កីឡាជាតិ
ជាតិ
កីឡដ្ឋានអាស៊ីអឺរ៉ុបអាចប្រឈមនឹងខូចខាតទាំងស្រុង ក្រោយជន់លិចដោយការបាក់ទំនប់ ប្រភពរូបថត CNCC
× កីឡដ្ឋាន AEU Sport Park របស់ក្លិបអាស៊ីអឺរ៉ុបយូណាយធីត ត្រូវបានទឹកជន់លិចទាំងស្រុង ក្រោយបាក់ទំនប់ទប់ទឹក ដែលព័ន្ធជុំវិញកីឡដ្ឋាន កាលពីព្រឹកថ្ងៃទី១៤ សីហា ឆ្នាំ២០១៨។ កីឡដ្ឋាននេះ អាចប្រឈមនឹងខូចខាតទាំងស្រុង បើសិនមេឃនៅតែភ្លៀង និងទឹកជំនន់បន្តកើនឡើង។ ថ្នាក់ដឹកនាំអាស៊ីអឺរ៉ុប កំពុងរិះរកវិធីក្នុងការស្តារកីឡដ្ឋានឲ្យទៅរកស្ថានភាពដើមវិញ។ ហើយការជន់លិចនេះ អាចធ្វើឲ្យការប្រកួតរបស់អាស៊ីអឺរ៉ុប ដែលគ្រោងធ្វើនៅទីនេះ ត្រូវលើកទៅប្រកួតនៅកីឡដ្ឋានផ្សេងផងដែរ។
លោក សុក វាសនា គ្រូបង្វឹកក្រុមអាស៊ីអឺរ៉ុបយូណាយធីត បានវាយតម្លៃថា កីឡដ្ឋាន AEU Sport Park ដែលទឹកជន់លិចទាំងស្រុង អាចប្រឈមនឹងការខូចខាតទាំងស្រុង ប្រសិនបើមេឃនៅតែភ្លៀងនិងទឹកជំនន់បន្តកើនឡើង។ ការជន់លិចនេះ បន្ទាប់ពីទំនប់ ដែលគេសាងសង់ដើម្បីទប់ទឹកនៅជុំវិញកីឡដ្ឋានត្រូវបានបាក់ ក្រោយមិនអាចទប់នឹងទំហំទឹកជំនន់ និងជំនន់ទឹកភ្លៀង។
«កីឡដ្ឋាន AEU Sport Park អាចប្រឈមនឹងការខូចខាតទាំងស្រុង បើសិនយើងគ្មានវិធានក្នុងការស្រោចស្រង់»។ នេះជាការបញ្ជាក់របស់លោក សុក វាសនា ដែលបានបន្ថែមថា យ៉ាងហោចណាស់ត្រូវចំណាយពេលពី១ខែទៅ២ខែ ដើម្បីស្តារស្ថានភាពទៅរកភាពដើមវិញ ប្រសិនបើទឹកជំនន់នៅតែបន្តកើនឡើង និងភ្លៀងនៅតែធ្លាក់។ រយៈពេលនេះ អាចធ្វើឲ្យស្មៅទីលានខូចទាំងស្រុង ព្រោះស្មៅនេះត្រូវការមើលថែជាប្រចាំ។
ក្រៅពីទីលានដែលលិចទាំងស្រុង សម្ភារ និងហេដ្ឋារចនាសម្ព័ន្ធក្នុងកីឡដ្ឋាននេះ ក៏រងការជន់លិចផងដែរ។ បើតាមការចុះផ្សាយរបស់ CNCC ថ្នាក់ដឹកនាំអាស៊ីអឺរ៉ុប ត្រូវចំណាយថវិកាយ៉ាងតិចប្រមាណជា២ម៉ឺនដុល្លារ ក្នុងសាងសង់ និងជួសជុលកីឡដ្ឋាននិងហេដ្ឋារចនាសម្ព័ន្ធឡើងវិញ។
លោក ម៉ៅ ពិសិដ្ឋ អ្នកចាត់ការទូទៅក្លិបអាស៊ីអឺរ៉ុបបានបញ្ជាក់ថា៖«ប៉ះពាល់សំខាន់ គឺស្មៅហ្នឹងតែម្ដង ព្រោះជាស្មៅដែលត្រូវការថែទាំចាំបាច់ មិនមែនលក្ខណៈស្មៅសម្រាប់គោនោះទេ។ យ៉ាងហោច ត្រូវចំណាយជាង២ម៉ឺនដុល្លារ ដើម្បីរៀបចំស្មៅឡើងវិញ។ មួយទៀតនៅមានសម្ភារការិយាល័យ និងសម្ភារមួយចំនួនទៀត ព្រោះជាហេតុការណ៍មិនបានដឹង ចឹងយើងរើមិនទាន់»។
ទឹកជន់លិចកីឡដ្ឋាន AEU Sport Park នេះ អាចធ្វើឲ្យការប្រកួតរបស់ក្រុមអាស៊ីអឺរ៉ុបជាមួយអគ្គិសនីកម្ពុជាក្នុងសប្តាហ៍ទី១៨ និងភ្នំពេញក្រោនសប្តាហ៍ទី២២ ដែលគ្រោងធ្វើនៅទីនេះ ត្រូវលើកទៅរៀបចំនៅកីឡដ្ឋានផ្សេង។ កីឡដ្ឋាន AEU Sport Park ដែលមានទំហំ៤ហិកតា ស្ថិតនៅភូមិស្វាយជ្រុំ ឃុំស្វាយជ្រុំ ស្រុកខ្សាច់កណ្តាល ខេត្តកណ្តាល៕
Tag:
បាល់ទាត់
សុក វាសនា
កីឡដ្ឋានអាស៊ីអឺរ៉ុប
© រក្សាសិទ្ធិដោយ thmeythmey.com