឋាភិបាលមីយ៉ាន់ម៉ាដើម្បីឆ្លើយតប និងបំភ្លឺពាក់ព័ន្ធសំណើសុំចាត់ការរបស់រដ្ឋអាជ្ញានៃតុលាការព្រហ្មទណ្ឌអន្តរជាតិលើវិបត្តិជនភៀសខ្លួនរ៉ូហ៊ីងយ៉ារបស់មីយ៉ាន់ម៉ា ដែលរដ្ឋអាជ្ញា បានមើលឃើញថាជាសញ្ញាណនៃបទឧក្រិដ្ឋកម្មប្រឆាំងមនុស្សជាតិ។

តាមរយៈសេចក្តីសម្រេចកម្រាស់៥ទំព័រ តុលាការ ក៏បានកំណត់ថ្ងៃចុងក្រោយសម្រាប់រដ្ឋាភិបាលមីយ៉ាន់ម៉ាបំភ្លឺ និងតវ៉ាជុំវិញបណ្តឹងប្រឆាំងខ្លួនពីរដ្ឋអាជ្ញាតុលាការអន្តរជាតិត្រឹមថ្ងៃទី២៧ កក្កដា។ តែគួរកត់សម្គាល់នោះ មីយ៉ាន់ម៉ា មិនបានសហការឡើយ ក្រោមហេតុផលថា មីយ៉ាន់ម៉ា មិនមែនជាភាគីនៃតុលាការឡើយ។

តាមការចុះផ្សាយរបស់សារព័ត៌មានមីយ៉ាន់ម៉ា Myanmar Times នៅថ្ងៃ១០ សីហា ការិយាល័យរបស់ទីប្រឹក្សារដ្ឋលោកស្រី អ៊ុងសាន ស៊ូជី បានបញ្ជាក់ក្នុងសេចក្តីថ្លែងការណ៍មួយថា មីយ៉ាន់ម៉ា ក្នុងនាមរដ្ឋមិនមានជាភាគីលក្ខន្តិកៈក្រុងរ៉ូម គ្មានកាតព្វកិច្ចអ្វីដែលត្រូវចូលរួមតស៊ូក្តីជាមួយនឹងរដ្ឋអាជ្ញា ICCឡើយ ហើយរឹតតែមិនមានហេតុផលអ្វីដែលត្រូវទទួលយកការកោះហៅនោះផងដែរ។

តាមរយៈសេចក្តីថ្លែងការណ៍ដដែលនោះ មីយ៉ាន់ម៉ា បានចាត់ទុកសំណើរបស់រដ្ឋអាជ្ញាICC ក្នុងការចាត់ការមីយ៉ាន់ម៉ាលើករណីរដ្ឋរ៉ាខាន គឺជារឿងមិនត្រឹមត្រូវទាល់តែសោះ ហើយ ទង្វើនេះ ក៏អាចនិយាយថាជាការប៉ុនប៉ងដោយប្រយោលក្នុងការបំពានយុត្តាធិការមីយ៉ាន់ម៉ា ដែលមិនមែនជាភាគីរបស់លក្ខន្តិកៈក្រុងរ៉ូមផងដែរ។

សូមរម្លឹកផងដែរថា នៅថ្ងៃ០៤ មេសាកន្លងទៅ លោកស្រីរដ្ឋអាជ្ញានៃតុលាការព្រហ្មទណ្ឌអន្តរជាតិ Fatou Bensouda បានដាក់បណ្តឹងមួយដោយស្នើឲ្យតុលាការសម្រេចថាតើតុលាការអាចអនុវត្តយុត្តាធិការរបស់ខ្លួនលើការបណ្តេញជនភៀសខ្លួនរ៉ូហ៊ីងយ៉ាពីប្រទេសបានឬយ៉ាងណា។ លោកស្រី បានទទួលស្គាល់ថាសំណើនេះគឺជារឿងដ៏លំបាកនៃផ្នែកច្បាប់មួយ ដ្បិត មីយ៉ាន់ម៉ា មិនមែនជាភាគី នៃលក្ខន្តិកៈក្រុងរ៉ូមរបស់តុលាការព្រហ្មទណ្ឌអន្តរជាតិ ។

តែយ៉ាងណាក៏ដោយ រដ្ឋអាជ្ញានៃតុលាការព្រហ្មទណ្ឌអន្តរជាតិ បានមើលឃើញពីលទ្ធភាពដើម្បីស្វែងរកយុត្តិធម៌សម្រាប់ជនរងគ្រោះ និងនាំជនល្មើសមកទទួលខុសត្រូវចំពោះមុខច្បាប់ ដោយសារតែវិបត្តិជនភៀសខ្លួន ដែលលោកស្រីរដ្ឋអាជ្ញាចាត់ទុកថាជាចេតនាបណ្តេញជនជាតិភាគតិចរ៉ូហ៊ីងយ៉ាពីប្រទេសនេះ បានកើតឡើងឆ្លងព្រំដែនពីមីយ៉ាន់ម៉ាទៅកាន់បង់ក្លាដែស ដែលជាប្រទេសហត្ថលេខីនៃលក្ខន្តិកៈក្រុងរ៉ូម។

បើតាមបណ្តឹងរបស់លោកស្រីរដ្ឋអាជ្ញាដែលបានស្នើសុំចាត់ការពីតុលាការបានបញ្ជាក់យ៉ាងដូច្នេះថា៖« គិតចាប់ពីវិបត្តិជនភៀសខ្លួនមីយ៉ាន់ម៉ាផ្ទុះឡើងពីខែសីហា ឆ្នាំ២០១៧មក មានជនជាតិភាគតិចរ៉ូហ៊ីងយ៉ាជាង៦៧០,០០០ នាក់ ដែលបានស្នាក់នៅក្នុងទឹកដីមីយ៉ាន់ម៉ាយ៉ាងស្រប ត្រូវបានបណ្តេញចេញពីប្រទេសទៅកាន់បង់ក្លាដែស ដែលទង្វើនេះ អាចចាត់ទុកជាបទល្មើសមួយប្រឆាំងនឹងមនុស្សជាតិ៕»