កីឡាអន្តរជាតិ
អន្តរជាតិ
ម្ចាស់ជើងឯកប្រណាំងរថយន្ត F1 ពីរសម័យ Alonso ចូលនិវត្តន៍នៅចប់រដូវកាលនេះ
× Fernando Alonso ម្ចាស់ជើងឯកប្រណាំងរថយន្ត Formula One ឬកាំជ្រួចលើផ្ទៃដីពីរសម័យកាល បានប្រកាសកាលកំណត់ចូលនិវត្តន៍របស់ខ្លួននៅចុងបញ្ចប់រដូវកាលនេះ។ នេះបើតាមការផ្សាយរបស់ទីភ្នាក់ងារព័ត៌មាន AFP។
Alonso ដែលបច្ចុប្បន្នបើកបរឲ្យក្រុម McLaren នឹងបញ្ចប់អាជីពជាអ្នកប្រណាំងរថយន្តលំដាប់ពិភពលោក ដែលរូបគេបានចាប់ផ្តើមបង្ហាញខ្លួនជាលើកដំបូងក្នុងនាមជាកីឡាកររបស់ក្រុម Minardi ក្នុងព្រឹត្តិការណ៍ប្រណាំងនៅទីលាន Australian Grand Prix ឆ្នាំ ២០០១។
អ្នកប្រណាំងសញ្ជាតិអេស្ប៉ាញ វ័យ៣៧ឆ្នាំដែលកំពុងប្រកួតប្រជែងពាន F1 ក្នុងរដូវកាលទី ១៧ ធ្លាប់ឈ្នះជើងឯកពីលើកជាប់គ្នាក្នុងឆ្នាំ ២០០៥ និង២០០៦ នៅពេលប្រណាំងឲ្យក្រុម Renault។
Alonso និយាយពីការបញ្ចប់អាជីពថា៖«បន្ទាប់ពីរយៈពេល១៧ឆ្នាំដ៏អស្ចារ្យនៅក្នុងកីឡាដ៏អស្ចារ្យនេះ វាបានឈានដល់ពេលវេលាសម្រាប់ខ្ញុំក្នុងការផ្លាស់ប្តូរ។ ខ្ញុំបានពិចារណាលើការសម្រេចចិត្តនេះកាលពីប៉ុន្មានខែមុន ហើយវាជាការសម្រេចដ៏រឹងមាំមួយ។ នៅមានការប្រណាំងជាច្រើនទីលានទៀតដែលនៅសេះសល់ក្នុងរដូវកាលនេះ ហើយខ្ញុំបានប្តេជ្ញាចិត្តនិងមានមហិច្ឆតាជាងពេលណាៗទាំងអស់សម្រាប់រដូវកាលចុងក្រោយនេះ»។
ក្នុងរយៈពេល១៧រដូវកាលក្នុងអាជីព អតីតកីឡាកររបស់ Ferrari ធ្លាប់បានធ្លាប់ឈ្នះការប្រណាំងសរុប ៣២ទីលាន និងក្លាយជាកីឡាករប្រណាំងរថយន្តក្មេងជាងគេលើលោកដែលឈ្នះពាន F1 ក្នុងឆ្នាំ២០០៥។
Alonso ធ្លាប់បើកបរឲ្យក្រុមចំនួន៥ក្នុងអាជីពរួមមាន Benetton test driver (២០០០-២០០១), Minardi (២០០១), Renault (២០០៣-២០០៦), McLaren (២០០៧), ត្រឡប់ទៅ Renault (២០០៨-២០០៩), Ferrari (២០១០-២០១៤), ត្រឡប់ទៅ McLaren (២០១៥-២០១៨)៕
Tag:
Formula One
Fernando Alonso
ចូលនិវត្តន៍
© រក្សាសិទ្ធិដោយ thmeythmey.com