ឥទ្ធិពលព្យុះបេប៊ីនកា នឹងធ្វើឲ្យកម្ពុជា មានភ្លៀងធ្លាក់ ជាច្រើនថ្ងៃទៀត ជាពិសេសនៅតំបន់សមុទ្រ

ជាតិ

ឥទ្ធិពលព្យុះបេប៊ីនកា នឹងធ្វើឲ្យកម្ពុជា មានភ្លៀងធ្លាក់ ជាច្រើនថ្ងៃទៀត ជាពិសេសនៅតំបន់សមុទ្រ

13, Aug 2018 , 6:54 pm

រូបភាព

ដោយ: អ៊ូ សុខមាន (OU Sokmean)

ឥទ្ធិពលព្យុះបេប៊ីនកា នឹងធ្វើឲ្យតំបន់ជាប់មាត់សមុទ្រ និងតំបន់អាងទន្លេមរគង្គមានភ្លៀងធ្លាក់ច្រើន ខណៈតំបន់ខ្ពង់រាបភាគឦសាន្ត និងបណ្តារាជធានី និងខេត្តផ្សេង អាចនឹងមានភ្លៀងពីមធ្យម ទៅបង្គួរ។

សេចក្តីជូនដំណឹងថ្ងៃទី១៣ សីហា របស់ក្រសួងធនធានទឹក បានឲ្យដឹងថា វិសម្ពាធ ដែលកំពុងស្ថិតនៅក្បែរតំបន់ឆ្នេរភាគខាងត្បូងប្រទេសចិន បានវិវត្តន៍ខ្លួនទៅជាព្យុះទី១៦ ឈ្មោះ បេប៊ីនកា (BEBINCA)។

ព្យុះនេះ នឹងធ្វើដំណើរមកដល់ភាគខាងជើងប្រទេសវៀតណាម នៅថ្ងៃទី១៨ ខែសីហា ឆ្នាំ២០១៨។ បន្ទាប់ពីព្យុះនេះអស់ឥទ្ធិពល នឹងមានប្រព័ន្ធសម្ពាធទាបមួយលើតឡើង ហើយអូសកាត់លើអាងទន្លេមេគង្គក្នុងប្រទេសថៃ និងឡាវ។

តំបន់មាត់សមុទ្រ ពិសេសខេត្តកោះកុង និងព្រះសីហនុ អាចមានភ្លៀងធ្លាក់ខ្លាំង ឯលំហសមុទ្រមានភ្លៀង-ខ្យល់បក់បោកខ្លាំង និងមានរលកសមុទ្រខ្ពស់ៗ និងតំបន់អាងទន្លេមេគង្គ និងមានភ្លៀងធ្លាក់ច្រើន ចាប់ពីថ្ងៃទី១៧-១៨ ខែសីហា ជាពិសេសបន្ទាប់ពីព្យុះនេះអស់ឥទ្ធិពល។ នេះបើតាមការព្យាករក្រសួងធនធានទឹក និងឧតុនិយម។

ក្រសួងធនធានទឹក និងឧតុនិយម បានប្រាប់ដល់អ្នកនេសាទ និងអ្នកធ្វើដំណើរតាមសមុទ្រ បង្កើនភាពប្រុងប្រយ័ត្នឲ្យបានខ្ពស់ដើម្បីជៀសវាងនូវគ្រោះថ្នាក់ផ្សេងៗ៕