អន្តរជាតិ
ចិនថា គ្មានការឃុំខ្លួនជនជាតិ Uighur មួយលាននាក់នៅស៊ីនជាំងឡើយ ប៉ូលិសចិនឈរលើកដៃនៅខាងមុខវិហារឥស្លាមនៅតំបន់ស៊ីនជាំង (រូបភាព AFP)
× នៅថ្ងៃទី១៣ ខែសីហា ចិនបានទាត់ចោលរបាយការណ៍របស់អ្នកជំនាញអង្គការសហប្រជាជាតិ ដែលរកឃើញថា មានការឃុំខ្លួនមនុស្សមួយលាននាក់នៅតំបន់ស្វយ័តស៊ីនជាំង។ ភាគច្រើននៃអ្នកជាប់ឃុំនេះ គឺជាជនជាតិភាគតិចកាន់សាសនាឥស្លាម Uighur ដែលគេដឹងថា បានរងការរឹតត្បិតសិទ្ធិសេរីភាពខ្លាំងពីអាជ្ញាធរចិនកន្លងមក។ ទោះជាទាត់ចោលរបាយការណ៍មែន មន្ត្រីចិនទទួលស្គាល់ថា មានមនុស្សខ្លះពិតជាបានឆ្លងកាត់ជំរំកែប្រែឡើងវិញមែន ព្រោះពួកគេរងឥទ្ធិពលជ្រុលនិយម។
ការសំអាងថា ជនជាតិ Uighur ជិតមួយលាននាក់ត្រូវឃុំខ្លួនក្នុងជំរំកែប្រែ ជារឿងមិនពិតឡើយ។ នេះជាការឆ្លើយតបរបស់តំណាងក្រុងប៉េកាំងក្នុងកិច្ចប្រជុំគណៈកម្មាធិការអង្គការសហប្រជាជាតិស្ដីការលុបបំបាត់ការរើសអើងលើជនភាគតិចនៅទីក្រុងហ្សឺណែវនៅថ្ងៃទី១៣ ខែសីហា។ គ្មានមនុស្សជិតមួយលាននាក់ត្រូវឃុំខ្លួនមែន តែមិនមែនមានន័យថា គ្មានជនជាតិ Uighur ត្រូវបានបញ្ជូនទៅកាន់មន្ទីរឃុំឃាំងឡើយ។ នេះជាការទទួលស្គាល់របស់មន្ត្រីចិន។
ការឆ្លើយតបរបស់ចិន ធ្វើឡើងក្រោយសមាជិករបស់គណៈកម្មាធិការខាងលើបានលើកឡើងពីការព្រួយបារម្ភជុំវិញរបាយការណ៍ដែលគួរឲ្យទុកចិត្តបានពីទឹកដីចិនទាក់ទងការឃុំខ្លួនមនុស្សដ៏សន្ធឹកសន្ធាប់។ ដោយស្រង់ទិន្នន័យពីក្រុមការពារសិទ្ធិមនុស្ស លោកស្រី Gay McDougall និយាយថា មនុស្សជាងមួយលាននាក់មានជនជាតិ Uighur និងជនភាគតិច Turk ត្រូវឃុំខ្លួននៅជំរំប្រឆាំងការជ្រុលនិយម ខណៈពីរលាននាក់ទៀតត្រូវបញ្ជូនទៅកាន់មន្ទីរកែប្រែដើម្បីសិក្សាទ្រឹស្តីនយោបាយ។
បើតាមទីភ្នាក់ងារព័ត៌មាន AFP លោក Ma Youqing ដែលតំណាងឲ្យរដ្ឋាភិបាលក្រុងប៉េកាំង បានប្រកែកដាច់អហង្ការនឹងការលើកឡើងរបស់លោកស្រី McDougall ។ ផ្ទុយពីការលើកឡើងនេះ លោក Ma ឆ្លើយថា ប្រជាជននៅស៊ីនជាំងរាប់ទាំងជនជាតិ Uighur ផងនោះ រស់នៅដោយស្មើសិទ្ធិ និងស្មើភាព។ យ៉ាងណាមន្ត្រីចិនដដែលនេះបញ្ជាក់ថា ក្រុងប៉េកាំងពិតជាបានចាត់វិធានការដើម្បីដោះស្រាយបញ្ហានៅតំបន់ដូចជាការកើនឡើងចរន្តភេរវកម្ម និងការរាលដាលគំនិតជ្រុលនិយម។
មន្ត្រីជាន់ខ្ពស់ដែលចេញមុខការពារជំហរចិនដដែលនេះ ក៏ទាត់ចោលការចោទប្រកាន់របស់លោកស្រី McDougall ដែលអះអាងថា តំបន់ស៊ីនជាំងត្រូវបានកែប្រែទៅជាតំបន់គ្មានសិទ្ធិ ដោយលោកចាត់ទុកសម្ដីនេះផ្ទុយពីការពិតទាំងស្រុង។ លោក Ma បកស្រាយវិញថា គ្មានការតម្រង់គោលដៅលើក្រុមជនជាតិភាគតិចណាឡើយ ហើយក៏គ្មានការធ្វើទុក្ខបុកម្នេញសិទ្ធិ និងសេរីភាពនៃជំនឿសាសនារបស់ប្រជាជន Uighur អ្វីដែរ។
តាមពិតទៅ ចិនតែងតែបដិសេធព័ត៌មានទាំងឡាយពាក់ព័ន្ធការបំពានសិទ្ធិសេរីភាពជនជាតិ Uighur ដែលជាក្រុមភាគតិចមួយដែលខ្លួនទទួលស្គាល់ផ្លូវការ។ ប៉ុន្តែរបាយការណ៍នានាសុទ្ធតែបង្ហាញភស្តុតាងពីដែលអាជ្ញាធរចិនពិតជាធ្វើសកម្មភាពរំលោភបំពានសិទ្ធិ Uighur មែន។ សកម្មភាពទាំងនោះ ត្រូវបានក្រុងប៉េកាំងនិយាយការពារថា ជាការបោសសម្អាតធាតុផ្សំភេរវកម្មនិយម ដែលហូរចូលតំបន់សម្បូរប្រជាជនមូស្លីមមួយនេះប៉ុណ្ណោះ៕
© រក្សាសិទ្ធិដោយ thmeythmey.com